މުދިމަށް ހަމަލާ ދޭ ތަން ފެންނަ ސީސީޓީވީ ފޫޓޭޖުގެ ސްކްރީން ޝޮޓެއް.
ދިޔަމިގިލީ މުދިމު ގަޔަށް ވަޅި ހެރި މައްސަލައިގައި ދައުވާކޮށްދޭން އެދި ޕީޖީއަށް ފޮނުވައިފި
ތ. ދިޔަމިގިލީ މަގުމަތީގައި އެ ރަށު މުދިމަށް ވަޅިން ހަމަލާ ދީގެން ހައްޔަރުކުރި އޭނާގެ ގާތް ރަހުމަތްތެރިޔާ، އެ ރަށު ހަސަން ސާމިދުގެ މައްޗަށް ދައުވާކޮށް ދޭން އެދި ފުލުހުން މިއަދު ޕްރޮސެކިއުޓާ ޖެނެރަލް (ޕީޖީ)ގެ އޮފީހަށް ފޮނުވައިފި އެވެ.
މައްސަލައިގެ ފެށުން - ދިޔަމިގިލީ މަސްޖިދުލް އަމާނާތުގެ ވަގުތީ މުދިމު، އަހްމަދު ރަޝީދު މުހައްމަދު، 55،އަށް ހަމަލާ ދިނީ މިދިޔަ މަހުގެ 13ގަ އެވެ. އެގޮތުން:
-
އޭނާގެ ހަށިގަނޑުގެ ހަތަރު ތަނަކަށް 13 ފަހަރު ވަޅި ހަރާފައިވޭ
-
ހަމަލާ ދިންތާ މާ ގިނައިރުތަކެއް ނުވަނީސް، ހަމަ އެ ދުވަހު ސާމިދު، 35، ހައްޔަރުކުރި އެވެ
-
ޝަރީއަތް ނިމެންދެން ސާމިދު ބަންދު ކުރުމަށް ތ. މަޑިފުށީ މެޖިސްޓްރޭޓް ކޯޓުން އަމުރުކުރި
ވީ ކިހިނެއް؟ - ފުލުހުންގެ ތަރުޖަމާނަކު މިއަދު 'ދައުރު'އަށް ވިދާޅުވީ އެ މައްސަލައިގެ ތަހުގީގު ނިންމައި ދައުވާކޮށްދޭން އެދި މިއަދު ޕީޖީއަށް ފޮނުވާފައިވާ ކަމަށެވެ. ނަމަވެސް، އިތުރު ތަފްސީލެއް ފުލުހުން ނުދެ އެވެ.
އެނގުން މުހުންމު - ރަޝީދުގެ އާއިލާއިން ކުރިން ބުނެފައިވާ ގޮތުގައި، އޭނާގެ ދެ އޮޕަރޭޝަނެއް ކުރި އެވެ. އަދި އޭނާގެ ހާލު ކުރިއަށް ވުރެ ރަނގަޅު ކަމަށާއި ނަމަވެސް ކަނާތު ފައި އެއްވެސް ވަރަކަށް މަސައްކަތް ނުކުރާއިރު ނަފްސާނީ ގޮތުން ވެސް ބޮޑެތި އަސަރުތަކެއް ކޮށްފައިވާ ކަމަށް އޭރު އާއިލާއިން ބުނެފައިވެ އެވެ.
ނަމަވެސް، އޭގެ ފަހުން އޭނާގެ ސިއްހީ ހާލަތާ ބެހޭ ތަފްސީލެއް ނުލިބެ އެވެ.
-
އިތުރަށް ކިޔާލަން - މުދިމަށް ނަފްސާނީ ގޮތުން އަސަރުކޮށްފައިވޭ؛ ރޭގަނޑު ނުނިދޭ: އާއިލާ
ފަސްމަންޒަރު - ގާތް ރަހުމަތްތެރިއްގެ ގޮތުގައި ހުރެ، ސާމިދު އޭނާގެ ގަޔަށް ވަޅި ހެރީ ކީއްވެ ކަމެއް އަދިވެސް ސާފެއް ނުވެ އެވެ. ރަޝީދުގެ ގަޔަށް ވަޅި ހެރި ތަން ފެންނަ ސީސީޓީވީ ވީޑިއޯ ފުޓޭޖެއް ވެސް ސޯޝަލް މިޑިއާގައި ވަނީ ދައުރުވެފަ އެވެ.
ގެއެއްގެ ބޭރުގައި ހަރުކޮށްފައި ހުރި ކެމެރާއަކުން ނަގާފައިވާ އެ ވިޑީއޯއިން ފެންނަ ގޮތުގައި:
-
މަގުމަތީގައި ދެ މީހުން ވާހަކަދައްކަން ތިބެފައި، ބައިސްކަލު މަތީގައި އިން ރަޝީދަށް ދިގު ވަޅިއަކުން ސާމިދު ހަމަލާ ދޭ
-
ފުރަތަމަ ހަމަލާ ދިނީ ފަސް ވަރަކަށް ފަހަރު
-
ދުރަށް ދިއުމަށް ފަހު، ދެ ވަނަ ފަހަރަށް އެނބުރި ގޮސް، އަނެއްކާ ވެސް ފަސް ވަރަކަށް ފަހަރު ވަޅި ހަރާ ތަން ފެނޭ
އިތުރަށް ކިޔާލަން -