ޔުމްނު ވެއްޓުނުތާ 4 މަސް ވާއިރު އަދިވެސް ބަޔާން ނުނެގޭ

މިދިޔަ 18 އޭޕްރީލްގައި މާލޭ ގެއެއްގެ ފުރާޅުމައްޗަށް ވެއްޓުނު ހައްވާ ޔުމްނު ރަޝީދުގެ ބަޔާން އަދިވެސް ނުނެގޭ ކަމަށް ފުލުހުން މިއަދު ބުނެފި އެވެ.

ވީ ކިހިނެއް؟ - މި މައްސަލައިގެ ތަހުގީގަށް ފުލުހުންނަށް ވެސް އަދި ރިޔާސީ ކޮމިޝަނަށް ވެސް ޔުމްނުގެ ބަޔާން ލިބިފައެއް ނުވެ އެވެ. ފުލުހުންނާއި ރިޔާސީ ކޮމިޝަނުން ފާހަގަކޮށްފައިވާ ގޮތުގައި ބަޔާން ނެގުމަށް އާއިލާގެ އެއްބާރުލުން ލިބިފައެއް ނުވެ އެވެ.

ނަމަވެސް، އާއިލާ އިން ކުރިން ބުނެފައިވަނީ ޔުމްނު ފަރުވާއަށް ފަހު މެލޭޝިއާގެ ހޮސްޕިޓަލުން ގެއަށް ދޫކޮށްލާފައި ވިޔަސް، ބަޔާން ދެވޭ ވަރު ނުވާ ކަމަށެވެ.

ބުނީ ކީކޭ؟ - "ޔުމްނުގެ ބަޔާން އަދި ނުނެގޭ،" ޔުމްނުގެ ބަޔާން ލިބިއްޖެތޯ، ފުލުހުންގެ މީޑިއާ ގްރޫޕުގައި ނޫސްވެރިއަކު އިއްޔެ ފުލުހުންނާ ސުވާލުކުރުމުން ފުލުހުން މިއަދު ބުންޏެވެ.

ނަމަވެސް، ޔުމްނުގެ ބަޔާން އަދިވެސް ނުނެގެނީ ކީއްވެގެން ކަމެއް ފުލުހުން ނުބުނެ އެވެ.

ފާހަގަކޮށްލެވޭ ކަމެއް - ފުލުހުންނާއި އިދާރާތަކުގެ އިހުމާލު އޮތް ކަމަށް ބުނެ މިފަހުން މާލޭގައި އެންމެ ބޮޑެތި މުޒާހަރާތައް ބޭއްވި މައްސަލައިގައި ހިމެނޭ ޔުމްނުގެ ބަޔާން ނުނެގިގެން ފުލުހުން ވަނީ މެލޭޝިއާގެ ފުލުހުންގެ އެހީތެރިކަން ވެސް ހޯދަމުންދާ ކަމަށް މީގެ ކުރިން ބުނެފަ އެވެ. ޔުމްނުގެ ބަޔާން ނެގުމަށްޓަކައި އޭނާ މެލޭޝިއާއަށް ފުރި ފަހުން އެ ގައުމުގައި ދެ ފުލުހަކު ގާއިމްވެ ތިބި ކަމަށް ވެސް ފުލުހުން އޭރު ބުނެފައިވެ އެވެ. އޭގެ ތެރޭގައި މެޑިކަލް ޑޮކްޓަރެއް ހިމެނެ އެވެ.

އާއިލާގެ ފަރާތުން އޭރު ބުނެފައި ވަނީ ފުލުހުން ރަސްމީކޮށް ބަޔާން ނަގަން އެދިފައި ނުވާ ކަމަށެވެ.

އެނގުން މުހިންމު - ޔުމްނު ވެއްޓުނު ހާދިސާ ތަހުގީގު ކުރުމަށް ރައީސް މުހައްމަދު މުއިއްޒުގެ ގަރާރަކުން އުފެއްދެވި ރިޔާސީ ކޮމިޝަން މިިދިޔަ މަހު ވަނީ އުވާލައްވާފަ އެވެ.

އެ ކޮމިޝަންގެ ތަހުގީގު ރިޕޯޓުގައިވާ ގޮތުން:

އެ ކަންކަމަށް ރިއާޔަތްކޮށް ކޮމިޝަނުން ބުނީ ހ. މިޓާޒް ފުރާޅު މައްޗަށް ވައްޓާލާފައި ނުވަތަ ފުންމާލާފައި ނުވަތަ ވެއްޓިފައިވަނީ ހ. ފެންޓަނޯއީގެ ޓެރަހުން ކަމަށް ނުބެލެވޭ ކަމަށެވެ.