ރޭސިން ސަރަހައްދުގެ ހުއްދަ ބާތިލުކޮށް، ގިނަ ފިޔަވަޅުތަކެއް އެޅުމަށް ސަރުކާރުން ނިންމައިފި

ހުޅުމާލޭގައި ރޭސިން އަދި ޑްރިފްޓިންނަށް ހާއްސަކޮށްފައިވާ ސަރަހައްދު ބޭނުންކުރުމަށް ދީފައި އޮތް ހުއްދަ ބާތިލުކޮށް، އެކްސިޑެންޓުތައް ހުއްޓުވުމަށް ގިނަ ފިޔަވަޅުތަކެއް އެޅުމަށް ސަރުކާރުން މިރޭ ނިންމައިފި އެވެ.

ވީ ކިހިނެއް؟ - މިއަދު ހުޅުމާލޭގައި ދުއްވި ސްޕޯޓްސް ކާރަކުން ޖެހި މީހަކު މަރުވުމާ ގުޅިގެން، އެކްސިޑެންޓުތައް މަދު ކުރުމަށްޓަކައި ހާއްސަ ފިޔަވަޅުތަކެއް އެޅުމަށް ނިންމާފައިވާކަން ރައީސް މުހައްމަދު މުއިއްޒު ވަނީ ހާމަކުރައްވައިފަ އެވެ. އަދި އެއަށް ފަހު އެމަނިކުފާނު ވަނީ އެ ފިޔަވަޅުތައް އިއުލާންކުރައްވައިފަ އެވެ.

ތަފްސީލް - އެކްސް ޕޯސްޓެއްގައި ރައީސް ވިދާޅުވިގޮތުގައި، އަޅަން ނިންމި ފިޔަވަޅުތަކުގެ ތެރޭގައި ހިމެނެނީ:

އިތުރު ތަފްސީލު އަންނަނީ...

ރައީސް ވިދާޅުވީ އެ ފިޔަވަޅުތައް އެޅުމަށް މިހާރު އިދާރާތަކަށް އަންގާފައިވާ ކަމަށެވެ.

އެ ފިޔަވަޅުތައް އަޅަނީ، އެމަނިކުފާނު ވިދާޅުވިގޮތުގައި، ގަވާއިދާ ހިލާފަށް ބާރު ސްޕީޑްގައި ދުއްވާ އުޅަނދުފަހަރު ކޮންޓްރޯލް ކުރުމަށާއި އުޅަނދަށް ބަދަލު ގެނެސްގެން ނުވަތަ އުޅަނދުގެ ބާވަތުން އަޑުގަދަ އުޅަނދުތައް ބޭނުންކުރުން ކޮންޓްރޯލްކޮށް، ރައްޔިތުން ދިރިއުޅޭ ސަރަހައްދުތައް ރައްކާތެރިކުރުމުގެ ބޭނުމުގަ އެވެ.

"މި ފިޔަވަޅުތައް އެޅެމުންދާ ގޮތާއި އޭގެ ނަތީޖާ ރަނގަޅަށް މޮނިޓާ ކުރެވޭނެ!" ރައީސް ވިދާޅުވި އެވެ.

އެނގުން މުހިއްމު - ހުޅުމާލޭ ސެންޓްރަލް ޕާކް ކައިރިން، އުރީދޫ އޮފީސް އިމާރާތް ކުރިމަތީގައި ރޭ ދަންވަރު ސްޕޯޓްސް ކާރަކުން ޖެހި، ހޮސްޕިޓަލުގައި ފަރުވާ ދެމުން ދަނިކޮށް މަރުވެފައިވަނީ އުމުރުން 23 އަހަރުގެ ހަސަން ސަމާހު އެވެ. 

މި އެކްސިޑެންޓާ ގުޅިގެން، ކާރު ދުއްވަން އިން މުހައްމަދު ވިސާމް ސިދުގީ ވަނީ ހައްޔަރުކޮށް، ޝަރީއަތް ނިމެންދެން ބަންދުކޮށްފަ އެވެ.

ފާހަގަކޮށްލެވޭ - ފުލުހުން ބުނެފައިވާ ގޮތުގައި ވިސާމް އަތުގައި ކާރު ދުއްވުމުގެ ލައިސަންސެއް ނޯވެ އެވެ.

އެކްސިޑެންޓުގައި ބޮލާއި މޫނުމައްޗަށް ބޮޑެތި އަނިޔާތަކެއް ލިބުނު ސަމާހު މަރުވީ ހުޅުމާލޭ ހޮސްޕިޓަލަށް ގެންދިޔަތާ ކުޑަ އިރުކޮޅެއްގެ ތެރޭގަ  އެވެ.