ސުޕްރީމް ކޯޓުގެ ދެ ފަނޑިޔާރަކު ވަކިކުރާ ބިލު ރައީސް ތަސްދީގު ނުކުރައްވައި އަނބުރާ ފޮނުއްވާލައްވައިފި

ސުޕްރީމް ކޯޓުގެ ހަތް ފަނޑިޔާރުންގެ ތެރެއިން ދެ ފަނޑިޔާރަކު 12 ދުވަސް ތެރޭ ވަކިކުރާ ގޮތަށް ކޯޓުތަކާ ބެހޭ ގާނޫނަށް ގެނައި އިސްލާހު ރައީސް މުހައްމަދު މުއިއްޒު ތަސްދީގު ނުކުރައްވައި މިއަދު އަނބުރާ ފޮނުއްވާލައްވައިފި އެވެ.

ވީ ކިހިނެއް؟ - ރައްޔިތުންގެ މަޖިލީހުގެ މެންބަރަކު ޕާޓީން ވަކިވުމުން ނުވަތަ ކަނޑާލުމުން މެންބަރުކަމުގެ ގޮނޑި ގެއްލޭ ގޮތަށް ގާނޫނުއަސާސީއަށް ގެނައި ބަދަލު ބާތިލުކުރުމަށް ސުޕްރީމް ކޯޓަށް އޮތީ ހުށަހަޅާފަ އެވެ. އެ ކޯޓުގެ ހަތް ފަނޑިޔާރުންގެ ފުލް ބެންޗުން އެ މައްސަލަ ބަލަމުންދަނިކޮށް، އެ ކޯޓުގެ ދެ ފަނޑިޔާރަކު މަގާމުން ވަކިވާ ގޮތަށް ކޯޓުތަކާ ބެހޭ ގާނޫނަށް އިސްލާހު ހުށަހެޅި އެވެ. 

ހޮޅުދޫ ދާއިރާގެ ޕީއެންސީ މެންބަރު އަބްދުއްސައްތާރު މުހައްމަދު ހުށަހެޅުއްވި އެ ބިލުގެ މަސައްކަތް ދެ ދުވަސް ތެރޭ ނިންމައި މިދިޔަ މަހުގެ 26ގައި ފާސްކޮށް، ތަސްދީގު ކުރެއްވުމަށް ރައީސަށް ވަނީ ފޮނުވައިފަ އެވެ.

ތަފްސީލް - ނަމަވެސް ރައީސް އޮފީހުން މިރޭ ނެރުނު ކުރު ބަޔާނެއްގައި ބުނިގޮތުގައި އެ ބިލު، "އަލުން ވިސްނެވުމަށް އެދިވަޑައިގެން" އަނބުރާ މަޖިލީހަށް ރައީސް ވަނީ މިއަދު ފޮނުއްވައިފަ އެވެ.

އެ ބިލުގައި އޮތީ ސުޕްރީމް ކޯޓުގެ ދެ ފަނޑިޔާރަކު މަގާމުން ވަކިކޮށް، އެ ކޯޓުގެ ބެންޗުގެ ފަނޑިޔާރުންގެ އަދަދަކީ ފަހެއް ކަމަށް ކަނޑައެޅުމަށެވެ. އެ ބިލު އޮތް ގޮތުން:

އެނގުން މުހިއްމު - އެ ބިލު މަޖިލީހުން ފާސްކުރިތާ ކުޑަ ވަގުތުކޮޅެއް ތެރޭ ޖޭއެސްސީ އިން ވަނީ ސުޕްރީމް ކޯޓުގެ ތިން ފަނޑިޔާރަކު މަގާމުން ސަސްޕެންޑްކޮށް، އެ ބޭފުޅުންގެ މައްޗަށް ސުލޫކީ މައްސަލަތަކެއް ބަލަން ފަށައިފަ އެވެ.

ފާހަގަކުރެވޭ - ޖޭއެސްސީން އެގޮތަށް ނިންމީ، މެމްބަރަކު ޕާޓީން ވަކިކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި ބަދަލަށް އަމަލުކުރުން ފަސްކުރުމަށް ވަގުތީ އަމުރެއް ނެރުމާ ގުޅޭ އަޑުއެހުމެއް ސުޕްރީމް ކޯޓުގައި ފަށަން ވަގުތު ކުޑަތަން ވެފައި ވަނިކޮށެވެ. އެ ތިން ފަނޑިޔާރުން ސަސްޕެންޑްކުރުމުން އެ މައްސަލަ ވަނީ ހުއްޓިފަ އެވެ. ކޯޓުތަކުގެ ގާނޫނު ބުނާ ގޮތުން ދުސްތޫރީ މައްސަލައެއް ބެލޭނީ މަދުވެގެން ފަސް ފަނޑިޔާރުން ތިއްބަވާ ބެންޗަކަށެވެ.

ސަސްޕެންޑްކުރި ތިން ފަނޑިޔާރުންގެ ތެރެއިން ހުސްނުއްސުއޫދު ވަނީ، ދުސްތޫރީ މައްސަލަ ބަލަން ނިންމުމުން އެކަން ހުއްޓުވަން ރައީސް މުއިއްޒު ފަނޑިޔާރުންނަށް ބިރު ދެއްކެވި ކަމަށް ތުހުމަތުކުރައްވައި، އިސްތިއުފާދެއްވައިފަ އެވެ.

ޖޭއެސްސީއިން އާދީއްތަ ދުވަހާއި މިއަދު، ސަސްޕެންޝަންގައި ތިއްބެވި ފަނޑިޔާރު ޑރ. އަޒްމިރާލްދާ ޒާހިރު އާއި ފަނޑިޔާރު މަހާޒު އަލީ ޒާހިރު ތަހުގީގު ކޮމިޓީއަށް ހާޒިރުކޮށް ސުވާލުކޮށްފައިވެ އެވެ.

ސުއޫދު އިސްތިއުފާ ދެއްވުމުން، އާ ފަނޑިޔާރަކު ހޯދުމަށް ޖޭއެސްސީއިން ވަނީ އިއުލާންކޮށްފަ އެވެ.