ޓައިމްލައިން: ރާއްޖޭގައި މިދިޔަ އޮކްޓޫބަރުން ފެށިގެން ހިނގާފައިވާ ބައެއް ޓްރެފިކް އެކްސިޑެންޓްތައް

27 ފެބްރުއަރީ، ހުޅުމާލެ - ހުޅުމާލޭ އުތުރުކޮޅުން ނިމޭ މަގު، ކުރެދިމާ ހިނގުމުގައި، ހަވީރު 4:30ގައި  ސައިކަލު އެކްސިޑެންޓް ހިނގި.  މި އެކްސިޑެންޓް ހިނގީ ދުއްވާފައިދިޔަ ސައިކަލް، ރަނގަޅަށް ފާހަގަކޮށްފައި ނެތް ބަމްޕަރެއްގެ މައްޗަށް އެރި ތަނުން ކައްސާލައިގެން. މި ހާދިސާގައި އަނިޔާވި އައިމިނަތު އީމާނަށް އޭޑީކޭ ހޮސްޕިޓަލުގައި ފަރުވާދެމުންދަނިކޮށް ވަނީ 28 މާޗްގައި ވަނީ މަރުވެފައި.

12 ފެބްރުއަރީ، ހުޅުމާލެ - މާލެއިން ހުޅުމާލެއަށް އަންނަން އޮންނަ ހައިވޭ ގައި އެކްސިޑެންޓެއް ހިނގި. މި އެކްސިޑެންޓުވީ ހައިވޭ އިން ހުުޅުމާލެ އަށް އަރާ ސަރަހައްދުގައި ހަތް ކާރު މުޑި އަރައިގެން.

29 ޖެނުއަރީ، ހުޅުމާލެ - މާލެއިން ހުޅުމާލެއަށް ބާރު ސްޕީޑްގައި ދުއްވާފައި ދިޔަ ކާރެއް ކޮންޓްރޯލް ނުވެ ގޮސް، ހައި ވޭ ފެންސްގައި ޖެހި ނުރައްކާތެރި އެކްސިޑެންޓެއް މިރޭ ހިނގި. މި އެކްސިޑެންޓުގައި ދެ މީހަކަށް ވަނީ އަނިޔާވެފަ.

20 ޖެނުއަރީ، ހުޅުލެ - ވެލާނާ އިންޓަނޭޝަނަލް އެއާޕޯޓްގެ ރޭމްޕްމަތީގައި ދުއްވާފައި ދިޔަ ވެހިކަލެއް ލައިޓް ޕޯސްޓެއްގައި ޖެހި އެކްސިޑެންޓެއް އޭގައި ތިބި ދެ މީހަކަށް އަނިޔާވި.

19 ޖެނުއަރީ، މާލެ - ރޭގެ ވަގުތެއްގައި ސިނަމާލެ ބުރިޖުގައި ހިނގި އެކްސިޑެންޓެއްގައި އަނިޔާވި ޒުވާނަކު މިއަދު މަރުވެއްޖެ. އެ އެކްސިޑެންޓުގައި މަރުވީ ސ. ހުޅުދޫ ހައިކަލް އިސްމާއިލް، 21.  އޭނާ މަރުވީ ލިބުނު އަނިޔާތަކަށް އޭޑީކޭ ހޮސްޕިޓަލްގައި ފަރުވާ ދެމުންދަނިކޮށް.

1 ޖެނުއަރީ 2022، މާލެ - ރޭ 10:45 އާއި ދަންވަރު 12އާ ދެމެދު ސިނަމާލޭ ބްރިޖު މަތީގައި ގަޑިއެއްހާއިރުގެ ތެރޭގައި ތިން އެކްސިޑެންޓު ހިނގިކަމަށް ފުލުހުން ބުނި. ފުރަތަމަ އެކްސިޑެންޓަކީ ކާރަކާއި ސައިކަލެއް ޖެހި ހިނގި އެކްސިޑެންޓެއް. ދެން ހިނގި ދެ އެކްސިޑެންޓު ވެސް ހިނގީ ދެ ކާރު ޖެހިގެން. މި އެކްސިޑެންޓުތަކުގައި އެއްވެސް މީހަކަށް އަނިޔާއެއް ނުވި ނަމަވެސް، އެކްސިޑެންޓުވި އުޅަނދުތަކަށް އެކި ވަރުގެ ގެއްލުންތައް ލިބުނު.

17 ނޮވެމްބަރު 2021، މާލެ - ހިނގާފައި ނިކަގަސްމަގު ހުރަސް ކުރަން ދިޔަ އަންހެނެއްގެ ގައިގައި، ބާރު ސްޕީޑެއްގައި ދިޔަ ޕިކަޕަކުން ޖެހި ނުރައްކާތެރި އެކްސިޑެންޓެއް ހިނގާ. އަނިޔާވި 47 އަހަރުގެ އަންހެން މީހާގެ ވާތުފައި ވަރަށް ބޮޑަށް ޗިސްވެ ފައި ބުރިކޮށްލަން ޖެހުނު.

16 ނޮވެމްބަރު، މާލެ - ސިނަމާލޭ ބްރިޖުގައި މެންދުރެއްހާއިރު ދެ ސައިކަލެއް ޖެހިގެން ނުރައްކާތެރި އެކްސިޑެންޓެއް ހިނގައި އަނިޔާވި މީހުންނަށް ހޮސްޕިޓަލުގައި ފަރުވާދިން.

4 ނޮވެމްބަރު، އައްޑޫ - އައްޑޫ ލިންކް ރޯޑުގައި ހިނގި. އެކްސިޑެންޓެއްގައި ބޮޑެތި ޒަހަމްތަކެއް ލިބުނު ސ. ހިތަދޫ، ނަޔާބު، ހަސަން އަލީ، 59،  ފަރުވާ ދެމުން އަންނަނިކޮށް މަރުވި.

27 އޮކްޓޫބަރު، ލ. އަތޮޅު -  ލިންކު ރޯޑުގައި ހެނދުނު ދުއްވާފައި ދިޔަ ފުލުހުންގެ ކާރެއް ފުރޮޅާލައި އެ ކާރު ދުއްވަން އިން ފުލުސް މީހާއަށް އަނިޔާވި.

17 އޮކްޓޫބަރު، ސ. ހިތަދޫ - ބާރު ސްޕީޑުގައި ދުއްވާފައި ދިޔަ ސައިކަލެއް ފާރެއްގައި ޖެހި ހިނގި އެކްސިޑެންޓެއްގައި މީހަކު މަރުވި. އެ އެކްސިޑެންޓު ހިނގީ  ދަންވަރު 12:30 ހާއިރު. އެކްސިޑެންޓްގައި މަރުވީ އެކްސިޑެންޓުވި ސައިކަލު ދުއްވަން އިން 24 އަހަރުގެ މީހެއް.

6 އޮކްޓޫބަރު، ހުޅުލެ - ވެލާނާ އިންޓަނޭޝަލް އެއާޕޯޓު ގައި ކާރެއް ކޮންޓްރޯލުން ނެއްޓި ހިނގި އެކްސިޑެންޓެއްގައި ތިން މީހަކަށް އަނިޔާވި. ކާރު ކޮންޓްރޯލުން ނެއްޓި އިންޓަނޭޝަލް ޓާމިނަލްގެ ކުރިމައްޗަށްވާ ގޮތަށް ހުރި ވަކަރު ފެންސުތަކެއް ފަޅާފައި ވަނީ ގޮސްފައި.