ސްޕޯޓްސް ކާރަކުން ޖެހި، މެރެތަންއަށް ދިޔަ ޒުވާނަކު މަރުވެއްޖެ

މިއަދު ހުޅުމާލޭގައި ކުރިއަށްދާ މެރެތަންގައި ދުވުމަށް އެ ސަރަހައްދަށް ދިޔަ ޒުވާނެއްގެ ސައިކަލުގައި، ބާރު ސްޕީޑެއްގައި ދުއްވި ސްޕޯޓްސް ކާރަކުން ޖެހި ހިނގި ނުރައްކާތެރި އެކްސިޑެންޓެއްގައި ޒުވާނަކު މަރުވެއްޖެ އެވެ.

ވީ ކިހިނެއް؟ - ހުޅުމާލޭ ސެންޓްރަލް ޕާކް ކައިރިން، އުރީދޫ އޮފީސް އިމާރާތް ކުރިމަތީގައި އެ އެކްސިޑެންޓު ހިނގާފައިވަނީ ފަތިހު 4 ޖަހާކަންހާއިރު އެވެ.

ތަފްސީލް - އެ އެކްސިޑެންޓުގައި ޒުވާނާގެ ބޮލާއި މޫނު މައްޗަށް ވެސް ބޮޑެތި އަނިޔާތަކެއް ލިބުނު އިރު ހުޅުމާލޭ ހޮސްޕިޓަލަށް ގެންދިޔަތާ ކުޑަ އިރުކޮޅެއްގެ ތެރޭގައި އެ ޒުވާނާ މަރުވެފައިވާ ކަމަށް އެނގިފައިވެ އެވެ.

އެކްސިޑެންޓުގައި މަރުވީ ކަރެކްޝަނަލް ސާވިސްގައި މަސައްކަތް ކުރާ ޖަލު ބަލަހައްޓާ ޒުވާނެއް ކަމަށްވާ ހަސަން ސަމާހް، 23، އެވެ.

އެކްސިޑެންޓުވި ކާރު ދުއްވަން އިން މީހާ ފުލުހުން ވަނީ ހައްޔަރުކޮށްފަ އެވެ. އެއީ އުޅަނދު ދުއްވުމުގެ ލައިސަންސް ނެތް މީހެއް ކަމަށް ފުލުހުން ބުނެ އެވެ.

އެނގުން މުހިއްމު - އިއްޔެ ރޭ މާލޭގައި ހިނގި ނުރައްކާތެރި އެކްސިޑެންޓެއްގައި ވެސް ޒުވާނަކު ވަރަށް ބޮޑަށް ޒަހަމްވެ، ވެންޓިލޭޓަރުގައި ދަނީ ފަރުވާދެމުންނެވެ.