އައްޑޫ ފެނުގެ މައްސަލަ ހައްލުނުވެ 1 މަސް ވުމަކީ ނުކުޅެދުމެއް: މޭޔަރު

އައްޑޫގެ އާރުއޯ ޕްލާންޓުގެ ޕަމްޕަކަށް މައްސަލައެއް ދިމާވެ، ފެނުގެ ހިދުމަތަށް ބުރޫ އެރީ މިދިޔަ މާޗުގެ ފަހުކޮޅުގަ އެވެ. މައްސަލަ ދިގުލައިގެން ގޮސް، މެއި މަސް ފެށުނުއިރު އަދިވެސް ދާއިމީ ހައްލެއް ނުލިބެ އެވެ.

"އައްޑޫ ސިޓީގެ ގުޅިފައިވާ ރަށްތަކަށް ފެން ސަޕްލައި ކޮށްދިނުމުގައި ދިމާވެފައިވާ މައްސަލައަށް ހައްލެއް ނުލިބި މަހެއްހާ ދުވަހާ ގާތްވެފައިވާއިރު، މިކަމުގައި ރައްޔިތުންގެ ޝަކުވާ ދަނީ އިތުރުވަމުން،" އައްޑޫ މޭޔަރު އަލީ ނިޒާރު 'އެކްސް'ގައި ކުރެއްވި ޕޯސްޓެއްގައި ވިދާޅުވި އެވެ.

"އަދި މިކަމަށް ހައްލު ހޯދަން މިހާ ދުވަސް ނަގަން ޖެހުމަކީ ނުކުޅެދުމެއް. މި ތަކުލީފަށް އަވަސް ހައްލެއް ހޯއްދަވައި ދެއްވުމަށް ފެނަކަ މެނޭޖްމަންޓަށް ދަންނަވަން."

މި މައްސަލައިގެ ތަފްސީލު 'ދައުރު'އާ ހިއްސާކުރައްވަމުން އައްޑޫ ސިޓީ ކައުންސިލްގެ ހިތަދޫ ކޮރޮވައި ދާއިރާގެ މެމްބަރު އިބްރާހިމް ޝިނާޒު ވިދާޅުވީ މައްސަލަ ހައްލުނުވެ އޮތީ، އޭނާއަށް އެނގިފައިވާ ގޮތުގައި އަދިވެސް ޕަމްޕެއް ނުލިބިގެންނެވެ.

"އަޅުގަނޑު އެނގިފައި އޮތީ ދެ ޕަމްޕުކަން ހުންނަނީ. އެއް ޕަމްޕު ހަލާކުވީމަ ގުޅިފައިވާ ރަށްތަކަށް ބޭނުންވާ ފެނުގެ ދެބައިކުޅަ އެއްބައި މިހާރު އުފެއްދެނީ،" ޝިނާޒު ވިދާޅުވި އެވެ.

ޝިނާޒު ވިދާޅުވި ގޮތުގައި:

ގުޅިފައިވާ ރަށްތަކުގެ %90 ގޭބިސީތަކަށް ވަޅުފެން ލިބުނު ނަމަވެސް ބައެއް ސަރަހައްދުތަކުގައި ވަޅު ފެނަކީ އެއްގޮތަކަށް ވެސް ބޭނުންކުރަން ކަމުދާ ވަރުގެ ފެނެއް ނޫނެވެ.

"ވަރަށް އުނދަގުލުގައި އާންމުން އުޅެނީ. ފެން ލިބެނީ ރެންޑަމްކޮށް. ގަޑިއިރަކަށް ލިބިފައި މެދުކެނޑިފައި، އަނެއްކާ ހަ ގަޑިއިރު ފަހުން ލިބިދާނެ. ދެން މިނެރަލް ވޯޓާއަށް ބަރޯސާ ވާން ޖެހިފައި އޮތީ،" ޝިނާޒު ވިދާޅުވި އެވެ.

ޕަމްޕެއް ނުލިބިގެން މައްސަލަ ހައްލުނުވެ އޮތްއިރު، މިކަމުގެ ހުރިހާ ތަފްސީލެއް ޝިނާޒަށް ވެސް ލިބިފައިނުވެ އެވެ.

"އަޅުގަނޑަށް އެނގިފައި އޮތީ ފެނަކައިން އާ ޕަމްޕު ގަންނަން ފައިސާ ދައްކާތާ 6 ހަފުތާ ފަހުންނޭ ޕަމްޕު ލިބޭނީ. ފައިސާ ދެއްކި ކަމެއް ނުދައްކާ ކަމެއް ނޭނގޭ،" އޭނާ ވިދާޅުވި އެވެ.

ފެނަކީ އަސާސީ ހިދުމަތަކަށް ވުމާއި އެ ހިދުމަތް މެދުކެނޑުމުން އާންމުންނަށް ބޮޑު ތަކުލީފަކަށް ވެފައި އޮތުމާ އެކު ޝިނާޒް ވެސް ގޮވާލެއްވީ މައްސަލަ ވީހާވެސް އަވަހަށް ހައްލުކޮށްދިނުމަށެވެ.

