މަސައްކަތްކުރީ ބަގާވާތްކުރަން، ގާނޫނުއަސާސީގައި އޮތް ގޮތަށް އެކަން ބަލާނެ: ރައީސް

ބީއެމްއެލްގެ ނިންމުމާ އެކު އިއްޔެ ހިނގައިދިޔަ ކަންތައްތަކަކީ ބަގާވާތްކުރަން ކުރި މަސައްކަތެއް ކަން 'ސަލާމަތް ބުއްދި ހުރި ކޮންމެ މީހަކަށް ވެސް އެނގޭނެ' ކަމަށް ވިދާޅުވެ، ގާނޫނުއަސާސީގައި އޮތް ގޮތަށް އެކަން ބަލާ، އަޅަން ޖެހޭ ފިޔަވަޅުތައް އަޅާނެ ކަމަށް ރައީސް މުހައްމަދު މުއިއްޒު މިރޭ ވިދާޅުވެއްޖެ އެވެ.

ވީ ކިހިނެއް؟ - އެމަނިކުފާނު މިހެން ވިދާޅުވީ މިރޭ ޕީއެންސީގެ މައި ހަރުގޭގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.

ފާހަގަކޮށްލެވޭ - އެ ޖަލްސާގައި ރައީސްގެ ކުރިން ވާހަކަދެއްކެވި ފިޝަރީޒް މިނިސްޓަރު އަހުމަދު ޝިޔާމް ވެސް ވަނީ ބީއެމްއެލްއިން އިއްޔެ އެޅި ފިޔަވަޅަކީ އިދިކޮޅު މައި ޕާޓީ އެމްޑީޕީ އަޑީގައި އޮވެގެން ރާއްޖޭގައި މާލީ ބަގާވާތެއް ހިންގަން ކުރި މަސައްކަތެއް ކަމަށް ތުހުމަތުކުރައްވައިފަ އެވެ.

ބީއެމްއެލްއިން ރުފިޔާ ކާޑުން ޑޮލަރު ނުކެޑޭ ގޮތަށް އިއްޔެ ހެނދުނު ނިންމި ނިންމުމާ ދިމާކޮށް، މި ސަރުކާރު ބަދަލުކުރަން ބަޔަކު މަސައްކަތް ކޮށްފައިވާ ކަމަށް ބެލުމުގެ ޖާގަ އޮތް ކަމަށް ބުނެ، އެ މައްސަލަ ތަހުގީގު ކުރަން ފަށާފައިވާ ކަމަށް ފުލުހުން ވަނީ ބުނެފަ އެވެ.

ބުނީ ކީކޭ؟ - "މިއީ ރޭވިގެން ހިނގި ކަމެއް. އެ ކުރި ގޮތެއް ބަލަން ފުލުން އެ އޮތީ ފަށާފައި،" ރައީސް ވިދާޅުވި އެވެ.

ފުލުހުން އެ މައްސަލަ ތަހުގީގު ކުރަމުން އަންނަކަން އެނގިވަޑައިގެންނެވީ ޖަލްސާގައި އިންނަވަނިކޮށްކަމަށް ވިދާޅުވެ، ޝިޔާމްގެ ވާހަކައަށް ތާއީދުކުރައްވާ ރައީސް ވެސް ވަނީ އިއްޔެގެ ނިންމުންތަކަކީ ބަގާވާތެއް ކަމަށް ސިފަކުރައްވައިފަ އެވެ.

"މި ކުރި ކަންތައް، ސަލާމަތް ބުއްދި ހުރި ކޮންމެ މީހަކު ވިސްނާލީމާ، މި ހުރިހާ ޑޮޓްތަކެއް ގުޅިގެން ދާކަން އެނގޭނެ. މި ކުރި ކަންތައް މިއީ ހަމަ ޝިޔާމް ވެސް ފާހަގަކުރެއްވި ގޮތަށް، މި ވާނީ ބަގާވާތްކުރަން މަސައްކަތް ކުރުމަށް،" ރައީސް ވިދާޅުވި އެވެ.

"އެހެންވީމާ ސަރުކާރު ގައިރު ގާނޫނީ ގޮތަށް ބަދަލު ކުރުމަށް، އަދި އެ ނޫން ވެސް ގައިރު ގާނޫނީ ގޮތަކަށް ރައްޔިތުންގެ ނިންމުން ބަދަލުކުރަން ކުރާ މަސައްކަތް، ގާނޫނުއަސާސީގައި އޮންނަ ގޮތަކަށް ކުރަން ޖެހޭ ކޮންމެ ކަމެއް ކުރުމުގައި ފުރިހަމަ ބާރާއި އެކުގައި، ގާނޫނުއަސާސީގައި އޮންނަ ގޮތަށް ހުރިހާ ކަމެއް އަޅުގަނޑުމެން ކުރާނަން."

އެކަމުގައި ކުށްވެރިވަނީ ކޮންމެ މީހެއް ކަމަށް ވިޔަސް، ބަގާވާތް ކުރަން މަސައްކަތް ކުރިކަން ސާބިތުވެ ހުކުމެއް އަތުވެއްޖެ ނަމަ އެ ހުކުމެއް ތަންފީޒުކުރަން ފަހަތަށް ނުޖެހޭނެ ކަމުގެ ޔަގީންކަން ވެސް ރައީސް ދެއްވި އެވެ.