ގާސިމްގެ ރުޅި ފަޅައިގެން؛ 'ޓެކްސް ބޮޑުކުރަން ސަރުކާރަށް ޗެކް ފޮތެއް ނުދެވޭނެ'

ބިދޭސީ މަސައްކަތްތެރިން ރާއްޖެ ގެންނަން ދައްކަން ޖެހޭ ވިސާ ފީ އާއި ވޯކް ޕާމިޓް ފީ ބޮޑު ކުރުމަށް ދެކޮޅު ހައްދަވައި، ޓެކްސްތައް ބޮޑު ކުރަން ސަރުކާރަށް "ޗެކް ފޮތެއް ނުދެވޭނެ" ކަމަށް ޖުމްހޫރީ ޕާޓީގެ ލީޑަރު، ގާސިމް އިބްރާހިމް ވިދާޅުވެއްޖެ އެވެ.

އެފަދަ އިސްލާހަކީ ގާސިމް ސިފަ ކުރެއްވި ގޮތުގައި "ސަރުކާރު ވައްޓާލަން ރައްޔިތުން ނުކުމެދާނެ" ފަދަ އިސްލާހެކެވެ.

އެނގުން މުހިންމު - ވޯކް ޕާމިޓް ފީ އަދި ކޯޓާ ފީގެ ގޮތުގައި ފައިސާ ދައްކަން މިހާރު އޮންނަ އަދަދަކީ ސީދާ ވަޒީފާއާ ބެހޭ ގާނޫނުގައި ކަނޑައަޅާފައި އޮންނަ އަދަދެކެވެ. އެއީ:

އެ ފީތައް ގަވައިދަށް ގެންނަ އިސްލާހަކުން ބޮޑު ކުރެވޭ ގޮތަށް ސަރުކާރުން ވަނީ ވަޒީފާއާ ބެހޭ ގާނޫނަށް އިސްލާހު ހުށަހަޅާފަ އެވެ. އެއީ، ގާނޫނުގެ ދަށުން ހަދާ ގަވައިދަކުން ގިނަވެގެން ކޮންމެ ދޮޅު އަހަރަކުން އެ ފީއަށް ބަދަލު ގެނެވޭ ގޮަތަށް ހެދުމަށެވެ. އެގޮތުން:

ވީ ކިހިނެއް؟ - އެ ފީތައް ބޮޑު ކުރުމަށް ދެކޮޅު ހައްދަވައި، ގާސިމް ވާހަކަ ދެއްކެވީ އެ ބިލު ދިރާސާކުރާ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީގެ މިއަދުގެ ބައްދަލުވުމުގަ އެވެ.

ތަފްސީލު - ގާސިމް އެގޮތަށް ވިދާޅުވުމުގެ ކުރިން އެ މާއްދާ އިސްލާހު ކުރުމަށް ކޮމިޓީގެ ބައެއް މެންބަރުން ހިޔާލު ހުށަހެޅުއްވި އެވެ.  ގާސިމް ވިދާޅުވީ:

އެ މާއްދާ އިސްލާހު ކުރުމަށް ހިތަދޫ މެދު ދާއިރާގެ ޕީއެންސީގެ މެންބަރު އަހްމަދު އަޒާން ދެކޮޅު ހައްދަވައި އެ މާއްދާ އޮތް ގޮތަށް ބޭއްވުމަށް ހުށަހެޅުއްވި އެވެ.

"އަޅުގަނޑަށް ހީވަނީ، ސަރުކާރުން މި އިސްލާހުތައް ފޮނުވާނީ ވެސް ވަރަށް ބޮޑަށް ދިރާސާކޮށްފަހެން. އަޅުގަނޑުމެން މިއަށް ބަދަލުތައް ގެންނަން ވެއްޖިއްޔާ ސަރުކާރަށް ލިބޭނެ ކަމަށް ލަފާކުރެވޭ އާމްދަނީއަށް ވެސް އަސަރުކޮށްފާނެ،" އަޒާން ވިދާޅުވި އެވެ.

