ބިދޭސީ މަސައްކަތްތެރިން މެންދުރު ކެއުމަށް މަޑުކޮށްލައިގެން (ދައުރު ފައިލް ފޮޓޯ/ އަބްދުﷲ އިޔާން)
އިހުމާލުވާ ކޮންމެ ބިދޭސީއަކަށް 50،000ރ.އިން ޖޫރިމަނާ ކުރާ ގޮތަަށް ފާސްކޮށްފި
ބިދޭސީ މަސައްކަތްތެރިން ރާއްޖެ ގެނައުމަށް ފަހު، އިހުމާލުވާ ކޮންމެ މުވައްޒަފަކަށް 50،000ރ.އިން ވަޒީފާ ދޭ ފަރާތް ޖޫރިމަނާކޮށް، ހަރުކަށި ފިޔަވަޅު އަޅޭ ގޮތަށް ސަރުކާރުގެ ފަރާތުން ވަޒީފާއާ ބެހޭ ގާނޫނަށް ހުށަހެޅި އިސްލާހު މިއަދު މަޖިލީހުން ފާސްކޮށްފި އެވެ.
ވީ ކިހިނެއް؟ - ސަރުކާރުގެ ފަރާތުން ކުޅުދުއްފުށި އުތުރު ދާއިރާގެ ޕީއެންސީ މެންބަރު މުހައްމަދު ދާއޫދު މިދިޔަ މަހު ފަހުކޮޅު މަޖިލީހަށް ހުށަހެޅުއްވި ބިލުގެ މަސައްކަތް ނިންމައި، ބިލު ދިރާސާ ކުރި ސަލާމަތީ ހިދުމަތްތަކާ ބެހޭ ކޮމިޓީން ނިންމި ގޮތުގެ ރިޕޯޓަށް މިއަދުގެ މަޖިލީހުގެ ޖަލްސާގައި ވަނީ ވޯޓަށް އަހާފަ އެވެ.
ކޮމިޓީ ރިޕޯޓަށް ވޯޓަށް އެހުމުން ބިލު ފާސްވެފައި ވަނީ 65 މެންބަރުންގެ ވޯޓުންނެވެ. ދެކޮޅަށް ވޯޓު ދެއްވީ އިދިކޮޅު އެމްޑީޕީގެ 10 މެންބަރުންނެވެ.
ކޮމިޓީ މަރުހަލާގައި އެ އިސްލާހުތަކާ ދެކޮޅަށް ވަކާލާތު ކުރެއްވި މާމިގިލީ ދާއިރާގެ މެމްބަރު ގާސިމް އިބްރާހިމް، ވޯޓު ނެގި ވަގުތު ތަޅުމުގައި އިންނެވި ނަމަވެސް ވޯޓުގައި އޭނާ ބައިވެރިވެވަޑައިގެންފައެއް ނުވެ އެވެ.
ތަފްސީލު - ގާސިމް ހިމެނޭ ގޮތަށް ކޮމިޓީގައި ބިލު ދިރާސާ ކުރަމުންދިޔަ އިރު، ބައެއް މެންބަރުން ވަނީ ޖޫރިމަަނާ ކުރާ އަދަދުތައް ބޮޑުވެގެން އެކަމުގެ ކަންބޮޑުވުން ފާޅުކުރައްވައިފަ އެވެ. ނަމަވެސް ކޮމިޓީން ނިންމާފައި ވަނީ، ސަރުކާރުން ހުށަހެޅި ގޮތަށް އެ މާއްދާތަކަށް އިތުރު ބަދަލެއް ނުގެނެސް ފާސް ކުރުމަށެވެ.
މި ބިލުގައި ބިދޭސީންނާ މެދު އިހުމާލުވި ކަމަށް ބެލެވޭނެ ހާލަތްތަކާއި އެފަދަ ހާލަތްކުގައި އަޅާނެ ފިޔަވަޅުތައް ބަޔާންކޮށްފައިވެ އެވެ.
އަޅާނެ ފިޔަވަޅުތަކުގައި ހިމެނެނީ:
-
ބިދޭސީ މަސައްކަތްތެރިން ރާއްޖެ ގެނައުމަށް ފަހު، އެ ފަރާތްތަކާ މެދު އިހުމާލުވާ ވަޒީފާ ދޭ ފަރާތްތަކުގެ މައުލޫމާތު އާންމުކުރުން
-
އިހުމާލުވާ ކޮންމެ މުވައްޒަފަކަށް 50،000ރ.ގެ މަގުން ޖޫރިމަނާ ކުރުން
-
ތަކުރާރުކޮށް އިހުލާވުމުގެ އަމަލުތައް ހިންގާ ވަޒީފާ ދޭ ފަރާތް ޖޫރިމަނާ ކުރުމާ އެކު، ގާނޫނުގެ ދަށުން ބިދޭސީ މަސައްކަތްތެރިންނާ ގުޅޭ ގޮތުން ވަޒީފާ ދޭ ފަރާތްތަށް ދޭ ހިދުމަތްތައް ވަކި މުއްދަތަކަށް ހުއްޓާލުން؛ އޭގެ ތަފްސީލު ބަޔާން ކުރުން އޮތީ ގާނޫނުގެ ދަށުން ހަދާ ގަވައިދަކުން
އިހުމާލުގެ އަމަލުތަކުގެ ގޮތުގައި ބަލަނީ:
-
1-
މުސާރަ ނުދިނުން
-
2-
ވަޒީފާ ދޭ ފަރާތުން ފޯރުކޮށްދޭން ޖެހޭ އަސާސީ ކަންކަމުގައި ގާނޫނުގެ ދަށުން ހަދާ ގަވައިދުގައި ކަނޑައަޅާ ކަންކަން ފުރިހަމަނުކުރުން
-
3-
ބިދޭސީ މަސައްކަތްތެރިން ރާއްޖެ ގެނައުމުގައި ނުވަތަ ރާއްޖެ ގެނައުމަށް ފަހު އެ މީހުންނާ މެދު އެކްސްޕްލޮއިޓޭޝަންގެ އަމަލެއް ހިންގުން ނުވަތަ އެ މީހުން ލައްވާ ގާނޫނާއި ގަވައިދާ ހިލާފު އަމަލުތައް ހިންގުން
-
4-
ބިދޭސީ މަސައްކަތްތެރިޔާ ގެންނަ ވަޒީފާ ނޫން އެހެން ވަޒީފާއެއް އަދާ ކުރުވުން؛ ނަމަވެސް ވަޒީފާގެ އެއްބަސްވުމުގެ ދާއިރާގެ ތެރެއިން ކުރާ އެހެނިހެން މަސައްކަތް ކުުރުމަކީ، އެހެން ވަޒީއެއް އަދާކުރުން ކަމުގައި ނުބެލެވޭނެ
އެއިން ކަމެއްކޮށް ގާނޫނާ ހިލާފުވެއްޖެ ނަމަ، ވަޒީފާ ދޭ ފަރާތް 100،000ރ.އަށް ވުރެ ބޮޑު ނޫން އަދަދަކުން ޖޫރިމަނާ ކުރުމުގެ ބާރު މިނިސްޓްރީއަށް ލިބިގެންވާ ކަމަށް ބިލުގައިވެ އެވެ.
ކޮމެންޓް (1)
ސިކުނޑި