ރައްޔިތުންގެ މަޖިލީހުގެ ތަޅުމުގައި ޖަލްސާއެއް ކުރިއަށް ދަނީ (ފޮޓޯ/ މަޖިލިސް)

ވޭޕް ކުރުމުން ބޮޑެތި ޖޫރިމަނާ ކުރެވޭ އިސްލާހު ކޮމިޓީއަށް

ސަރުކާރުން ނިންމާފައިވާ ގޮތަށް ބިލުގައިވާ ގޮތުން އަންނަ މަހުގެ 15 އިން ފެށިގެން ވޭޕް އެތެރެ ކުރުން މަނާ އަދި ޑިސެމްބަރު 15 އިން ފެށިގެން އެ ބޭނުން ކުރުން މަނާ؛ އޭގެ ކަމެއް ކޮށްފި ނަމަ، ބޮޑެތި އަދަދުން ޖޫރިމަނާ ކުރެވޭނެ

މުހައްމަދު މުޒައްޔިން ނާޒިމް

28 އޮކްޓޯބަރު 2024

ރާއްޖެއަށް ވޭޕް އެތެރެ ކުރުމާއި ބޭނުން ކުރުން މަނާކޮށް އިތުރު ހަރުކަށި ފިޔަވަޅުތަކެއް އެޅުމަށް ދުންފަތް ކޮންޓްރޯލް ކުރުމުގެ ގާނޫނަށް ސަރުކާރުގެ ފަރާތުން ހުށަހެޅި އިސްލާހު ގެނައުމުގެ ބިލު މަޖިލީހުން މިއަދު ބަލައިގެންފި އެވެ.

ވީ ކިހިނެއް؟ - ސަރުކާރުގެ ފަރާތުން ހެންވޭރު އުތުރު ދާއިރާގެ ޕީއެންސީ މެންބަރު އަހްމަދު އައިފާން ހުށަހެޅުއްވި މި ބިލުގެ ފުރަތަމަ ކިޔުން އިއްވީ މިދިޔަ ބުދަ ދުވަހުގެ ޖަލްސާގަ އެވެ. މިއަދުގެ ޖަލްސާގައި މި ބިލުގެ ބަހުސް ފެށި އެވެ.

ތަފްސީލު - ބިލުގެ ބަހުސް ނިންމައި ބަލައިގަތުމަށް ފެނޭތޯ ވޯޓަށް އެހުމުން:

ވޯޓުގައި ބައިވެރިވެވަޑައިގެންނެވި 77 މެންބަރުންގެ ތެރެއިން 76 މެންބަރުންގެ އަގުލަބިއްޔަތުން އެ ބިލު ބަލައިގަތް
އޭގެ ތެރޭގައި އިދިކޮޅު އެމްޑީޕީގެ މެންބަރުން ވެސް ހިމެނިވަޑައިގަންނަވާ
ވޯޓުގައި ބައިވެރިވެވަޑައިގެން ވަކި ކޮޅަކަށް ވޯޓު ނުދެއްވި ހަމައެކަނި މެންބަރަކީ ހުޅުމާލޭ ދެކުނު ދާއިރާގެ އެމްޑީޕީ މެންބަރު ޑރ. އަހްމަދު ޝަމްހީދު

އެއާ އެކު، އެ ބިލު ދިރާސާ ކުރުމަށް މަޖިލީހުގެ އިޖުތިމާއީ ކޮމިޓީއަށް ވަނީ ފޮނުވާފަ އެވެ.

ސަރުކާރުން ނިންމާފައި ވަނީ އަންނަ މަހުގެ 15 އިން ފެށިގެން ވޭޕް ރާއްޖެ އެތެރެ ކުރުން މަނާ ކުރުމަށެވެ. އަދި އަންނަ 15 ޑިސެމްބަރުން ފެށިގެން ވޭޕް ބޭނުން ކުރުމާއި ވިއްކުން މަނާ ކުރުމަށެވެ.