އަޒާން ވަހަކަ ދައްކަވަމުން ގެންދެވި ވަގުތުވެސް ގާސިމް ދިޔައީ އޭނާގެ ވާހަކަތަކަށް ދެކޮޅު ހައްދަވަމުންނެވެ. އަދި އަޒާންއަށް ނިސްބަތްކޮށް ބަހުގެ ހަމަލާތަކެއް ވެސް ގާސިމް ދެއްވި އެވެ.

"ރައްޔިތުން ފެލައިގެން ލާރި ނަގަން އުޅުނަސް، މުޅި ޕްރޮޖެކްޓް ކޮސްޓާއި މީހުންގެ ލިިވިން ކޮސްޓާއި ހުރިހާ އެޗެއް އަތް ނުފޯރާ ވަރަށް ބޮޑުވެގެން ދާއިރު، ސަލަމާތެއް ނުވާނެ. އެހެންވީމަ އެއްގޮތަކަށް ވެސް މި ލެވެރޭޖް ދޭކަށް ނުފެނޭ ސަރުކާރަށް. 2،000ރ. ބާއްވަން ޖެހެނީ، ދެން ބޮޑު ކުރަން ބޭނުން ނަމަ މި ގާނޫނު އިސްލާހު ކުރަން ފޮނުވަންވީ،" ރާއްޖޭގެ އެންމެ މުއްސަނދި ވިޔަފާރިވެރިންގެ ތެރޭގައި ހިމެނިވަޑައިގަންނަވާ ގާސިމް ވިދާޅުވި އެވެ.

"ހަމަ ގަވައިދު ހަދާލާފައި، ގަވައިދުން ޓަސް ލާފައި އޯޕަންކޮށް ޗެކްބުކެއް ދޭ ހެން، މީހުން އަތުން ޓެކްސް ނެގޭނެ ގޮތަށް އޮވެގެން ނުވާނެ."

ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި ޓޫރިޒަމް ޓެކްސް އާއި ޖީއެސްޓީ ބޮޑު ކުރުމާއި މިނިވަން ވޭޖް ކަނޑައެޅުމުން  އެކަމާ ވެސް ދެކޮޅު ހެއްދެވި ގޮތަށް ގާސިމް މިއަދުގެ ކޮމިޓީގެ ބައްދަލުވުމުގައި ވެސް އެކަންކަމާ ދެކޮޅަށް ވާހަކަ ދެއްކެވި އެވެ.  

އެ ސަރުކާރުގައި "ޓަސް ލާފައި" ޓެކްސްތައް ބޮޑުކުރުމުން މިހާރު ވިޔަފާރިވެރިން ތިބީ "އިނދަޖެހިފައި" ކަމަށް ވެސް ވިދާޅުވި އެވެ.

އަޒާން ދެއްކި ވާހަކައަށް ރައްދު ދެއްވާ ގާސިމް އިތުރަށް ފާހަގަކުރެއްވި ގޮތުގައި:

"މި [އިސްލާހު ފާސްކުރަން] ހެޔޮ ނުވާނެ، މިވަރު ކަމެއް ކޮށްފިއްޔާ ރައްޔިތުން ނުކުމެ މި ސަރުކާރު ނަގާ އެއްލައި ވެސް ލާފާނެ. އަހަރެމެން މި ތިބީ މި ސަރުކާރު ހިފަހައްޓައިދޭން [އަދި] އިހުލާސްތެރި ލަފާ ދޭން،" ގާސިމް ވިދާޅުވި އެވެ.

އޭނާ އެގޮތަށް ވިދާޅުވުމުން، މިއީ  ސަރުކާރުން ފޮނުވި ބިލެއް ކަމަށް މެންބަރަކު ވިދާޅުވާ އަޑު އިވެ އެވެ. އެ ހިސާބުން ގާސިމް ވަރަށް ބާރަށް ވާހަކަ ދައްކަވަން ފެއްޓެވި އެވެ.

