މީޑިއާ ކޮންޓްރޯލް ކޮމިޝަންގެ އިންތިހާބަށް ތަރުހީބެއް ނުލިބުނު

މީޑިއާތައް ކޮންޓްރޯލް ކުރުމަށް މިފަހުން ރައީސް މުހައްމަދު މުއިއްޒު ތަސްދީގު ކުރެއްވި ބިލާ އެކު، އަލަށް އުފައްދާ ކޮމިޝަނަށް މީޑިއާތަކުން އިންތިހާބު ކުރާ މަގާމުތަކަށް ކުރިމަތިލުމަށް ހުޅުވާލުމުން މާ ބޮޑު ތަރުހީބެއް ނުލިބި ސުންގަޑި ހަމަވެއްޖެ އެވެ.

ވީ ކިހިނެއް؟ - އާ ގާނޫނުގެ ދަށުން އުފައްދާފައިވާ 'މޯލްޑިވްސް މީޑީއާ އެންޑް ބްރޯޑްކާސްޓިން ކޮމިޝަން'ގެ ހަތް މެންބަރުންގެ ތެރެއިން ހަތަރު މަގާމަކީ މީޑިއާތަކުން އިންތިހާބު ކުރާ މަގާމުތަކެވެ.

މި މަހު 11ގައި ބާއްވާ މި އިންތިހާބަށް ކުރިމަތިލުމަށް އިލެކްޝަންސް ކޮމިޝަން (އީސީ)ން މިދިޔަ ހަފްތާގައި ހުޅުވާލި މުއްދަތު މިއަދު މެންދުރު 2އަށް ވަނީ ހަމަވެފަ އެވެ.

ތަފްސީލު - މުއްދަތު ހަމަވުމާ އެކު، ކުރިމަތިލި ބޭފުޅުންގެ އަދަދުތައް އީސީން މިއަދު ވަނީ ހާމަކޮށްފަ އެވެ.

މީޑިއާތަކުން އިންތިހާބު ކުރާ ހަތަރު މަގާމުތަކުގެ ތެރޭގައި ހިމެނެނީ ބްރޯޑްކާސްޓަރުން ތަމްސީލު ކުރާ ދެ މެންބަރަކާއި އޮންލައިން ނުވަތަ އެހެން މީޑިއާތައް ތަމްސީލު ކުރާ ދެ މެންބަރުންނެވެ.

އިސީން ބުނީ ސުންގަޑި ހަމަވިއިރު ޖުމްލަ ހަ ކެންޑިޑޭޓުން ކުރިމަތިލި ކަމަށެވެ. އެގޮތުން:

ކެންޑިޑެސީ ބަލައިނުގަތް ސަބަބު އަދި ސާފެއް ނޫނެވެ. މިހާރު އޮތް ގޮތުން ހަ ބޭފުޅުން ކުރިމަތިލީ ނަމަވެސް، އިންތިހާބު ކުރަން ޖެހޭ އަދަދަށް ވެސް ކެންޑިޑޭޓުން ހަމައެއް ނުވެ އެވެ.

ފަސް މަންޒަރު - އާ ކޮންޓްރޯލް ބިލު މިދިޔަ މަހު 18ގައި ރައީސް މުހައްމަދު މުއިއްޒު ތަސްދީގު ކުރެއްވުމާ އެކު، މީޑިއާތައް ރެގިއުލޭޓް ކުރުމަށް ކުރިން އޮތް ސެލްފް ރެގިއުލޭޓަރީ ނިޒާމް ފުނޑާލައި އޭރު އޮތް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އާއި މޯލްޑިވްސް މީޑިއާ ކައުންސިލް (އެމްއެމްސީ) ވަނީ އުވިފަ އެވެ. ރައީސް މި ބިލު ރަސްދީގު ކުރެއްވީ، ބިލާ ގުޅޭ ގޮތުން ދިވެހި ނޫސްވެރިންނާއި ބޭރުގެ ޖަމިއްޔާތަކުން ކަންބޮޑުވުން ފާޅުކުރަމުން ދަނިކޮށެވެ.

ސަރުކާރު އަޑީގައި އޮވެ، ޕީއެންސީގެ ފުރިހަމަ ތާއީދު ލިބިގެން މި ބިލު މަޖިލީހަށް ހުށަހެޅުއްވީ އަމިއްލަ މެންބަރެއް ކަމަށްވާ ތޫޅާދޫ ދާއިރާގެ އަބްދުލް ހަންނާން އަބޫބަކުރެވެ. ބިލު ޑްރާފްޓް ކުރުމުގައި އިސްކޮށް އުޅުއްވީ ޕީއެންސީއަށް ނިސްބަތްވެވަޑައިގަންނަވާ މަޖިލީހުގެ ނައިބު ރައީސް އަހްމަދު ނާޒިމް އެވެ. 

މަޖިލިސް ޗުއްޓީގައި އޮއްވާ މާ ބޮޑު ދިރާސާކުރުމެއް ނެތި ބިލު ފާސްކޮށްފައި ވަނީ އަވަސް އަރުވާލައިގެން ދެ ހަފްތާއެއްހާ ދުވަސް ތެރޭގަ އެވެ. ދިރާސާ ކުރުމަށް ބޭއްވި ކޮމިޓީގެ ބައެއް ބައްދަލުވުންތައް ވެސް ސިއްރުކުރި އެވެ.