އިންޑިއާ އަކީ ރާއްޖޭގެ އެންމެ ގާތް އެއް އެކުވެރިޔާ: ރައީސް

އިންޑިއާ އަކީ އަބަދުވެސް ރާއްޖޭގެ އެންމެ ގާތް އެއް އެކުވެރިޔާ ކަމަށާއި، ކުރިމަގުގައި ދެ ގައުމުގެ ގުޅުން އިތުރަށް ވަރުގަދަކޮށް ހަރުދަނާކުރުމަށް މަސައްކަތް ކުރައްވާނެ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.

ވީ ކިހިނެއް؟ - ރައީސް މިހެން ވިދާޅުވީ އިންޑިއާގެ އެގްޒިމް ބޭންކުގެ ކްރެޑިޓް ފެސިލިޓީގެ ދަށުން ރާއްޖޭގެ 28 ރަށެއްގައި ފެނާއި ނަރުދަމާ ނިޒާމުގެ މަސައްކަތް ނިންމާ، އިންޑިއާ ސަރުކާރުން އެ މަޝްރޫއުތައް ރާއްޖެއާ ހަވާލުކުރަން މިއަދު ބޭއްވި ހާއްސަ ރަސްމިއްޔާތުގައި ވާހަކަފުޅުދައްކަވަމުންނެވެ.

އެ ރަސްމިއްޔާތުގައި، ރައީސް މުއިއްޒު ވެރިކަމާ ހަވާލުވެވަޑައިގެންނެވި ފަހުން ފުރަތަމަ ފަހަރަށް ރާއްޖެ ވަޑައިގެންނެވި އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރު ވެސް ބައިވެރިވެވަޑައިގެންނެވި އެވެ.

ބުނީ ކީކޭ؟ - ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ މިއަދު ރާއްޖެ ސަރުކާރާ ހަވާލުކުރި މަޝްރޫއުތަކަކީ ދިވެހިންގެ ދިރިއުޅުމުގެ ފެންވަރު ރަނގަޅުކޮށްދޭން އިންޑިއާ ސަރުކާރުން ދިން އެހީއަކަށް ވާތީ އިންޑިއާގެ ބޮޑުވަޒީރު ނަރެންދުރަ މޯދީ އާއި އިންޑިއާ ސަރުކާރަށާއި އެ ގައުމުގެ ރައްޔިތުންނަށް ޝުކުރު އަދާކުރައްވާ ކަމަށެވެ. 

އޭގެ އިތުރުން އެމަނިކުފާނު ފާހަގަކުރެއްވީ:

"އިންޑިއާ އަކީ އަބަދުވެސް އަޅުގަނޑުމެންގެ އެންމެ ގާތް އެއް އެކުވެރިޔާ އަދި އަގުނުކުރެވޭ ފަދަ އެއް ގައުމު،" ރާއްޖެއިން އެހީތެރިކަން ބޭނުންވާ ކޮންމެ ހާލަތެއްގައި އިންޑިއާ އިން އެ އެހީތެރިކަން ފޯރުކޮށްދީފައިވާ ކަން ފާހަގަކުރައްވާ ރައީސް ވިދާޅުވި އެވެ.

އިންޑިއާއާ އެކު އޮތް ޒަމާންވީ ގާތް ގުޅުން ރާއްޖޭގެ ރައްޔިތުން ވަރަށް ބޮޑަށް ބަލައިގަންނަ ކަމަށް ވިދާޅުވެ، ރާއްޖެ އާއި އިންޑިއާއާ ދެމެދު އޮތް އެކުވެރިކަން އިތުރަށް ވަރުގަދަކުރުމަށް އެމަނިކުފާނުގެ ސަރުކާރުން ކުރެވެން އޮތް ހުރިހާ މަސައްކަތެއް ކުރައްވާނެ ކަމަށް ވެސް ވިދާޅުވި އެވެ.

ދެ ގައުމުގެ ރަހުމަތްތެރިކަމަށް އިންޑިއާ އިން ކުރަމުން އަންނަ މަސައްކަތްތަކަށް ވެސް ރައީސް ފާހަގަކުރެއްވި އެވެ.

އެނގުން މުހިންމު - 'އިންޑިއާ އައުޓް' ނަމުގައި ކެމްޕެއިނެއް ކުރުމުގެ ތެރެއިން މި ސަރުކާރު ވެރިކަމަށް އައުމާ އެކު، ދެ ގައުމުގެ ގުޅުމަށް އަސަރުކުރި އެވެ. އަދި މި ވެރިކަމުގައި ރާއްޖެއިން ޗައިނާއާ މާ ގާތް ގުޅުމެއް ބާއްވާ ކަމަށް ތުހުމަތުކުރުމާއި ރާއްޖޭގެ ތިން ޑެޕިއުޓީ މިނިސްޓަރަކު އިންޑިއާ އާއި އެ ގައުމުގެ ބޮޑުވަޒީރު މޯދީއަށް ނިސްބަތްކޮށް ބަދުބަސް ބުނި މައްސަލައިގައި އެ ގުޅުން ހައްތަހާ ހީނަރުވި އެވެ.

އެކަމަކު  ދެ ގައުމުން ވެސް މިހާރު އަންނަނީ އަލުން ގުޅުން ބަދަހި ކުރުމަށް މަސައްކަތް ކުރަމުންނެވެ.