އެފްއޭއެމްގެ ނޯމަލައިޒޭޝަން ކޮމިޓީއަށް މަރުހަބާ ވިދާޅުވެ ތޯރިގު ދެއްކެވި މަންޒަރު

އެ ފޮޓޯތަކުން އެކަނި ވެސް ރާއްޖޭގެ ފުޓްބޯޅައިގެ މައި އިދާރާ އޮތީ މުޅިން ފުނޑި، ވީރާނާވެފައިކަން އެނގޭނެ އެވެ. އެފްއޭއެމްގެ ކުރީގެ ރައީސް އަދި އެންމެ ފަހުން ބާއްވަން އުޅުނު ދެ އިންތިހާބަށް ވެސް ކުރިމަތިލެއްވި އަހުމަދު ތޯރިގު (ޓޮމް) އިއްޔެ ފޭސްބުކަށް ދޫކޮށްލެއްވީ އެފްއޭއެމްގެ މައި އޮފީހުގެ ފޮޓޯތަކެކެވެ.

"ފީފާއިން އެކުލަވާލި ނޯމަލައިޒޭޝަން ކޮމިޓީގެ މެންބަރުންނަށް މަރުހަބާ،" ފޭސްބުކްގައި ލިއުއްވަމުން ތޯރިގު ވިދާޅުވި އެވެ.

"ރާއްޖޭގެ ފުޓްބޯޅައަށް ދިމާވެފައިވާ މައްސަލަތަކުގެ ތެރެއިން، އެތަނުގެ ހިންގަން ތިބި ވެރިން ފުޓްބޯޅައަށް ވެފައިވާ އިހުމާލުތައް ބަލާ ފިޔަވަޅު އެޅެންވާނެ. މިއީ މިއަދުގެ އެފްއޭއެމްގެ ހާލަތު."

ފީފާގެ އެހީގައި މީގެ 15 ވަރަކަށް އަހަރު ކުރިން ހެދި އެފްއޭއެމްގެ ތިން ބުރީގެ އިމާރާތުގެ ތިރި އާއި އެއްވަނަ ބުރީގެ އެ ފޮޓޯތަކުން ފެންނަނީ މުޅިން ވީރާނާވެ، ބޭނުންނުކޮށް ހުރި ތަނެއްގެ މަންޒަރެވެ.

އެފްއޭއެމްގެ ކުރީގެ ރައީސް ބައްސާމް އަދީލް ޖަލީލުގެ މެނޭޖްމަންޓުން އެ އިމާރާތް ތަޅާލައި ބޭރު ކުންފުންޏަކާ ގުޅިގެން އެތަނުގައި އާ ބޮޑު އިމާރާތެއް ހަދަން އެފްއޭއެމްގެ މަސައްކަތްތައް އެހެން ތަނަކަށް ބަދަލު ވެސް ކުރި އެވެ. ނަމަވެސް ކުއްޔަށް ބަދަލުވި ތަނަށް ކުލި ނުދެއްކޭ ހިސާބަށް ދިއުމުން އަނެއްކާވެސް ބާ އިމާރާތުގެ އެކި ތަންތަން އިދާރީ ގޮތުން ބޭނުންކުރަން ފެށި އެވެ.

އިމާރާތުގެ ގިނަ ބައިތައް ވީރާނާވާން ދޫކޮށްލި އިރު އެންމެ މަތީގައި ބައްސާމަށް ހާއްސަ އޮފީހެއް، އޭނާ މަގާމުން ދުރުކުރަން ދެން ވެސް، ހިންގަމުން އަ އެވެ. ދެން އިދާރީ ބައެއް މުވައްޒަފުން ބޭނުންކުރަމުން އައީ އެންމެ ތިރި އެވެ.

އާ އިމާރާތެއް ހަދަން އެކުލަވާލި ޕްލޭން ކޮޅެއްގައި ނުޖެހުމާއި ވަންނާނެ އެހެން ތަނެއް ނެތި އެފްއޭއެމްގެ އިމާރާތް އެގޮތަށް ދޫކޮށްލުމުން ދައްކައިދެނީ އެސޯސިއޭޝަންގެ އޭރުގެ މެނޭޖްމަންޓުން ވީ ބޮޑު އިހުމާލްކަމަށް ތޯރިގު ގަބޫލުކުރައްވަ އެވެ.

އެކަމަކު އޭނާގެ ޕޯސްޓް ނިންމާ ލައްވަމުން ވިދާޅުވީ "ދެރައީ އަދިވެސް އިންތިޚާބަކަށް އިއުލާން ކުރުމާ އެކު ވާދަކުރާނީ ބައްސާމް އާއި އޭނާގެ އެކްސްކޯގައި ތިބި ފަރާތްތައް" ކަމަށް ވުމެވެ.

"ހިތާމައިގެ ކޮޅެއް ނެތް،" ތޯރިގު ވިދާޅުވި އެވެ.

އެފްއޭއެމްގެ އާ އިންތިހާބު ބޭއްވޭ ގޮތް ނުވުމާއި ބައްސާމް އާއި އެކްސްކޯގެ މުއްދަތު ހަމަވުމުން ފީފާއިން ނިންމީ ނޯމަލައިޒޭޝަން ކޮމިޓީއެއް ހަދައި، އާ އިންތިހާބެއް ބޭއްވެންދެން އެ ކޮމިޓީން އެފްއޭއެމް ހިންގުމަށެވެ. ކޮމިޓީއަށް ދިން މުއްދަތު ހަމަވާނީ 31 ޖުލައި 2025 އަށެވެ.

އެ ކޮމިޓީގައި ހިމެނެނީ:

ބައްސާމާ ދެކޮޅަށް އެފްއޭއެމްގެ އިންތިހާބަށް އޭރު ކުރިމަތިލެއްވީ ތޯރިގު އެކަންޏެވެ. ނަމަވެސް ދެ ފަހަރަށް އިއުލާންކޮށްގެން ވެސް އިންތިހާބު ކުރިއަށް ނުގެންދެވުނީ އޭރުގެ މެނޭޖްމަންޓްގެ ނިންމުންތައް އެފްއޭއެމްގެ އަސާސީ ގަވާއިދާ ހިލާފުވުމުން، ފީފާއިން ކެންސަލްކުރުމުންނެވެ. އެ ދެ ފަހަރު ވެސް ފީފާއަށް މައްސަލަ ހުށައެޅުއްވީ ތޯރިގެވެ.

އެފްއޭއެމްގެ ތެރޭގައި ބައްސާމް ހިންގެވިކަމަށް ތުހުމަތުކުރެވޭ ހިޔާނާތާ ގުޅިގެން ފީފާއިން ވަނީ ފުޓްބޯޅައިގެ ހަރަކާތްތަކުން ބައްސާމް ނުވަ މަސް ދުވަހަށް ސަސްޕެންޑްކޮށްފަ އެވެ.

ނޯމަލައިޒޭޝަން ކޮމިޓީގެ ޒިންމާތަކުގެ ތެރޭގައި ފީފާ އާއި އޭއެފްސީން އެފްއޭއެމަށް ދިން ފައިސާގެ ތެރެއިން ބައްސާމްގެ މައްޗަށް ތުހުމަތުކުރެވޭ މައްސަލަތަކުގައި ގެއްލުނު ފައިސާ ހޯދުން ވެސް ހިމެނެ އެވެ.