ސަރުކާރުގެ މައުލޫމާތު ނުލިބިގެން އާރުޓީއައި ލާ ހިސާބަކަށް ނުދާނެ: ރައީސް

މި ސަރުކާރުގެ މައުލޫމާތުތައް ނުުލިބިގެން، މައުލޫމާތު ހޯދުމާއި ލިބިގަތުމުގެ ހައްގުގެ ގާނޫނުގެ ދަށުން، ރައިޓް ޓު އިންފޮމޭޝަން (އާރުޓީއައި) ފޯމު ހުށަހަޅަން ޖެހޭ ހިސާބަށް ނުދާނެ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.

ވީ ކިހިނެއް؟ - ރައީސް މިގޮތަށް ވިދާޅުވީ، މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ.

ބުނީ ކީކޭ؟ - "އަޅުގަނޑުމެން މަސައްކަތް ކުރާނީ، ދެ ފުށް ފެންނަ ގޮތަށް. އެއްވެސް ކަމެއް ފޮރުވައި، ޖަވާބުދާރީ ނުވެވޭ ކަމެއް ނޯންނާނެ. މައުލުމާތު ހިއްސާ ކުރާނަން. އެކަހަލަ ކަމެއް ދިމާވެއްޖިއްޔާ، ހަމަ އަޅުގަނޑަށް ވެސް އިޝާރާތެއް ކޮށްލަންވީ. އަޅުގަނޑަށް ޔަގީން ދިމަލެއް ނުވާނެ...ތިބޭފުޅުން އާރުޓީއައި ލާން ޖެހޭ ހިސާބަކަށް ނުދާނެ. އަޅުގަނޑަކަށް ހިއެއް ނުވޭ ލާން ޖެހޭނެހެނެއް،" މިއަދު ބޭއްވި ވަޒީރުންގެ މަޖިލީހުގެ ނިންމުންތައް ހާމަ ކުރުމަށް ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވި އެވެ.

"ހުރިހާ މައުލޫމާތެއް ލިބެމުންދާނެ. އެއްވެސް ކަމެއްގައި ހިފެހެއްޓުމެއް ނާންނާނެ."

ތަފްސީލު - އެ ނުކުތާގައި ރައީސް އިތުރަށް ވިދާޅުވީ، އެމަނިކުފާނުގެ ވަޒީރުންގެ މަޖިލީހަށް ނަގާފައި އޮތީ "ވަރަށް ހީވާގި ޓީމެއް" ކަމަށާއި އެބޭފުޅުން ރެއާއި ދުވާލު މަސައްކަތް ކުރާނީ ރައްޔިތުންގެ ހައްގުގައި ކަމަށެވެ.

"އަޅުގަނޑުމެން ބޭނުންވަނީ، ރައްޔިތުންނަށް ހެވާއި ލާބަ ލިބޭ ހުރިހާ ކަމެއް ވެސް ނިންމަމުންދާން. އަދި ވީހާވެސް ރައްޔިތުންނާ އެންގޭޖްވަމުން، މަޝްވަރާ ކުރަމުންދާން،" ވަޒީރުންގެ މަޖިލީހުން މިއަދު ނިންމި 10 ކަމެއް ހާމަކުރެއްވުމަށް ފަހު ރައީސް ވިދާޅުވި އެވެ.

"އެހެންވީމަ އަޅުގަނޑުގެ ޓީމު، ކެބިނެޓު އަދި ކުންފުނިތަކުގެ އެމްޑީން [އާއި] ދެން ވެސް ތިއްބެވި ހުރިހާ ވެރިން މަސައްކަތް ކުރާނީ ރައްޔިތުންގެ ހައްގުގައި. އެ ނޫން ގޮތަކަށް މަސައްކަތެއް ނުކުރާނެ. އަދި މަސައްކަތް ކުރާނީ ދެ ފުށް ފެންނަ ގޮތަށް،" ސަރުކާރުގެ 22 ވަޒީރުންގެ ތެރެއިން 16 ވަޒީރުން އެމަނިކުފާނުގެ ފަހަތުގައި ތިއްބެވި ނޫސްވެރިންގެ ބައްދަލުވުމުގައި ރައީސް ވިދާޅުވި އެވެ.

އޭގެ އިތުރުން ރައީސް ވިދާޅުވިގޮތުގައި:

ރައީސް ވިދާޅުވި ގޮތުގައި އެމަނިކުފާނު ވަރަށް އަވަހަށް ރައްޔިތުންނާ ބައްދަލުކުރެއްވުމަށް މާލޭގެ އެކި ތަންތަނަށާއި ރަށްރަށަށް ވަޑައިގަންނަވާނެ އެވެ. މަސައްކަތް ކުރަން ބޭނުން ވަނީ، ރައްޔިތުންނާ ގާތުންކަން ރައީސް ތަކުރާރުކޮށް ފާހަގަ ކުރެއްވި އެވެ.

މިއަދުގެ ނޫސްވެރިންގެ ބައްދަލުވުމުގެ އިތުރު ހަބަރުތައް ކިޔާލަން:

ފާހަގަކޮށްލެވޭ - ސަރުކާރުގެ މައުލޫމާތު ހޯދުމަށް އާރުޓީއައި ލާން ނުޖެހޭނެ ކަމަށް ރައީސް މުއިއްޒު ވިދާޅުވިއިރު، ކުރީގެ ސަރުކާރުތަކުގައި ބައެއް ކަހަލަ މައުލޫމާތުތައް ހާމަނުކޮށްގެން އާރުޓީއައި ހުށަހަޅައިގެން ވެސް ބައެއް މައުލޫމާތުތައް ނުދީ ހިފަހައްޓާފައިވެ އެވެ.