ނުހިންގާ ގިނަ މީޑިއާތަކެއް ހިމެނޭހެން ކޮންޓްރޯލް ކޮމިޝަން އިންތިހާބުގެ ވޯޓާސް ލިސްޓު އާންމުކޮށްފި

މީޑިއާ ކޮންޓްރޯލް ކޮމިޝަންގެ އިންތިހާބުގައި ވޯޓުލެެވޭ މީޑިއާތަކުގެ ލިސްޓުގައި ނުހިންގާ ގިނަ މީޑިއާތައް ވެސް ހިމެނޭހެން ވޯޓާސް ލިސްޓު އިލެކްޝަންސް ކޮމިޝަން (އީސީ)ން މިއަދު އާންމުކޮށްފި އެވެ.

ވީ ކިހިނެއް؟  - މީޑިއާ ކޮންޓްރޯލް ބިލު މި މަހު 18ގައި ރައީސް މުހައްމަދު މުއިއްޒު ތަސްދީގު ކުރެއްވުމާ އެކު، މީޑިއާތައް ރެގިއުލޭޓް ކުރުމަށް ކުރިން އޮތް ސެލްފް ރެގިއުލޭޓަރީ ނިޒާމް ފުނޑާލައި، އޭރު އޮތް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) އާއި މޯލްޑިވްސް މީޑިއާ ކައުންސިލް (އެމްއެމްސީ) ވަނީ އުވިފަ އެވެ. އެއާ އެކު، ސަރުކާރުން މީޑިއާތައް ކޮންޓްރޯލް ކުރުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ނަމުގައި ކޮމިޝަނެއް ވަނީ އުފައްދާފަ އެވެ.

ޖުމްލަ ހަތް މެންބަރުން ތިބޭ އެ ކޮމިޝަނަށް މީޑިއާތަކުން އިންތިހާބު ކުރާ ހަތަރު މެންބަރުންގެ މަގާމަށް މިދިޔަ ބުރާސްފަތި ދުވަހު އިލެކްޝަންސް ކޮމިޝަނުން ވަނީ ހުޅުވާލާފަ އެވެ.

ތަފްސީލު - އަންނަ މަހު 11ގައި ބާއްވާ މި އިންތިހާބުގައި  ވޯޓުލާ މީޑީއާތަކުގެ ފުރަތަމަ ލިސްޓު އިލެކްޝަންސް ކޮމިޝަނުން މިއަދު ވަނީ ގެޒެޓްކޮށްފަ އެވެ. ލިސްޓުގައި 353 މީޑިއާ ހިމަނާފައިވެ އެވެ.

އޭގެ ތެރެއިން ގިނަ މީޑިއާތަކަކީ ގަވައިދުން ނުނެރޭ ނުވަތަ ނެރުން ހުއްޓާލާފައިވާ މީޑިއާތަކެވެ. އޭގެ ތެރޭގައި ހިމެނެނީ:

އެ ލިސްޓުގައި މީޑިއާތަކުގެ އިތުރުން އެ މީޑިއާއެއެއްގެ ކުންފުނި ވެސް ހިމަނާފައިވެ އެވެ.

މި ލިސްޓަށް ޝަކުވާ ހުށަހަޅަން ހުޅުވާލާފައި ވަނީ މާދަމާ މެންދުރު ފަހު 3 އަކަށެވެ.

މީޑިއާތަކުން އިންތިހާބު ކުރާ ހަތަރު މެންބަރުންގެ ތެރެއިން ދެ މެންބަރުންނަކީ އޮންލައިން މީޑިއާ އަދި އަނެއް ދެ މެންބަރުންނަކީ ބްރޯޑްކާސްޓަރުންގެ ފަރާތުން އިންތިހާބު ކުރާ މެންބަރުންނެވެ.

ފަސް މަންޒަރު - ސަރުކާރު އަޑީގައި އޮވެ، ޕީއެންސީގެ ފުރިހަމަ ތާއީދު ލިބިގެން މި ބިލު މަޖިލީހަށް ހުށަހެޅުއްވީ އަމިއްލަ މެންބަރެއް ކަމަށްވާ ތޫޅާދޫ ދާއިރާގެ އަބްދުލް ހަންނާން އަބޫބަކުރެވެ. ބިލު ޑްރާފްޓް ކުރުމުގައި އިސްކޮށް އުޅުއްވީ ޕީއެންސީއަށް ނިސްބަތްވެވަޑައިގަންނަވާ މަޖިލީހުގެ ނައިބު ރައީސް އަހްމަދު ނާޒިމް އެވެ. 

މަޖިލިސް ޗުއްޓީގައި އޮއްވާ މާ ބޮޑު ދިރާސާކުރުމެއް ނެތި ބިލު ފާސްކޮށްފައި ވަނީ އަވަސް އަރުވާލައިގެން ދެ ހަފްތާއެއްހާ ދުވަސް ތެރޭގަ އެވެ. ދިރާސާ ކުރުމަށް ބޭއްވި ކޮމިޓީގެ ބައެއް ބައްދަލުވުންތައް ވެސް ސިއްރުކުރި އެވެ.