އައްޑޫގެ ގުޅިފައިވާ ރަށްތަކުން އަނެއްކާވެސް ފެން ކެނޑިއްޖެ

އައްޑޫގެ ގުޅިފައިވާ ރަށްތަކުން އަނެއްކާވެސް ފެނުގެ ހިދުމަތް މެދުކެނޑިއްޖެ އެވެ.

ވީ ކިހިނެއް؟ - އައްޑޫ ސިޓީ ކައުންސިލްގެ ހިތަދޫ ކޮރޮވައި ދާއިރާގެ މެމްބަރު އިބްރާހިމް ޝިނާޒު ވިދާޅުވީ، އޭނާއަށް އެނގިވަޑއިގެންފައިވާ އޮތް ގޮތުން، ހިދުމަތް މެދުކެނޑުނީ މިއަދު ހަވީރުގެ ވަގުތެއްގައި ކަމަށެވެ.

ނަމަވެސް މިއަދު ހެނދުނު 11އިން ފެށިގެން ފެނުގެ ހިދުމަތް މެދުކެނޑިފައިވާ ކަމަށް ސޯޝަލް މީޑިއާގައި ވަނީ ހަބަރު ފަތުރައިފަ އެވެ.

ބުނީ ކީކޭ؟ - ފެނުގެ ހިދުމަތް މެދުކެނޑުނީ، ޝިނާޒް ވިދާޅުވި ގޮތުގައި، ޕަމްޕަކަށް ދިމާވި މައްސަލައަކުންނެވެ.

"އެ މައްސަލަ ހައްލުކޮށްގެން ހިދުމަތް ދޭން ފެށި ފަހުން އަނެއްކާވެސް ލީކުވާ މައްސަލައެއް އުޅޭކަމަށް މައުލޫމާތު ލިބެނީ،" އޭނާ ވިދާޅުވި އެވެ.

މިހާރު ބެލެވޭ ގޮތުގައި މިރޭ 11:30ހާއިރު ހިދުމަތް އަލުން ލިބޭނެ އެވެ.

މިކަމާ ގުޅޭ ގޮތުން ފެނަކައިގެ ބަހެއް ލިބޭ ގޮތެއް ނުވެ އެވެ.

އެނގުން މުހިންމު - މިދިޔަ ޑިސެމްބަރު މަހު ވެސް އައްޑޫގެ ގުޅިފައިވާ ރަށްތަކުން ފެނުގެ ހިދުމަތް ވަނީ މެދުކެނޑިފަ އެވެ. އެ ފަހަރު މައްސަލަ ހައްލުވީ 48 ގަޑިއިރަށް ވުރެ ގިނައިރު ވީ ފަހުންނެވެ.