ރަސްމާލެ ހިއްކުންް ހުއްޓިފައިވާ ކަމަށް އިއުތިރާފްވެއްޖެ؛ އިތުރު ގޮތެއް ހޯދަނީ

ރަސްމާލެ ހިއްކުމުގެ މަސައްކަތް ކުރިއަށް ގެންދަން އެހެން ގޮތެއް ހޯދުމުގެ މަސައްކަތް ފަށާފައިވާ ކަމަށާއި އެކަމަށް އަލި މަގެއް ވެސް ލިބިފައިވާ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުﷲ މުއްތޮލިބު ވިދާޅުވެއްޖެ އެވެ.

ވީ ކިހިނެއް؟ - މިއަދު ކޮންސްޓްރަކްޝަން މިނިސްޓްރީ އިން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ ރަސްމާލެ މަޝްރޫއު ހަވާލުކުރީ ކޮންޓްރެކްޓާ ފައިނޭންސް އުސޫލުން ކަމަށާއި އެ މަސައްކަތް ހަވާލުކޮށްފައިވާ ކުންފުނިން މަސައްކަތް ފެށުމަށް ފަހު، މަޝްރޫއު ކުރިއަށް ގެންދަން ބޭނުންވާ ފައިސާ ނުހޯދިގެން މަޝްރޫއު އޮތީ މަޑުޖެހިފައި ކަމަށެވެ.

ތަފްސީލް - މުއްތަލިބު ވިދާޅުވި ގޮތުގައި ސަރުކާރުން މިހާރު މަސައްކަތް ކުރަނީ މާ ލަސްތަކެއް ނުވެ މަސައްކަތް ފަށާށެވެ.

"ސަރުކާރުން މަސައްކަތް ކުރަމުން މިގެންދަނީ މި އަހަރުގެ ނިޔަލަށް އެއްކޮށް ހިއްކާ ނިންމޭ ވަރަށް ތަފާތު ގިނަ ފަރާތްތަކާ ގުޅިގެން މަސައްކަތް ކުރުމަށް. އޭގައި ވަރަށް ގިނަ ކާމިޔާބީތަކެއް ވެސް ލިބިފައި ހުރީ،" މުއްތަލިބު ވިދާޅުވި އެވެ.

އޭނާ ވިދާޅުވީ އަލުން އަމަލީ މަސައްކަތް ފަށާ ހިސާބަށް ދިޔުމުން އޭގެ ތަފްސީލު ހާމަކުރައްވާނެ ކަމަށެވެ.

މި މަޝްރޫއު ކުރިއަށް ގެންދަން ކުރިމަތިވި އެންމެ ބޮޑު ގޮންޖެހުމަކީ މި އަހަރަށް ލަފާކުރި ބަޖެޓުގައި ރަސްމާލެ މަޝްރޫއަށް ހިމަނަން އެދުނު ފައިސާ އުނިކުރުން ކަމަށާއި ބަޖެޓުގައި ނެތުމުން އިތުރު ގޮތަކަށް އެ މަސައްކަތް ކުރިއަށް ގެންދަން ޖެހިފައިވާކަން މިނިސްޓަރު ފާހަގަކުރެއްވި އެވެ.

"ދެން އަޅުގަނޑުމެން ޖެހޭނީ އެހެން ފައިނޭންސިން މެކޭނިޒަމްއެއް ހޯދައިގެން ޕްރޮޖެކްޓު ކުރިއަށް ގެންދަން،" އޭނާ ވިދާޅުވި އެވެ.

މިނިސްޓަރު ވިދާޅުވީ ސީއެމްސީއިން ހުށަހަޅާފައި އޮތް ގޮތަށް އެ ކުންފުންޏަށް މަސައްކަތް ކުރިއަށް ގެންދެވިފައި ނުވާ ކަމަށެވެ. މިހާރު ސަރުކާރުން އަންނަނީ އެ މަޝްރޫއު ހިންގަން ގޮތްތަކެއް ހޯދަމުން ކަމަށާއި އިތުރު ގޮތްތަކެއް ހޯދާއިރު ވެސް ދައުލަތަށް ވީހާވެސް ހަރަދު ކުޑަކޮށް މަސައްކަތް ކުރިއަށް ގެންދާނެ ކަމަށް މުއްތަލިބު ވިދާޅުވި އެވެ.

"މިހާރު ޓާގެޓުކޮށްފައި އޮތީ މި އަހަރު ނިމޭއިރަށް ބިން ހިއްކުމުގެ މަސައްކަތް ކުރިއަށް ގެންގޮސް އެތަނުގައި ހައުސިން އާއި އެހެން މަޝްރޫއުތައް ކުރިއަށް ގެންދެވޭނެ ގޮތަކަށް ކުރިއަށް ގެންދަން،" މުއްތަލިބު ވިދާޅުވި އެވެ

ފަސްމަންޒަރު -'ރަސްމާލެ'ގެ ނަމުގައި ފުށިދިއްގަރުފަޅު ތަރައްގީކުރަން ނިންމައި ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާ ގުޅިގެން އެ ތަން ހިއްކަން ފެށީ 18 ޑިސެމްބަރުގަ އެވެ.

ކ. ގުޅީ ކައިރީގައި އޮންނަ ފުށިދިއްގަރު ފަޅުން 1،153 ހެކްޓަރުގެ ބިން ހިއްކާނެ ކަމަށާއި މަސައްކަތް ތާވަލާ އެއްގޮތަށް ދާ ނަމަ، އަށް މަސް ތެރޭ ހިއްކައި ނިމޭނެ ކަމަށް ރައީސް މުހައްމަދު މުއިއްޒު ވަނީ ކުރިން ވިދާޅުވެފަ އެވެ.