ސަރުކާރުން އިންޑިއާއާ ގުޅުން ބަދަހިކުރާތީ އެމްޑީޕީން މަލާމާތްކުރާތީ ނަޝީދު ކަންބޮޑުވެއްޖެ

ރައީސް މުހައްމަދު މުއިއްޒުގެ ސަރުކާރުގައި ރާއްޖެ އާއި އިންޑިއާގެ ގުޅުން ގޯސްވުމަށް ފަހު އަލުން އެ ގުޅުން ރަނގަޅު ކުރަން ސަރުކާރުން ކުރަމުންގެންދާ މަސައްކަތްތަކަށް އިދިކޮޅު އެމްޑީޕީން މަރުހަބާ ކިޔުމުގެ ބަދަލުގައި މާޒީ ހަނދާންކޮށްދޭތީ ކުރީގެ ރައީސް މުހައްމަދު ނަޝީދު މިއަދު ކަންބޮޑުވުން ފާޅުކުރައްވައިފި އެވެ.

ވީ ކިހިނެއް؟ - މިވަގުތު ސިޔާސީ ކަންކަމާ ދުރުގައި ހުންނެވި ނަޝީދު އެ މަނިކުފާނުގެ ކުރީގެ ޕާޓީީއަށް ރައްދު ދެއްވައި ވާހަކަ ދެއްކެވީ، މިދިޔަ ހަފްތާގައި އެމްޑީޕީން ބޭއްވި ގައުމީ މަޖިލީހުގެ ބައްދަލުވުމުގައި އެ ޕާޓީގެ ރައީސް އަދި ކުރީގެ ފޮރިން މިނިސްޓަރު އަބްދުﷲ ޝާހިދު ދެއްކެވި ވާހަކައަކަށް މިއަދު 'އެކްސް'ގައި ކުރެއްވި ޕޯސްޓެއްގަ އެވެ. އެގޮތުން، ޝާހިދުގެ ވާހަކައިގައި އޭނާ ވިދާޅުވީ:

ޝާހިދުގެ އެ ވާހަކަތައް އެމްޑީޕީގެ ކުރީގެ ރައީސް ނަޝީދަކަށް ކަމަކު ނުދިޔަ އެވެ. އެ ވާހަކަތައް އެ މަނިކުފާނު ސިފަ ކުރެއްވީ "ސިޔާސީ ޕޮއިންޓް ހޯދުމަށް" ދެއްކި ވާހަކައެއްގެ ގޮތުގަ އެވެ.

ބުނީ ކީކޭ؟ - "ބަދަހި އިންޑިއާ-ރާއްޖެ ގުޅުމަށް އެދޭ ފަރާތްތަކުން ސަރުކާރުގެ ސިޔާސަތަށް ގެނައި ބަދަލަށް މަރުހަބާ ނުކިޔައި ކުރިން ކަންވެފައި އޮތް ގޮތް ފާހަގަކޮށް، ސަރުކާރަށް މަލާމާތް ކުރާ ނަމަ އެކަމުން ދޭހަ ވަނީ، އިންޑިއާ-ރާއްޖެ ގުޅުމަށް ނޭދޭކަން. ބޭނުން ވަނީ ސިޔާސީ ޕޮއިންޓް ހޯދަން. އުސޫލުގައި ނުހިފެހެއްޓޭކަން،" އިންޑިއާއާ އެކު އަބަދުވެސް ގާތް ގުޅުމެއް ބާއްވަވާ ނަޝީދު ވިދާޅުވި އެވެ. 

ގުޅުން ހުރި - އެމްޑީޕީއަށް ވެރިކަން ގެއްލުމުގެ އެއް ސަބަބަކަށްވި ނަޝީދު، އެ ޕާޓީއަށް ރައްދު ދެއްވައި މިއަދު ވާހަކަ ދެއްކެވިއިރު، އެ މަނިކުފާނު އުފެއްދެވި ޑިމޮކްރެޓްސް ޕާޓީން މިފަހުން ވަނީ ރައީސް މުއިއްޒުއާ ބައްދަލުކޮށް، ސަރުކާރަށް އެއްބާރުލުން ދިނުމާ ގުޅޭ މަޝްވަރާތަކެއް ކޮށްފަ އެވެ. 

ފަސް މަންޒަރު - 'އިންޑިއާ އައުޓް'ގެ ނަމުގައި ކެމްޕެއިނެއް ކުރުމަށް ފަހު ވެރިކަމަށް އައި މި ސަރުކާރަކީ 'ޕްރޯ ޗައިނާ' ނުވަތަ ޗައިނާއާ ގާތް ސަރުކާރަކަށް ވާނެ ކަމަށް، ރައީސް މުއިއްޒު ރިޔާސީ އިންތިހާބު ކާމިޔާބު ކުރެއްވުމާ އެކު ބައިނަލްއަގުވާމީ މީޑިއާތަކުން އޭރު ރިޕޯޓު ކުރި އެވެ. ނަމަވެސް، ރައީސް މުއިއްޒު ވިދާޅުވެފައިވާ ގޮތުގައި، މި ސަރުކާރުގެ ސިޔާސަތަކީ 'ޕްރޯ މޯލްޑިވްސް' ސިޔާސަތަކެވެ.

ރާއްޖެ އާއި އިންޑިއާގެ ގުޅުން ގޯސްވި ސަބަބުތަކުގެ ތެރޭގައި:

އެ ކެމްޕެއިންގެ ސަބަބުން އިންޑިއާއިން ރާއްޖެ އަންނަ ފަތުވެރިންގެ އަދަދު ވެސް ބޮޑު ތަނުން މަދު ވެގެން ދިޔަ އެވެ. އެހެންވެ، ޓޫރިޒަމް މިނިސްޓްރީ އާއި އެމްއެމްޕީއާރުސީ ގުޅިގެން 'ވެލްކަމް އިންޑިއާ'ގެ ނަމުގައި މިދިޔަ ހަފްތާގައި އިންޑިއާގެ ތިން ސިޓީއެއްގައި ރާއްޖޭގެ ޓޫރިޒަމް އިޝްތިހާރު ކުރުމުގެ ހަރަކާތެއް ބާއްވާފައިވެ އެވެ.

އެނގުން މުހިންމު - ސަރުކާރުން އިންޑިއާ-ރާއްޖެ ގުޅުން ރަނގަޅު ކުރުމުގެ މަސައްކަތް ކުރަމުން އަންނައިރު، އިންޑިއާގެ ހާރިޖީ ވަޒީރު އެސް ޖައިޝަންކަރު ވަނީ އިއްޔެ ރާއްޖެ ވަޑައިގެންފަ އެވެ. އަދި މިއަދު ޖައިޝަންކަރު ވަނީ ރައީސް މުއިއްޒުއާ ވެސް ބައްދަލުކުރައްވާފަ އެވެ.