13 ޖޫން 2024: ވެލާނާގޭގައިވާ އެޓާނީ ޖެނެރަލް އޮފީހުގައި އެޓާނީ ޖެނަރަލް އަހުމަދު އުޝާމް ބޭއްވި މީޑިއާ ބައްދަލުވުން. (ދައުރު ފޮޓޯ/ އަބްދުﷲ އަނޫފް ޖުނައިދް)
ވޭޕް މަނާކުރާ ފަހުން އެ ތަކެތި ވިއްކާ މީހުން ޖޫރިމަނާ ކުރަން ހުށަހަޅަނީ
ރާއްޖެއަށް ވޭޕްކުރަން ބޭނުންކުރާ ތަކެތި އެތެރެކުރުމާއި އެތަކެތި ބޭނުންކުރުން މަނާކުރާ ފަހުން އެ ތަކެތި ގެނެސް ވިއްކާ މީހުނަށް ޖޫރިމަނާގެ އަދަބެއް ދެވޭ ގޮތަށް ގާނޫނު ބަދަލުކުރަން ބިލު ޑްރާފްޓްކޮށްފި އެވެ.
ވީކިިހިނެއް؟ - ވޭޕްކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން 15 ނޮވެމްބަރުން ފެށިގެން މަނާކުރަން ނިންމި ކަން ރައީސް މުހައްމަދު މުއިއްޒު އިއްޔެ އިއުލާންކުރެއްވި އެވެ. އެ ކަން ކުރަން ގާނޫނަށް ބަދަލު ގެންނަން މި ހަފުތާގައި ހުށަހަޅުއްވާނެ ކަމަށް ބަންޑާރަ ނައިބު އަހުމަދު އުޝާމް ވިދާޅުވި އެވެ.
ބަންޑާރަ ނައިބުގެ އޮފީހުން ތައްޔާރުކުރި ބިލުގެ ފުރަތަމަ ޑްރާފްޓް ވަނީ 'ދައުރު'އަށް ލިބިފައެވެ. އެއީ ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ގެންނަ ބިލެކެވެ.
ތަފްސީލް - ޑްރާފްޓް ބިލުގައި، އެ ތަކެތި ވިއްކުމުގެ އިތުރުން ބޭނުންކުރާ މީހުނާއި ހިލޭ ބަހާ މީހުން އަދި ކުޑަކުދިންނަށް އެ ތަކެތި ދޭ މީހުން ވެސް ޖޫރިމަނާ ކުރަން ހިމަނާފައިވެ އެވެ. އެ ގޮތުން:
-
ވޭޕް ބޭނުންކޮށްފި މީހަކު 5,000ރ. އިން ޖޫރިމަނާ ކުރެވޭނެ.
-
ވޭޕް ވިއްކައިފި މީހަކު ނުވަތަ ހިލޭ ބަހައިފި މީހަކު، އެ ވިއްކި ނުވަތަ ހިލޭ ބެހި ކޮންމެ ސްޓިކެއް ނުވަތަ އައިޓަމަކަށް 20,000ރ. އިިން ޖޫރިމަނާ ކުރެވޭނެ.
-
ވޭޕް އަދި ވޭޕްކުރުމަށް ބޭނުންކުރާ އާލާތްތަކާއި އޭގެ ބައިބައި ކުޑަކުދިންނަށް ވިއްކި ނުވަތަ ދިން މީހަކު 50,000ރ. އިން ޖޫރިމަނާ ކުރެވޭނެ.
އެނގިފައިވާ ގޮތުގައި ބަންޑާރަ ނައިބު އޮފީހުން މިދިޔަ ހަފުތާ ވެސް ބިލުގެ ފުރަތަމަ ޑްރާފްޓާ ގުޅޭ ގޮތުން އެހެން މިނިސްޓްރީތަކާ ދިޔައީ މަޝްވަރާކުރަމުންނެވެ. އެހެންކަމުން ބިލު މަޖިލީހަށް ހުށަހަޅާއިރު ޑްރާފްޓް ބިލުގައި ހުރި އަދަދުތަކަށް ބަދަލު އަތުވެދާނެ އެވެ.
އެނގުން މުހިންމު - ބަންޑާރަ ނައިބު އުޝާމް ވިދާޅުވެފައިވާ ގޮތުގައި ދުންފަތް ކޮންޓްރޯލް ކުރުމާ ބެހޭ ގާނޫނުގެ އިތުރުން އެކްސްޕޯޓް އިމްޕޯޓް ގާނޫނު ބަދަލުކުރަން ހުށަހަޅުއްވާނެ އެވެ. މި ބިލުތައް މި ހަފުތާ މަޖިލީހަށް ފޮނުއްވާނެ ކަމަށް އުޝާމް ވިދާޅުވެފައިވެ އެވެ.
ރައީސް މުއިއްޒު އިއްޔެ އިއުލާން ކުރެއްވި ގޮތުގައި:
-
ވޭޕްކުރުމަށް ބޭނުންކުރާ ތަކެއްޗާއި އެ ތަކެތީގެ ވަކިވަކި ބައިތައް ރާއްޖެއަށް އެތެރުކުރުން އަންނަ 15 ނޮވެމްބަރުން ފެށިގެން މަނާކުރާނެ
-
ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިޝްތިހާރު ކުރުމާއި ހިލޭ ބެހުން އަންނަ 15 ޑިސެމްބަރުން ފެށިގެން މަނާކުރާނެ