ސީއެމްސީން ހިއްކި 29 ހެކްޓަރަށް 21 މިލިއަން ޑޮލަރު ދޭން ނިންމައިފި

'ރަސްމާލެ' ތަރައްގީ ކުރުމަށްޓަކައި ކ. ފުށިދިއްގަރުފަޅު ހިއްކަން ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ)އާ އެކު ހެއްދި އެއްބަސްވުން ބާތިލު ކުރި އިރު އެ ކުންފުނިން ހިއްކާފައިވާ 29 ހެކްޓަރުގެ ބިމަށް 21 މިލިއަން ޑޮލަރު (323.8 މިލިއަން ރުފިޔާ) ދިނުމަށް އެޗްޑީސީން ނިންމާފައިވާކަން 'ދައުރު'އަށް އެނގިއްޖެ އެވެ.

ވީ ކިހިނެއް؟ - މީގެ އަހަރެއްހާ ދުވަސް ކުރިން ޑިސެމްބަރު 2023ގައި ފުށިދިއްގަރުން 1،153 ހެކްޓަރުގެ ބިން ހިއްކުމަށް އެޗްޑީސީން ސީއެމްސީސީއާ ހަވާލުކޮށްފައި ވަނީ، މަޝްރޫއޫގެ އަގުގެ ގޮތުގައި ހުޅުމާލެ އާއި ފުށިދިއްގަރުފަޅުން ޖުމްލަ 70 ހެކްޓަރުގެ ބިން ދޭ ގޮތަށެވެ.  އެގޮތުން:

ތަފްސީލު - އެއްބަސްވުން ބާތިލު ކުރުމާ ގުޅިގެން ބަދަލެއްގެ ގޮތުގައި 21 މިލިއަން ޑޮލަރު ދޭން ސެޓްލްމަންޓް އެއްބަަސްވުމެއް ސީއެމްސީއާ އެކު އެޗްޑީސީން ހަދާފައިވާ ކަމަށް މީގެ ދެތިން ދުވަހެއް ކުރިން ބައެއް މީޑިއާތަކުން ރިޕޯޓުކޮށް އަދި ސޯޝަލް މީޑީއާގައި ބައެއް މީހުން ވާހަކަ ދެއްކި އެވެ. އޭގެ ފަހުން، މިއަދާ ހަމައަށް ވެސް މިކަމާ ގުޅޭ ގޮތުން ސަރުކާރުންނާއި އެޗްޑީސީން ރަސްމީކޮށް އެއްވެސް އެއްޗެއް ބުނެފައެއް ނުވެ އެވެ.

މިކަމާ ގުޅިގެން ސަރުކާރުގެ ބައެއް މަސްދަރުތަކުން ނަން ނުޖަހާ ގޮތަށް 'ދައުރު'އަށް ވިދާޅުވެފައިވާ ގޮތުގައި، އެޗްޑީސީން އެއްބަސްވެފައި ވަނީ ސީއެމްސީން ހިއްކާފައިވާ 29 ހެކްޓަރަށްވާ ފައިސާ ދިނުމަށެވެ. އެއީ 21 މިލިއަން ޑޮލަރެވެ.

"ކުރިން އެއްބަސްވެފައި އޮތީ 70 ހެކްޓަރުގެ ބިން ދޭން. އެކަމަކު އެއްބަސްވެފައިވާ ގޮތަށް މަޝްރޫއު ކުރިއަށް ނުދިއުމުން ދެން އެ ބިންތައް ދޭން ނުޖެހޭނެތާ. އެހެންވެ މިހާރު ނިންމާފައި ވަނީ އެ 70 ހެކްޓަރުގެ ބިން ނުދީ، އެ މީހުން ކުރި މަސައްކަތަކަށް އޭގެ އުޖޫރައެއް ދޭން. އެއީ [ހިއްކާފައިވާ] 29 ހެކްޓަރުގެ ބިމަށް 21 މިލިއަން ޑޮލަރު ދިނުމަށް،" މިކަމުގެ މައުލޫމާތު އެނގޭ ސަރުކާރުގެ އިސް އޮފިޝަލަކު ވިދާޅުވި އެވެ.

"ނަމަވެސް، މިއީ ދިން ބަދަލެއް ނޫން. އަދި ހެދި ސެޓްލްމަންޓެއް ނޫން. އެ މީހުން ހިއްކި ބިމަށް އެ މީހުންނަށް ފައިސާ ދޭން ނިންމީ."

މިކަމުގެ މައުލޫމާތު އެނގޭ އެހެން އޮފިޝަލަކު ވިދާޅުވި ގޮތުގައި، 29 ހެކްޓަރުގެ ބިމަށް 21 މިލިއަން ޑޮލަރު ދިނުމަށް މިހާރު ސީއެމްސީއާ އެކު އެޗްޑީސީން އެއްބަސްވުމަކަށް ވަނީ އާދެވިފަ އެވެ. އެގިފައިވާ ގޮތުގައި، ދެ ފަރާތުން އެއްބަސްވުމަކަށް އައިސްފައިވަނީ 21 މިލިއަން ޑޮލަރު، 12 މަސްދުވަހަށް ބަހާލައިގެން ސީއެމްސީއަށް ދައްކާ ގޮތަށެވެ.

މިކަމާ ގުޅިގެން އިއްޔެއިން ފެށިގެން އެޗްޑީސީގެ ރަސްމީ ބަހެއް ހޯދާލުމަށް މަސައްކަތް ކުރި ނަމަވެސް އެ ކުންފުނީގެ ބަހެއް އަދި ނުލިބެ އެވެ. އަދި ސީއެމްސީގެ ބަހެއް ވެސް ނުލިބެ އެވެ.

ނަމަވެސް ސީއެމްސީއާ ހަވާލާދީ އިއްޔެ ބައެއް ނޫސްތަކުން ވަނީ ބަދަލު ދިނުމަށް ނިންމި ކަމަށް ބުނެ ރިޕޯޓު ކުރި ހަބަރު ދޮގުކޮށްފަ އެވެ. އެގޮތުން، ސީއެމްސީން ނެރުނު ބަޔާނަކާ ހަވާލާދީ އެ ނޫސްތަކުން ބުނެފައިވަނީ:

ފާހަގަކޮށްލެވޭ ކަމެއް - މި މަޝްރޫއު އެންމެ ފުރަތަމަ ސޮއިކުރިއިރު ވެސް އެކަމާ ގުޅޭ މާ ބޮޑު މައުލޫމާތެއް އެޗްޑީސީ އާއި ސަރުކާރުން ހާމަކޮށްފައެއް ނުވެ އެވެ. ސަރުކާރުން ފުރަތަމަ ބުނެފައިވަނީ، މަޝްރޫއު ކުރިއަށް ދަނީ ދައުލަތުގެ ބަޖެޓުން އެއްވެސް ފައިސާއެއް ނުދީ އެވެ. އޭރު އެއްބަސްވުމާ ގުޅޭ މައުލޫމާތު ހަމަކޮށްފައިނުވުމުން ބައެއް ފަރާތްތަކުން ކަންބޮޑުވުން ވެސް ފާޅު ކުރި އެވެ.