އިސްކަންދަރު ރަސްގެފާނުގެ ނިޝާންފުޅުން ރީތި މަންޒަރެއް

ރާއްޖޭގައި ހަދާ މުހިންމު ބިނާއެއްގައި ތާރީހާއި ސަގާފަތާއި ދިވެހިވަންތަ ސިފަތަކުން ހެދުން ލައްވައިފި ނަމަ އެތައް ވާހަކައެއް ކިޔައިދެ އެވެ. އާ ޓާމިނަލްއަކީ އޭގެ ވާހަކައެކެވެ. މިހާތަނަށް ރާއްޖޭގައި ހެދި ޒަމާނީ އެއްވެސް އިމާރާތަކުން ދިވެހިންނާއި ބޭރު މީހުންނާ ހަމައަށް ވެސް ގެެނެސްދީފައިނުވާ ވާހަކައެކެވެ.

އިމާރާތެއްގައި ފުރަތަމަ ފެންނާނީ އޭގެ ބޭރު ސިފަ އެވެ. ވީއައިއޭގެ އާ ޓާމިނަލްގެ މޫނުމަތީގެ އަސްކަނީގައި އެ ހުރި ޖާލިތަކުން އެ އާކޮށްދެނީ ދިވެހިންގެ މުހިންމު ރަސްކަލެއްގެ ހަނދާންތަކެވެ. އާދައިގެ ރަސްކަލެއް ނޫންމެ އެވެ. އިބްރާހިމް އިސްކަންދަރު އެކެކެވެ.

މާލޭގެ ހުކުރު މިސްކިތް މިހާރު އެހުރި ގޮތަށް އަލުން ހެދީ އިސްކަންދަރު ރަސްގެފާނުގެ ވެރިކަމުގަ އެވެ. މުންނާރު ބިނާކުރެއްވީ ވެސް އެމަނިކުފާނެވެ. އެ ހިޔާލު އައީ 1668ގައި ކުރެއްވި ހައްޖު ދަތުރުފުޅުގައި ހަރަމްފުޅުގެ މުންނާރުތައް ފެނިވަޑައިގެންފަ އެވެ.

ތަހުތުގައި ގާތްގަނޑަކަށް 40 އަހަރު އިންނެވި އިސްކަންދަރު ރަސްގެފާނު ފަސްދާނުލާފައި ވަނީ ވެސް ހުކުރު މިސްކިތު ގަބުރުސްތާނުގަ އެވެ. އެމަނިކުފާނުގެ ނިޝާންފުޅު ފެންނަން ހުރީ މުނާރުގަ އާއި އެ މަގުބަރާގަ އެވެ. އޭގެ ފަހުން ކުރީގެ ރައީސް އިބްރާހިމް ނާސިރުގެ މަގުބަރާގައި ވެސް ހަމަ އެ ނިޝާންފުޅު ކަނޑާނަގާފައި އެބަ ހުއްޓެވެ.

އާ ޓާމިނަލްގެ ބޭރު ޖާލިތައް ފަރުމާކޮށްފައި އެ ހުރީ އެ ނިޝާންފުޅުން ހިޔާލު ހޯދައިގެންނެވެ. ޓާމިނަލްގެ އެތެރޭގައި ހުރި ބައެއް މަންޒަރުތަކުން ވެސް ނިޝާންގެ އެކި ބައިތައް ސިފަކޮށްދެ އެވެ.

ރާއްޖޭގެ ތާރީހު ދިރާސާކުރައްވާ ބައެއް ބޭފުޅުން ވިދާޅުވާ ގޮތުގައި ވީއައިއޭއަކީ ރާއްޖޭގެ މިނިވަންކަމާ ވަރަށް ބޮޑަށް ލާމެހިފައި ހުރި ތަނަކަށް ވާތީ އެ ނަޒަރުން ވިސްނާލާއިރު ވެސް އިސްކަންދަރު ރަސްގެފާނުގެ ހަނދާންތައް އެތަނާ ގުޅުވާލުން 'ގައުމީވަންތަ' އެވެ. ސަބަބަކީ ރާއްޖޭގެ މިނިވަންކަމުގެ ދިފާއުގައި އެވަރުގެ ހިތްވަރެއް ކުރެއްވި ރަސްކަލުންނާއި ވެރިން މަދުކަމުންނެވެ.

އިންޑިއާގެ އެކި ހިސާބުތަކުން ރާއްޖޭގެ ރަށްރަށަށް ތަފާތު ނުރައްކަލާ އޭރު ކުރިމަތިވެ އެވެ. އިސްކަންދަރު ރަސްގެފާނުގެ ވެރިކަމުގައި ލަސްކަރެއް ފޮނުއްވައި، އިންޑިއާގެ ހަނގުރާމަވެރިން ބަލިކޮށް މަލިކު ދިވެހިރާއްޖޭގެ ދަށަށް ގެނަ އެވެ. އެހެންކަމުން ބޭރު ގައުމަކަށް ދިވެހި ލަސްކަރެއް ފޮނުއްވައިގެން ހަނގުރާމައެއް ކާމިޔާބުކުރެއްވި ހަމައެކަނި ރަސްކަލަކަށް އެމަނިކުފާނު ވެ އެވެ.

