މަސައްކަތް ކުރާ ފަރާތަށް ބިން ދޭން ނުޖެހޭ ގޮތަށް ރަސްމާލެ މަޝްރޫއު ކުރިއަށް ގެންދަނީ

މަސައްކަތް ކުރާ ފަރާތަށް ބިން ދޭން ނުޖެހޭ ގޮތަށް ރަސްމާލެ ހިއްކަން ނިންމާފައިވާ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު މިއަދު ވިދާޅުވެއްޖެ އެވެ.

ވީ ކިހިނެއް؟ - މިނިސްޓަރު މިހެން ވިދާޅުވީ މިއަދު ކޮންސްޓްރަކްޝަން މިނިސްޓްރީން ބޭއްވި ނޫސްވެރިންގެ ބައްދަލުވުމަށް ފަހު، ރަސްމާލެ މަޝްރޫއާ ގުޅޭ ގޮތުން ލިޔެފައިވާ ހަބަރެއް އެކްސްގައި ރީޕޯސްޓް ކުރައްވަމުންނެވެ.

ތަފްސީލް - މިނިސްޓަރު ވިދާޅުވީ އެއްބަސްވުމާ އެއްގޮތަށް މަޝްރޫއު ނުގެންދެވުމުން އެ މަސައްކަތް ހަވާލުކުރި، ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އަށް އިތުރު ފުރުސަތެއް ނުދިނީ، އެ މަޝްރޫއު ކުރިއަށްގެންދަން ސަރުކާރުން ބޭނުންވަނީ ކޮންޓްރެކްޓަރަށް ބިންތަކެއް ނުދީ ކަމަށް ވާތީ ކަމަށެވެ.

"ރަސްމާލެ ހިއްކުމުގެ މަސައްކަތް އެއްބަސްވުމާ އެއްގޮތަށް ކޮންޓްރެކްޓަރަށް ނުކުރެވުމުން، އިތުރު ފުރުސަތު ނުދޭން ނިންމި މައިގަނޑު ސަބަބަކީ މާލެ ސަރަހައްދުން ބިންތަކެއް ދިނުމަކާ ނުލައި ކޮންޓްރެކްޓަރުން މެދުވެރިވެގެން ފައިނޭންސް ހަމަޖައްސައިގެން ޕްރޮޖެކްޓް ކުރިއަށް ގެންދިއުމަށް ސަރުކާރުން ބޭނުންވާތީ އެވެ. އިރާދަކުރެއްވިއްޔާ ރަސްމާލެ ހިއްކުމުގެ އަމަލީ މަސައްކަތް ވަރަށް އަވަހަށް ފެށިގެންދާނެ އެވެ،" މުއްތަލިބްގެ ޕޯސްޓުގައި ވިދާޅުވި އެވެ.

މިއަދު ކޮންސްޓްރަކްޝަން މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ ރަސްމާލެ މަޝްރޫއު ހަވާލުކުރީ ކޮންޓްރެކްޓަރު ފައިސާ ހަރަދު ކުރާ އުސޫލުން ކަމަށާއި އެ މަސައްކަތް ހަވާލުކޮށްފައިވާ ކުންފުނިން މަސައްކަތް ފެށުމަށް ފަހު، މަޝްރޫއު ކުރިއަށް ގެންދަން ބޭނުންވާ ފައިސާ ނުހޯދިގެން މަޝްރޫއު އޮތީ މަޑުޖެހިފައި ކަމަށެވެ.

މުއްތަލިބު ވިދާޅުވި ގޮތުގައި، ސަރުކާރުން މިހާރު މަސައްކަތް ކުރަނީ މާ ލަސްތަކެއް ނުވެ މަސައްކަތް ފަށާށެވެ.

"ސަރުކާރުން މަސައްކަތް ކުރަމުން މިގެންދަނީ މި އަހަރުގެ ނިޔަލަށް އެއްކޮށް ހިއްކާ ނިންމޭ ވަރަށް ތަފާތު ގިނަ ފަރާތްތަކާ ގުޅިގެން މަސައްކަތް ކުރުމަށް. އޭގައި ވަރަށް ގިނަ ކާމިޔާބީތަކެއް ވެސް ލިބިފައި ހުރީ،" މުއްތަލިބު ވިދާޅުވި އެވެ.

އޭނާ ވިދާޅުވީ އަލުން އަމަލީ މަސައްކަތް ފަށާ ހިސާބަށް ދިއުމުން އޭގެ ތަފްސީލު ހާމަކުރައްވާނެ ކަމަށެވެ.

މި މަޝްރޫއު ކުރިއަށް ގެންދަން ކުރިމަތިވި އެންމެ ބޮޑު ގޮންޖެހުމަކީ މި އަހަރަށް ލަފާކުރި ބަޖެޓުގައި ރަސްމާލެ މަޝްރޫއަށް ހިމަނަން އެދުނު ފައިސާ އުނިކުރުން ކަމަށާއި ބަޖެޓުގައި ނެތުމުން އިތުރު ގޮތަކަށް އެ މަސައްކަތް ކުރިއަށް ގެންދަން ޖެހިފައިވާކަން މިނިސްޓަރު ފާހަގަކުރެއްވި އެވެ.

"ދެން އަޅުގަނޑުމެން ޖެހޭނީ އެހެން ފައިނޭންސިން މެކޭނިޒަމްއެއް ހޯދައިގެން ޕްރޮޖެކްޓު ކުރިއަށް ގެންދަން،" އޭނާ ވިދާޅުވި އެވެ.

ފަސްމަންޒަރު - ރަސްމާލޭގެ ނަމުގައި ފުށިދިއްގަރުފަޅު ތަރައްގީކުރަން ނިންމައި ސީއެމްސީއާ ގުޅިގެން އެ ތަން ހިއްކަން ފެށީ 18 ޑިސެމްބަރުގަ އެވެ.

ކ. ގުޅީ ކައިރީގައި އޮންނަ ފުށިދިއްގަރު ފަޅުން 1،153 ހެކްޓަރުގެ ބިން ހިއްކާނެ ކަމަށާއި މަސައްކަތް ތާވަލާ އެއްގޮތަށް ދާ ނަމަ، އަށް މަސް ތެރޭ ހިއްކައި ނިމޭނެ ކަމަށް ރައީސް މުހައްމަދު މުއިއްޒު ވަނީ ކުރިން ވިދާޅުވެފަ އެވެ.