ރަސްމާލެ ހިއްކުމުގެ މަސައްކަތް އަލުން ފަށައިފި

މެދުކެނޑިފައި އޮތް ރަސްމާލެ ހިއްކުމުގެ މަޝްރޫއު އަލުން ފަށައިފި އެވެ.

ވީ ކިހިނެއް؟ - ރަސްމާލެ މަޝްރޫއުގެ ބިން ހިއްކަން އަލުން ފަށާފައިވާކަން ހައުސިލް ޑިވެލޮޕްމަންޓް ކޯޕަރޭޝަނުން މިއަދު ވަނީ އިއުލާނުކޮށްފަ އެވެ.

އެ މަޝްރޫއު ކުރިން ހަވާލުކޮށްފައިވަނީ ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން (ސީއެމްސީ)އާ އެވެ. ނަމަވެސް ކޮންޓްރެކްޓަރަށް ބިންތަކެއް ނުދީ އެ މަޝްރޫއު ކުރިއަށް ގެންދަން ބޭނުންވާތީ އެ ކުންފުނީގެ އެއްބަސްވުން ސަރުކާރުން ވަނީ އުވާލައިފަ އެވެ.

 މި މަޝްރޫއު އަލުން ފަށާފައިވަކަން އިއުލާނުކުރި ނަމަވެސް އިތުރު ތަފްސީލެއް އެޗްޑީސީން ނުދެ އެވެ.

ފަސްމަންޒަރު -'ރަސްމާލެ'ގެ ނަމުގައި ފުށިދިއްގަރުފަޅު ތަރައްގީކުރަން ސީއެމްސީއާ ގުޅިގެން އެ ތަން ހިއްކަން ފެށީ 18 ޑިސެމްބަރުގަ އެވެ.

ކ. ގުޅީ ކައިރީގައި އޮންނަ ފުށިދިއްގަރު ފަޅުން 1،153 ހެކްޓަރުގެ ބިން ހިއްކާނެ ކަމަށާއި މަސައްކަތް ތާވަލާ އެއްގޮތަށް ދާ ނަމަ، އަށް މަސް ތެރޭ ހިއްކައި ނިމޭނެ ކަމަށް ރައީސް މުހައްމަދު މުއިއްޒު އޭރު ވިދާޅުވި އެވެ.

ރައްޔިތުންނަށް އެކަށީގެންވާ ބޯހިޔާވަހިކަމެއް ފޯރުކޮށްދޭން އަމާޒުކޮށް ރަސްމާލޭގައި އެކަނި ވެސް އެކި ކަހަލަ 30،000 ހައުސިން ޔުނިޓް އަޅާނެ ކަމަށް ރައީސް މީގެ ކުރިން ވަނީ ވިދާޅުވެފަ އެވެ.