އައްޑޫގެ ބާ 2 ޖެންސެޓު ހަދަނީ، 1 ޖެންސެޓު ހަދައިފި؛ އާ ޖެންސެޓެއް ފޮނުވައިފި

އައްޑޫގެ ގުޅިފައިވާ ރަށްތަކުން ކަރަންޓު ކެނޑި، ދިގުލައިގެން ގޮސްފައިވާ މައްސަލައަށް ހައްލެއް ހޯދުމުގެ ގޮތުން ފެނަކައިން 1.8 މެގަވޮޓުގެ އާ ޖެންސެޓެއް ފޮނުވައި، ހަލާކުވެފައިވާ ޖެންސެޓުތައް ހެދުމުގެ މަސައްކަތް ކުރަން ފަށައިފި އެވެ.

ވީ ކިހިނެއް؟ - އައްޑޫގެ ގުޅިފައިވާ ރަށްތަކަށް ކަރަންޓު ދޭ ޖެންސެޓުތަކެއް ހަލާކުވެ، މަރާމާތުކުރަން ބޭނުންވާ ސްޕެއާ ނުފޮނުވި ލަސްވާތީ ސެންޓްރަލް ޕަވާ ސްޓޭޝަންގައި ކަރަންޓު ލޯޑު ނުހިފެހެއްޓިގެން އިރުއިރުކޮޅާ ކަރަންޓު ކެނޑޭ މައްސަލަ ބޮޑުވެފައި އޮންނަތާ ގިނަ ދުވަސްތަކެއް ވެއްޖެ އެވެ.

ބުނީ ކީކޭ؟ - ފެނަކައިން ރޭ 12 ޖަހަން އުޅެނިކޮށް ނެރުނު ނޫސްބަޔާނެެއްގައި ބުނީ ގުޅިފައިވާ ރަށްތަކަށް ކަރަންޓުގެ ހިދުމަތް ފޯރުކޮށްދޭން ބޭނުންކުރާ ޖެންސެޓުތަކުގެ ތެރެއިން:

ތަފްސީލު - އެ ބަޔާނުގައި ފެނަކައިން ބުނީ ރޯދަމަހަކީ ކަރަންޓު ބޭނުންކުރާ މިންވަރު އިތުރުވާ މަހަކަށް ވާތީ އާއި އައްޑޫގެ ތަރައްގީ މަޝްރޫއުތައް ކުރިއަށްދާއިރު ދުވަހުން ދުވަހަށް ކަރަންޓުގެ ޑިމާންޑު މަތިންވަމުންދާތީ އެކަމަށް ހާއްސަ ސަމާލުކަމެއް ދީގެން އެ ކުންފުނިން މަސައްކަތް ކުރަމުން އަންނަ ކަމަށެވެ.

އައްޑޫ ކަރަންޓު މައްސަލައަކީ، ފެނަކައިން ބުނި ގޮތުގައި ޒަމާންތަކަކަށް ދިގުލައިގެންގޮސްފައިވާ އިހުމާލުތަކެއްގެ ނަތީޖާ އެވެ. އަދި ހެޔޮ ނިޔަތުގައި އެ މައްސަލައަށް ދާއިމީ ހައްލެއް ގެންނަން އިހުލާސްތެރި މަސައްކަތްތަކެއް ކޮށްފައިނުވާާކަމީ މިއަދު ފެންނަ ހަގީގަތެއް ކަމަށް އެ ކުންފުނިން ބުނެ އެވެ.

"އެހެން ނަމަވެސް ރައްޔިތުންނަށް މެދުކެނޑުމެއްނެތި ކަރަންޓުގެ ހިދުމަތް ފޯރުކޮށްދިނުމަށް ކުރަންޖެހޭ ހުރިހާ ކަމެއްގެ ފުރިހަމަ ޒިންމާ ނަގައިގެން މި ކުންފުނިން ކުރަމުންގެންދާނެ ކަމުގެ ޔަގީންކަން އައްޑޫ ސިޓީގެ ލޮބުވެތި ރައްޔިތުންނަށް އަރުވަމެވެ،" އެ ބަޔާނުގައިވެ އެވެ.

ފެނަކައިން ބުނީ ރައީސްގެ ހާއްސަ އިރުޝާދާއި ލަފާފުޅާ އެކު އައްޑޫގެ ކަރަންޓަށް ދާއިމީ ހައްލު ހޯދަން ކުރަން ޖެހޭ މަސައްކަތްތައް ވެސް އެ ކުންފުނިން ފަށައި، ދޮޅު އަހަރުގެ ތެރޭގައި އަމަލީ މަސައްކަތް ނިންމަން އަމާޒުހިފައި، ކުރިއަށްގެންދާ ކަމަށެވެ.

"އައްޑޫ ސިޓީގެ ލޮބުވެތި ރައްޔިތުން ކެތްތެރިކަން އިސްކުރައްވައި، މި ދަނޑިވަޅުގައި ވެސް ކުންފުންޏަށް ދެއްވާ ފުރިހަމަ އެއްބާރުލެއްވުން ފާހަގަކޮށް ޝުކުރު ދަންނަވަމެވެ،" ބަޔާން ނިންމާލަމުން ފެނަކައިން ބުނެފައިވެ އެވެ.