ބީއެމްއެލް ކާޑް ލިމިޓުގެ ޓައިމްލައިން: ޝައުގުވެރި ނިއުޅުމެއް؛ ފުރޮޅުމެއް

26 އޮގަސްޓް | ޕީއެންސީގެ ޖަލްސާއެއްގައި ބީއެމްއެލްގެ ނިންމުމަކީ މާލީ ބަގާވާތެއް ކަމަށް ސީދާ ރައީސް ވިދާޅުވުން

ބީއެމްއެލްގެ ނިންމުމާ އެކު، ހިނގައިދިޔަ ކަންތައްތަކަކީ ބަގާވާތްކުރަން ކުރި މަސައްކަތެއްކަން "ސަލާމަތް ބުއްދި ހުރި ކޮންމެ މީހަކަށް ވެސް އެނގޭނެ" ކަމަށް ރައީސް ވިދާޅުވެ އެކަން ތަހުގީގު ކުރާނެ ކަމަށް ވިދާޅުވި

ބީއެމްއެލް ބަގާވާތުގެ ބައިވެރިވާ ކަމަށް ބުނެ ސީއީއޯ ވަގުތުން އިސްތިއުފާ ދޭން ވެސް ގޮވާލި

ކާޑުތަކުން ބޭރުގައި މުއާމަލާތް ނުކުރެވޭ ގޮތަށް ގެނައި ބަދަލަކީ އެ ބޭންކުގެ ވެރިން ބައިވެރިވެގެން ގެންނަން އުޅުނު ބަގާވާތެއް ކަމަށް ވިދާޅުވެ އެތަނުގެ ސީއީއޯ ކާލް ސްޓުމްކަ ވަގުތުން އިސްތިއުފާ ދެއްވަން ފިޝަރީޒް މިނިސްޓަރު އަހުމަދު ޝިޔާމް ގޮވާލެއްވި

25 އޮގަސްޓް | ބީއެމްއެލްގެ ކުއްލި ބޯޑު ބައްދަލުވުމެއް ބާއްވައި ކާޑް ލިމިޓާ މެދު ނިންމި ނިންމުމަށް އަމަލުކުރުން މަޑުޖައްސާލުން

އެގޮތަށް ނިންމީ ބޭންކުތަކުގެ ބެލެނިވެރި ފަރާތް، މަރުކަޒީ ބޭންކް އެމްއެމްއޭގެ އިރުޝާދުގެ ދަށުން 

ރައީސް ބީއެމްއެލްގެ ސީއީއޯ ބައްދަލުކޮށް ނިންމުން މުރާޖައާކުރުމަށް ބާރުއެޅުން

އިކޮނޮމިކް ކައުންސިލުން ވެސް ބީއެމްއެލްގެ ސީއީއޯއާ ރައީސް އޮފީހުގައި ބައްދަލުކޮށް ނިންމުން ބަދަލުކުރުމަށް އެދިވަޑައިގަތް 

ބީއެމްއެލްގެ ބޯޑުން އައިޝަތު ނޫރައްދީން އިސްތިއުފާދެއްވުން

އޭނާ ވަކިކުރަން ޕީސީބީން އަންގާފައިވަނިކޮށް ބޯޑުން އަމިއްލައަށް އިސްތިއިފާދެއްވި

24 އޮގަސްޓް – ބީއެމްއެލްގެ ޑެޕިއުޓީ ސީއީއޯ އައިޝަތު ނޫރައްދީން ބޭންކުގެ ބޯޑުން ވަކިކުރިކަން ޕީސީބީން އެންގި 

21 އޮގަސްޓް – ބީއެމްއެލްގެ ބޯޑް ބައްދަލުވުމެއް ބާއްވާ ކާޑް ލިމިޓްތައް ހުއްޓާލުމުގެ ނިންމުން ތަންފީޒުކުރާނެ ގޮތާއި ތާރީހު ނިންމި

ބޭންކުގެ ރިސްކު ކޮމިޓީން ބީއެމްއެލްގެ ބޭރު ފައިސާގެ ލިކިއުޑިޓީ ޕޮޒިޝަނަށް ނުރައްކާވެފައިވާކަން ސަމާލުކަމަށް ގެނައުމުން ޖެނުއަރީ މަހު ބޯޑުން ނިންމާފައިވާ ނިންމުން ތަންފީޒުކުރަން މަޝްވަރާކޮށް ގޮތެއް ނިންމި

ބޯޑް ބައްދަލުވުމުގެ ކުރިން އެކަމާ މެދު އެމްއެމްއޭއާ މަޝްވަރާކުރި

20 އޮގަސްޓް | ފިނޭންސް މިނިސްޓަރާ ވެސް ބައްދަލުކޮށް ކާޑް ލިމިޓް މުރާޖައާކުރަން މަޖުބޫރުކަމަށް ބީއެމްއެލްއިން ފާހަގަކުރި

ކާޑް ލިމިޓް މުރާޖައާކުރަން މަޖުބޫރުވެފައިވާކަން ފާހަގަކޮށް ބީއެމްއެލް އިކޮނޮމިކް ކައުންސިލާ ވެސް މަޝްވަރާކުރި 

