ބޭރު ފައިސާއާ ގުޅުން ހުރި ގަވާއިދުތަކަށް ގެނައި އިސްލާހުތަކާ މެދު ޚިޔާލަކީ ކޮބާ؟

ޓޫރިޒަމް ދާއިރާގައި މަސައްކަތްކުރާ ބައެއް ފަރާތްތަކުން ކަންބޮޑުވުން ފާޅުކުރަމުން ދަނީ، ރާއްޖޭގައި ޗުއްޓީ ހޭދަކުރާ ކޮންމެ ފަތުރުވެރިއެއްގެ އަތުން ލިބޭ 25 ޑޮލަރާއި 500 ޑޮލަރު ރާއްޖޭގެ ބޭންކަކަށް މާރުކުރަން މަޖުބޫރުކުރާތީ އެވެ. ނަމަވެސް ބައެއް ފަރާތްތަކުން ދެކޭގޮތުގައި މިއީ ޑޮލަރުގެ ކަޅު ބާޒާރު ނައްތާލުމަށް ސަރުކާރުން އަޅަން ޖެހޭ މުހިންމު ފިޔަވަޅެކެވެ.

އެމްއެމްއޭގެ ގަވަރުނަރު ވިދާޅުވެފައިވާ ގޮތުގައި، ބޭރު ފައިސާއާ ގުޅުން ހުރި ގަވާއިދުތަކަށް ގެނެވުނު އިސްލާހުތަކުގެ ހެޔޮ އަސަރު ފެންނަން ފަށާނީ، މާލީ ސިޔާސަތުތަކަށް ވެސް ބަދަލު ގެނެސް، ސަރުކާރުން ރާވާފައިވާ ކަންތައްތައް ތަންފީޒުކުރަން ފެށުމުންނެވެ.

 އެމްޑީޕީން ވަނީ ސަރުކާރުން އެޅި މި ފިޔަވަޅުތަކާމެދު ކަންބޮޑުވުން ފާޅުކޮށްފަ އެވެ.

ބޭރު ފައިސާއާ ބެހޭ ގަވައިދާއި މަނީ ޗޭންޖިން ވިޔަފާރިއާ ބެހޭ ގަވައިދު މަރުކަޒީ ބޭންކުން  އެކުލަވާލާފައި  މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީގެ ހިޔާލުތަކާ ދެކޮޅަށް ކަމަށް އެ އެސޯސިއޭޝަނުން ވަނީ ބުނެފަ އެވެ.

ސަރުކާރުން މި ތައާރަފްކުރި ބޭރު ފައިސާއާ ބެހޭ ގަވާއިދުތަކާ މެދު ކިއުންތެރިންގެ ޚިޔާލަށް މިއަދުގެ ފޯރަމް ހުޅުވާލަމެވެ.