ގްރީން ޓެކްސް އާއި އެއާޕޯޓު ފީ ބޮޑު ކުރާ ބިލު ބަލައިގަނެ، ކޮމިޓީއަށް

ގްރީން ޓެކްސް އަދި އެއާޕޯޓު ފީ ބޮޑު ކުރުމަށް ސަރުކާރުގެ ފަރާތުން މަޖިލީހަށް ހުށަހެޅި ދެ ބިލު މިއަދު ބަލައިގަނެ، ދިރާސާ ކުުރުމަށް ކޮމިޓީއަށް ފޮނުވައިފި އެވެ.

ވީ ކިހިނެއް؟ -  ގްރީން ޓެކްސްއަށް މިހާރު ނަގާ އަދަދަށް ވުރެ ދެ ގުނަ ބޮޑުކޮށް އަންނަ ޖެނުއަރީން ފެށިގެން ނަގާ ގޮތަށް އިސްލާހު ގެނައުމަށް ހުށަހެޅީ ޓޫރިޒަމް ގާނޫނަށެވެ.

އަންނަ 1 ޑިސެމްބަރުން ފެށިގެން އެއާޕޯޓު ފީ ބޮޑު ކުރާ ގޮތަށް އިސްލާހު ހުށަހެޅީ ރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ އަތުން ޓެކްސް އާއި ފީ ނެގުމާ ބެހޭ ގާނޫނަަށެވެ.

މި ދެ ބިލު ވެސް މަޖިލިސް ޖަލްސާއަށް ހުށަހަޅާފައި ވަނީ މިދިޔަ ހޯމަ ދުވަހު އެވެ.

ތަފްސީލު - އެއާޕޯޓު ފީ ބޮޑުކުރުމުގެ އިސްލާހުގެ ބިލުގެ ބަހުސް އިއްޔެގެ ޖަލްސާގައި އޮތީ ނިންމާފަ އެވެ. އަދި ގްރީން ޓެކްސް ބޮޑު ކުރުމުގެ ބިލުގެ ބަހުސް މިއަދުގެ ޖަލްސާގައި ފަށައި ބަހުސް ނިންމި އެވެ.

މި ދެ ބިލު ބަލައިގަންނަން ފެންނަ ކަމަށް ވޯޓު ދެއްވީ ވޯޓުގައި ބައިވެރިވެވަޑައިގެންނެވި މެންބަރުންގެ ތެރެއިން 58 މެންބަރުންގެ ވޯޓުންނެވެ. އެ ބިލު ގަލައިގަންނަން ނުފެންނަ ކަމަށް 10 މެންބަރުން ވޯޓު ދެއްވި އިރު، އެ ހުރިހާ މެންބަރުންނަކީ ވެސް އެމްޑީޕީގެ މެންބަރުންނެވެ.

މި ބިލުތައް ބަލައިގަތުމަށް ފާސްވުމާ އެކު ދިރާސާ ކުރުމަށް މުޅި މަޖިލީހުގެ ކޮމިޓީއަކަށް ފޮނުވި ކަމަށް ޖަލްސާގެ ރިޔާސަތުގައި އިންނެވި މަޖިލީހުގެ ނައިބު ރައީސް، ދިއްގަރު ދާއިރާގެ މެންބަރު އަހްމަދު ނާޒިމް ވަނީ އިއުލާންކުރައްވާފަ އެވެ.

ފާހަގަކޮށްލެވޭ ކަމެއް - އެ ދެ ބާވަތުގެ ޓެކްސްގެ އިތުރުން ސަރުކާރުން ވަނީ، ޓޫރިޒަމް ދާއިރާ އިން ނަގާ ޓީޖީއެސްޓީ ބޮޑު ކުރުމަށްޓަކައި މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް ވެސް އިސްލާހު ހުށަހަޅާފަ އެވެ. އިއްޔެ ޖަލްސާގައި އެ އިސްލާހު ބަލައިގަނެ، ކޮމިޓީއަށް ވަނީ ފޮނުވާފަ އެވެ.