24 ޖުލައި | ފިނޭންސް މިނިސްޓަރާ އަނެއްކާ ވެސް ބައްދަލުކޮށް ކާޑް ލިމިޓްތައް މުރާޖައާ ކުރުމާ މެދު މަޝްވަރާކުރި 

16 ޖުލައި | ފިނޭންސް މިނިސްޓަރާ ބޭންކުގެ ސީއީއޯ ބައްދަލުކުރައްވައި ކާޑް ލިމިޓްތައް މުރާޖައާ ކުރުމާ މެދު މަޝްވަރާކުރެއްވި

25 ޖޫން | ޑޮލަރު ހޯދުމަށް ދިމާވެފައިވާ ދަތިތަކުގެ ސަބަބުން ރާއްޖެ އިން ބޭރުގައި ކިޔަވަން ތިބޭ ކުދިންނަށް ބީއެމްއެލް އިން ޑޮލަރު ވިއްކަމުންދިޔަ އަދަދު ދަށްކުރުން

12 ޖޫން | ކާޑް ލިމިޓްތަކާ މެދު އެމްއެމްއޭގެ އެސިސްޓެންޓް ގަވަރުނަރާއި ބީއެމްއެލްގެ ސީއީއޯ ބައްދަލުކުރެއްވި 

28 މޭ | ބީއެމްއެލްގެ އޭޖީއެމްގައި ވާހަކަ ދައްކަވަމުން ބީއެމްއެލްއަށް އޮތް އެންމެ ބޮޑު ގޮންޖެހުމަކީ ޑޮލަރުގެ މައްސަލަކަމަށް ސީއީއޯ ވިދާޅުވި

މިހާތަނަށް ގަންނަން ލިބުނު އަދަދަށްވުރެ 333 އިތުރަށް ޑޮލަރު ވިއްކާފައިވާކަމަށް ސީއީއޯ އެ ބައްދަލުވުމުގައި ވިދާޅުވި

8 އެޕްރީލް | ބޭންކުގެ ނެޓް އޯޕަން ޕޮޒިޝަން ނުވަތަ ބޭރު ފައިސާގެ މުއާމަލާތް ތަކުން ބޭންކަށް އޮތް ރިސްކް ބޮޑުވާތީ އެކަމުގެ ކަންބޮޑުވުމާ މެދު ބީއެމްއެލްގެ ޑިރެކްޓަރުންގެ ބޯޑުގައި މަޝްވަރާކުރި 

6 ފެބުރުއަރީ | ބީއެމްއެލްއިން އިކޮނޮމިކް މިނިސްޓަރާ ވެސް ބައްދަލުކުރައްވައި ކާޑް ލިމިޓްތައް މިހާރު ހުރިވަރުގެ ނުބެހެއްޓޭނެ ކަމަށް ދެންނެވުން

1 ފެބްރުވަރީ | ކެބިނެޓުން ކާޑުގެ ޑޮލަރު ލިމިޓް 1200 އަށް ބޮޑު ކުރަން ނިންމި ނިންމުން ތަންފީޒުކުރަން އޮތް ދުވަސް

ނަމަވެސް ހާލަތު އޮތް ގޮތުން އެ ނިންމުން ތަންފީޒުނުކޮށް މަޑުޖައްސާލި

31 ޖެނުއަރީ | ހާލަތު ހުރި ގޮތުން ބީއެމްއެލްގެ ކާޑު ލިމިޓް ބޮޑު ނުކުރެވޭނެކަމަށް ފިނޭންސުން ނޫސް ބަޔާނެއް ނެރުން

25 ޖެނުއަރީ | ޕީސީބީން ބީއެމްއެލް ބޯޑުގެ 5 ޑިރެކްޓަރުން ކުއްލިއަކަށް އެއްފަހަރާ ވަކިކުރުން

ގައުމީ ބޭންކް، ބޭންކް އޮފް މޯލްޑިވްސް (ބީއެމްއެލް)ގެ ޗެއާމަން ހިމެނޭ ގޮތުން ސަރުކާރުން އެ ބޯޑަށް އައްޔަންކޮށްފައިވާ ފަސް ޑިރެކްޓަރުން މިއަދު ކުއްލި ގޮތަކަށް ވަކިކޮށްފި އެވެ. އެއާ އެކު ބީއެމްއެލްގެ ބޯޑު ޑިރެކްޓަރުންގެ ގާނޫނީ އަދަދު ވަނީ ގެއްލިފަ އެވެ.

23 ޖެނުއަރީ | ކާޑް ލިމިޓްތައް މުރާޖައާ ކުރުމާ މެދު ފިނޭންސް މިނިސްޓްރީއާ ބައްދަލުކުރުން

11 ޖެނުއަރީ | ކާޑް ލިމިޓްތައް މުރާޖައާ ކުރުމާ މެދު ބީއެމްއެލްއިން ފިނޭންސް މިނިސްޓްރީއާ ބައްދަލުކުރުން