ޑިސެމްބަރު 2023ގައި ވެސް އައްޑޫ ގުޅިފައިވާ ރަށްތަކުން ފެނުގެ ހިދުމަތް މެދުކެނޑުނެވެ. އެ ފަހަރު ވަގުތީ ހައްލެއް ހޯދައިދިނުމަށް ފަހު ފެނަކައިން ބުނީ ފެނުގެ ހިދުމަތް ކެނޑެން ދިމާވި މައިގަނޑު ސަބަބަކީ އެ ކުންފުނިން ކުރަން ޖެހޭ ބައެއް މަސައްކަތްތައް އެންމެ އެދެވޭ ގޮތެއްގައި ތާވަލާއި އެއްގޮތަށް ނުކޮށް ހުރުމުން ކަމަށެވެ.

ފެނަކައިން އޭރު ފާހަގަކުރި ކަންކަމަކީ:

ޝިނާޒު ވިދާޅުވީ މެއިންޓަނެންސް މަސައްކަތަކީ މީގެ ކުރިން އައި އެއްވެސް ސަރުކާރަކުން ސަމާލުކަން ދިން ކަމެއް ނޫން ކަމަށެވެ. އެހެން ނަމަވެސް އޭނާ ވިދާޅުވީ "ކުރީ ސަރުކާރޭ ކިޔާފައި ތިބުމަކީ ދައްކާ ބަހާނެއް" ކަމަށެވެ.

"ކަމެއް ދިމާވީމަ ކުރީ ސަރުކާރޭ ނުކިޔާ ހައްލުކުރަންވީ ނޫންތޯ؟ ރައްޔިތުންނަށް އެހާ އުނދަގޫވާ ކަމެއް މިއީ،" އޭނާ ވިދާޅުވި އެވެ.

"ކުރީގެ މެނޭޖްމަންޓޭ ބުނުމަކީ ބަހަނާއެއް. [ކުރީގެ] ކަންކަން ކަމުނުދިޔައިމަ ރައްޔިތުން އެކަން ބަދަލުކުރީ. މި ބޭފުޅުން ކަންކަން ކުރާނަމޭ ބުނީމަ ހަވާލުކުރި ޒިންމާއެއް އެއީ."

އައްޑޫ ފެނުގެ މައްސަލައަށް ހައްލެއް ލިބޭނީ ކިހާ ދުވަހެއްގެ ތެރޭގައި ކަމާއި އާ ޕަމްޕެއް ލިބުނުތޯ ބަލަން ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދަށް 'ދައުރު'އިން ގުޅި ނަމަވެސް، ފޯނަށް ޖަވާބު ނުދެއްވާތީ އެކަމުގެ ތަފްސީލެއް ނުލިބެ އެވެ. އެ ކުންފުނީގެ ޕީއާރު ޑިޕާޓްމަންޓުން ބުނީ އެކަމާ ގުޅޭ ތަފްސީލު ވަރަށް އަވަހަށް ހާމަކުރާނެ ކަމަށެވެ. އެހެން ނަމަވެސް މި ހަބަރު ޖެހުމާ ހަމައަށް އެފަދަ ތަފްސީލެއް ނުލިބެ އެވެ.

އައްޑޫ ފެނުގެ ނިޒާމު އަޕްގްރޭޑް ކުރުމަށްޓަކައި 14 އޭޕްރީލް 2024ގައި ސަރުކާރުގެ ފެން ކުންފުނި އެމްޑަބްލިއުއެސްސީއާ ވަނީ ހަވާލުކޮށްފަ އެވެ. އެއީ 282 މިލިއަން ރުފިޔާގެ އަގަކަށެވެ. އެ މަޝްރޫއު ނިންމަން ދީފައިވަނީ އެއް އަހަރުގެ މުއްދަތެކެވެ.

އެ މަޝްރޫއުގެ ދަށުން ހިތަދޫ، މަރަދޫ، މަރަދޫ ފޭދޫ އަދި ފޭދޫގައި؛

އެ މަޝްރޫއުއިން ދާއިމީ ހައްލެއް ލިބޭނެ ކަމަށް ޝިނާޒު ގަބޫލުކުރައްވަ އެވެ. އެހެން ނަމަވެސް އެ މަޝްރޫއުގެ އަމަލީ މަސައްކަތް އަދިވެސް ނުފަށައި އޮތްކަމަށް ވިދާޅުވެ، އެކަމާ މެދު ކަންބޮޑުވުން ފާޅުކުރައްވަމުން އޭނާ ވިދާޅުވި ގޮތުގައި "ކިތަންމެ ވަރަކަށް ވެސް އެއްބަސްވުމުގައި ސޮއިކުރެވިދާނެ" އެވެ.