މިއަދުގެ ޖީލަށް ދިވެހި ތާރީހު ކިޔައިދޭ ނަމަ އާ ޓާމިނަލްގެ ޖާލިތަކުން އެ ސިފަކޮށްދޭ ކުރެހުން ގުޅިފައި އެވަނީ އެވަރުގެ ވަރުގަދަ ދިވެހި ޝަހުސިއްޔަތަކާކަން ބުނެދޭން ވަރަށް ފަސޭހަވާނެ އެވެ.

ވެލާނާ އިންޓަނޭޝަނަލް އެއާޕޯޓްގެ ނަން، ރާއްޖޭގެ މައި އެއާޕޯޓަށް ދީފައި އެވަނީ އިނގިރޭސިންގެ ދަށުން ރާއްޖެ މިނިވަންކުރެއްވި ކުރީގެ ރައީސް އިބްރާހިމް ނާސިރުގެ އާއިލާއަށް ނިސްބަތްކޮށެވެ. ދަގަނޑު ފިލާ ބޭނުންކޮށްގެން ހުޅުލޭގައި އިނގިރޭސިން އަޅާފައި އޮތް ރަންވޭ ހަލާކުކޮށްލައި، އިނގިރޭސި ބޯޓުތަކަށް ނުޖެއްސޭ ގޮތް ހެދީ، ނާސިރުގެ ބޮޑުވަޒީރުކަމުގައި ހިންގި މިނިވަންކަމުގެ ހަރަކާތެއްގެ ގޮތުގަ އެވެ.

ފަހުން ހުޅުލޭ އެއާޕޯޓް ހެދީ މުޅި ރާއްޖެ ބައިވެރިވެގެން ހިންގި ގައުމީ އެހާމެ ބޮޑު ރޫހެއްގައި، ދިވެހިންނެވެ.

މިއަދު އެއާޕޯޓްގެ ނަން ނާސިރުގެ އާއިލާއަށެވެ. އާ ޓާމިނަލްގެ ރީތިކަން އެ ގެނެސްދެނީ އިސްކަންދަރު ރަސްގެފާނުގެ ތާރީހީ ނިޝާނަކުންނެވެ.

ދިވެހި ތާރީހު ދިރާސާކުރައްވާ އެމްއެންޑީއެފްގެ ސާޖަންޓް މޭޖާ އަބްދުﷲ ސައީދުގެ ނަޒަރުގައި އިސްކަންދަރު ރަސްގެފާނުގެ ނިޝާންފުޅު ރަމްޒުކޮށްދޭ ފަރުމާކުރުމަކުން ޓާމިނަލް ފެނުމަކީ، ދިވެހި ތާރީހާއި ސަގާފަތަށް ލޯބިކުރާ މީހުންނަށް ވެސް އޮތް ވަރަށް ބޮޑު ހިތްހަމަޖެހުމެކެވެ. ޒުވާން ޖީލާ ހަމައަށް ވެސް ތާރީހީ މުހިންމު ވާހަކައެއް ތިލަކޮށްދޭނެ ކަމަށް އޭނާ ގަބޫލުކުރައްވަ އެވެ.

"ވަރަށް މުހިންމު ކަމެއް އަސްލު. އަޅުގަނޑަށް ހީވަނީ ތުއްތު ކުދިންނާއި ޒުވާނުންނަށް އެއީ ކޮން އެއްޗެއްކަން އެނގުނީމާ ސަގާފަތާއި ތަރިކައަށް ލޯބި ބޮޑުވާނެހެން،" އަބްދުﷲ ސައީދު ވިދާޅުވި އެވެ.

"ޒަމާނާ އެއްގޮތަށް އެކަން އެއޮތީ ކުރައްވާފައި. އެއީ އެ ނިޝާނުން ހިޔާލު ލިބިގެން ޒަމާނީ ފަރުމާކުރުމަކުން."

ތާރީހާ ގުޅިފައި ހުރި ކަންކަން ޒަމާނަށް ފައްތާއިރު ގެންނަ ބަދަލުތައް ބައެއް ފަހަރަށް ވަރަށް ރީތިވެ އެވެ. އެގޮތުން އިސްކަންދަރު ރަސްގެފާނުގެ ނިޝާންފުޅު އަސްލަކަށް ބަލައިގެން ޓާމިނަލްގެ ޖާލިތައް ފަރުމާކޮށްފައި ހުރީ، އެކަހަލަ ހިތްގައިމު ބަދަލުތަކާ އެކުގަ އެވެ.

އާ ޓާމިނަލަކީ މިހާތަނަށް ސަރުކާރުން ހިންގި އެންމެ އަގުބޮޑު މަޝްރޫއު އެވެ. އެތަނުގެ އަގު ގާތްގަނޑަކަށް 7 ބިލިއަން ރުފިޔާއަށް އަރަ އެވެ. އެވަރުގެ އިމާރާތަކުން ދިވެހިވަންތަ ސިފަތަކާއި ތާރީހީ ހަނދާންތައް ގުޅުވާލުމަކީ ޕްލަސް ޕޮއިންޓެކެވެ.