ސުޕްރީމް ކޯޓުގެ ފަނޑިޔާރުން ވަކިކުރާ ބިލު މަޖިލީހުން ބަލައިގެންފި

ސުޕްރީމް ކޯޓުގެ ދެ ފަނޑިޔާރުން މަގާމުން ވަކިކުރާ ގޮތަށް ގާނޫނު އިސްލާހު ކުރަން މަޖިލީހަށް ހުށަހަޅާފައިވާ ބިލު މިއަދު ބަލައިގެންފި އެވެ.

ވީ ކިހިނެއް؟ - ސުޕްރީމް ކޯޓުގެ ފަނޑިޔާރުންގެ އަދަދު ހަތަކުން ފަހަކަށް ބަދަލުކޮށް، މިހާރު ތިއްބެވި އެ ކޯޓުުގެ ދެ ފަނޑިޔާރަކު މަގާމުން ވަކި ކުރާ ގޮތަށް ކޯޓުތަކާ ބެހޭ ގާނޫނަށް ޕީއެންސީގެ ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ހުށަހެޅުއްވި ބިލުގެ ބަހުސް ފެށީ މިއަދުގެ މަޖިލިސް ޖަލްސާގަ އެވެ.

އެ ބިލުގެ ބަހުސް މިއަދުގެ ޖަލްސާގައި ނިންމައި މިއަދު ބިލު ބަލައިގަތުމަށް ފެނޭތޯ ވޯޓަށް އެހުމުން، ބިލު ބަލައިގަތުމަށް ފާސްވީ 64 މެންބަރުންގެ ތާއީދާ އެކު އެވެ. ބިލާ ދެކޮޅަށް ވޯޓު ދެއްވީ 12 މެންބަރުންނެވެ.

ތަފްސީލު - ބިލާ ދެކޮޅަށް ވޯޓު ދެއްވި 12 މެންބަރުންގެ ތެރޭގައި ހިމެނެނީ އެމްޑީޕީގެ 11 މެންބަރަކާއި އަމިއްލަ ގޮތުން އައްޑޫ މީދޫ ތަމްސީލު ކުރައްވާ އަބްދުއްރަހްމާނެވެ.

ޖުމްލަ 12 މެންބަރުންގެ މައްޗަށް އެކުލެވޭ އެމްޑީޕީ ޕީޖީ މެންބަރުންގެ ތެރެއިން މި ވޯޓުގައި ބައިވެރިވެވަޑައިގެންފައި ނުވަނީ ގަލޮޅު ދެކުނު ދާއިރާގެ މެންބަރު މީކާއިލް އަހްމަދު ނަސީމެވެ.

ޖުމްލަ 75 މެންބަރުންގެ މައްޗަށް އެކުލެވޭ ޕީއެންސީގެ ޕީޖީ މެންބަރުންގެ ތެރެއިން 10 މެންބަރުން މިއަދުގެ ޖަލްސާއަށް ހާޒިރުވެވަޑައިގެންފައެއް ނުވެ އެވެ. އެއީ:

އެ މެންބަރުން މިއަދުގެ ޖަލްސާއަށް ހާޒިރުވެވަޑައިނުގެންނެވި ސަބަބެއް އަދި ސާފެއް ނޫނެވެ. 

މި ބިލާ ގުޅޭ ގޮތުން އިއްޔެ ޕީއެންސީގެ ޕީޖީން ބޭއްވި ބައްދަލުވުމުގައި ގިނަ މެންބަރުން މި ބިލާ ދެކޮޅަށް ވާހަކަ ދެއްކެވި އެވެ. ނަމަވެސް އެ ބައްދަލުވުމުގައި ނިންމާފައި އޮތީ ސަރުކާރުން އަންގާ ގޮތަކަށް އަމަލު ކުރަން މެންބަރުން އެއްބަސްވާނެ ކަމަށެވެ. އަދި ރޭގެ ވަގުތެއްގައި މި ބިލަށް ތާއިދު ކުރުމަށް ޕީއެންސީގެ ލީޑާޝިޕުން ނިންމާފައިވާކަން މެންބަރުންނަށް އަންގާފައިވެ އެވެ.

ސަރުކާރުގެ ކޯލިޝަންގައި ހިމެނޭ އެމްއެންޕީގެ ލީޑަރު، މާފަންނު އުތުރު ދާއިރާގެ މެންބަރު އަހްމަދު ނާޒިމް (ކާނަލް ނާޒިމް) އަދި އެމްޑީއޭގެ ނައިބު ލީޑަރު، ވެލިދޫ ދާއިރާގެ މެންބަރު މުހައްމަދު އައްބާސް މިއަދުގެ ޖަލްސާއަށް ވަޑައިގެންނެވި ނަމަވެސް މި ވޯޓުގައި ބައިވެރިވެވަޑައިގެންފައެއް ނުވެ އެވެ.

މި ބިލު ބަލައިގަތުމަށް ފާސްވުމާ އެކު، ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވަނީ ބިލު ދިރާސާ ކުރުމަށް މަޖިލީހުގެ ޖުޑީޝަރީ ކޮމިޓީއަށް ފޮނުވާފަ އެވެ.

ބިލު ހުށަހަޅާފައި ވަނީ، ސުޕްރީމް ކޯޓުގެ ފަނޑިޔާރުންގެ ގޮތުގައި މިހާރު ތިބި ހަތް ފަނޑިޔާރުންގެ ބަދަލުގައި ފަސް ފަނޑިޔާރުން ކަމަށް ހެދުމަށެވެ. މީގެ ނަތީޖާއަކީ، މިހާރު އެ ކޯޓުގައި ތިބި ދެ ފަނޑިޔާރުން މަގާމުން ވަކިވާނެ އެވެ. އެގޮތުން:

ފާހަގަކޮށްލެވޭ ކަމެއް - މި ބިލު މަޖިލީހަށް ހުށަހެޅުމުގެ ކުރިން މިދިޔަ އާދިއްތަ ދުވަހު ރައީސް މުހައްމަދު މުއިއްޒު ވަނީ ޖޭއެސްސީއަށް އެ މަނިކުފާނު އައްޔަންކުރައްވާފައިވާ މުހައްމަދު ސަމީރު އެ މަގާމުން ވަކިކޮށް، އެ މަގާމަށް އެންޓި-ކޮރަޕްޝަން ކޮމިޝަން (އޭސީސީ)ގެ ކުރީގެ މެންބަރު އަދި އެކައުންޓިން ދާއިރާއިން ތައުލީމް ހާސިލުކުރައްވައިގެން ހުންނެވި ޔަޒުމީދު މުހައްމަދު އައްޔަންކުރައްވާފަ އެވެ.