ގާނޫނަށް ހުށަހެޅި އިސްލާހުގައި އެ ތާރީހުގެ ފަހުން އެފަަދަ ކަމެއް ކޮށްފި ނަމަ ބޮޑެތި އަދަދުން ޖޫރިމަނާ ކުރުމަށް ހިމަނާފައިވެ އެވެ. އެގޮތުން:

ވޭޕް ކުރުމަށް ބޭނުން ކުރާ އާލާތްތަކާއި އެ އެއްޗެއްސަށް ބޭނުން ކުރުމަށް ތައްޔާރުކޮށްފައިވާ އުފެއްދުންތައް އެތެރެކޮށްފި ނަމަ، 50،000ރ. އިން ޖޫރިމަނާ ކުރެވޭނެ؛ އަދި އެތެރެކުރި ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕް ކުރުމަށް ބޭނުން ކުރާ އާލާތަކަށް 10،000ރ.ގެ މަގުން ޖޫރިމަނާ ކުރެވޭނެ
އެފަދަ އާލާތެއް ނުވަތަ އުފެއްދުމެއް ވިއްކައިފި ނަމަ، 20،000ރ. އިން ޖޫރިމަނާ ކުރެވޭނެ؛ އަދި ވިއްކި ކޮންމެ އެއްޗަކަށް 10،000ރ.ގެ މަގުން ޖޫރިމަނާ ކުރެވޭނެ
އެފަދަ އާލާތެއް ނުވަތަ އުފެއްދުމެއް ހިލޭ ބަހައިފި ނަމަ، 10،000ރ. އިން ޖޫރިމަނާ ކުރެވޭނެ
އެފަދަ އާލާތެއް ނުވަތަ އުފެއްދުމެއް ވިއްކީ ނުވަތަ ހިލޭ ބެހީ ކުޑަކުއްޖަކަށް ނަމަ، އިތުރު 50،000ރ. އިން ޖޫރިމަނާ ކުރެވޭނެ
އެފަދަ އުފެއްދުމެއް ބޭނުންކޮށްފި ނަމަ، 5،000ރ. އިން ޖޫރިމަނާ ކުރެވޭނެ

ސަރުކާރުން ވަނީ، ދުންފަތުންގެ ބާވަތެއް ވިއްކޭނެ އެންމެ ހަގު އުމުރަކީ 18 އަހަރުގެ ބަދަލުގައި 21އަށް ހެދުމަށް ވެސް ނިންމާފަ އެވެ. މި އިސްލާހުގައިވާ ގޮތުން، އެ ނިންމުން ތަންފީޒު ކުރާނީ އަންނަ މަހުގެ 15 އިން ފެށިގެންނެވެ.

މީގެ އިތުރުން، މަނާ ތަންތަނުގައި ދުންފަތުގެ އިސްތިއުމާލުކޮށްފި ނަމަ، ހަރުކަށި ފިޔަވަޅު އެޅުމަށް ވެސް އިސްލާހުގައި ހިމަނާފައިވެ އެވެ.

މި ބިލާ ގުޅޭ ބައެއް އެހެން ހަބަރުތައް

އެނގުން މުހިންމު - އޮގަސްޓު 2010ގައި ވުޖޫދުވެ، އަމަލު ކުރަން ފެށި ދުންފަތް ކޮންޓްރޯލް ކުުރުމުގެ ގާނޫނަށް އަދި މިހާތަނަށް އެއްވެސް އިސްލާހެއް ގެނެސްފައި ނުވެ އެވެ. މި ބިލު މަޖިލީހުން ފާސްވެ ރައީސް ތަސްދީގުކޮށްފިނަމަ، މިއީ މިވީ14 އަހަރު ތެރޭ މި ގާނޫނު އިސްލާހު ކުރާ ފުރަތަމަ ފަހަރަށް ވާނެ އެވެ.