"ސަރުކާރުން ފޮނުވީމަ، ސަރުކާރުން ބުނީމަ އެ ނިމުނީތަ؟" އަޑު ހަރުކޮށް ގާސިމް ވިދާޅުވި އެވެ.

އެއާ އެކު، މިއީ ލައިވްކޮށް ބާއްވާ  ބައްދަލުވުމެއްކަމަށް މެންބަރަކު ވިދާޅުވާ އަޑު އިވެ އެވެ. އެއާ އެކު ވެސް ގާސިމް އިތުރަށް ވާހަކަ ކުރިއަށް ގެންދެވި އެވެ. 

"ލައިވްކޮށޭ އަހަރެން ވެސް ވާހަކަ މި ދައްކަނީ. އަހަރެންނަށް މައްސަލައެއް ނެތޭ. ލައިވްކޮށް މިތާގައި މަނާ ވާހަކައެއް ނުދައްކައޭ. ސަރުކާރޭ ބުނީމަ އަހަރެން ތުރުތުރު އަޅާނެތަ؟ ސަރުކާރުގައި ތިބީ ކޮން ބައެއްތަ؟ ކޯއްޗެއް އެނގޭ ބައެއްތަ ތިބީ؟ ސަރުކާރުގައި ވަކި ތިބީ އަހަރެންނަށް ނޭނގޭ ވަކި ކޯއްޗެއް އެނގޭ ބައެއްތަ؟" ކޯފާވެ އިންނަވާ ގާސިމް ވިދާޅުވި އެވެ.

އެއާ އެކު ގާސިމް ވިދާޅުވީ ވެރިންގެ ކައިރީގައި ގިނަ ވަނީ "ސަރުކާރެއް ހަލާކުކޮށްލަން ވާހަކަ ދައްކާ މީހުން" ކަމަށެވެ. އަދި މިފަދަ އިސްލާހަކީ، ސަރުކާރު ދެކެ މީހުން ނަފްރަތު ކުރަން ވައްދައިގެން އުޅޭ އިސްލާހެއްގެ ގޮތުގައި ވެސް ސިފަކުރެއްވި އެވެ.

"އަޅުގަނޑު ބޭނުމެއް ނޫން ލޯބީގެ ކަތުރަކުން ބަޔަކު ގާނޫނެއް ހަދާ ފޮނުވީމަ، މިހާރު ހުންނެވި ރައީސުލްޖުމްހޫރިއްޔާ ލޯބީގެ ކަތުރަކުން ކަފާ ނިންމާލާކަށް. އެހެންވެ އަޅުގަނޑު ތާއީދު ނުކުރަނީ،" ކޮމިޓީ ބޮއިކޮޓް ކުރައްވާ ނުކުމެވަޑައިގަތުމުގެ ކުރިން ގާސިމް ވިދާޅުވި އެވެ.

ގާސިމް އެގޮތަށް ވާހަކަ ދެއްކެވުމުގެ ކުރިން އެމްއެންޕީގެ ރައީސް މާފަންނު އުތުރު ދާއިރާގެ މެންބަރު މުހައްމަދު ނާޒިމް ހުށަހެޅުއްވީ އެ ފީތައް ބޮޑު ކުރެވޭ މިންވަރު %10އަށް ހެދުމަށެވެ.

 ގާސިމްގެ ވާހަކަތަކަށް ފަހު، ނާޒިމް ވެސް ކޮންމެވެސް ވަރަކަށް ހިޔާލު ބަދަލުވެ، ގާސިމް ދެއްކެވި ބައެއް ވާހަކަތަކަށް ތާއީދުކުރެއްވި އެވެ.

"މާމިގިލީ ދާއިރާގެ މެންބަރު [ގާސިމް] ފާހަގަކުރެއްވީ، ވަރަށް މުހިންމު ނުކުތާއެއް. އަޅުގަނޑުމެންގެ އިގްތިސާދު މި ހާލަތުގައި އޮއްވާ މި އަދަދުތައް ބޮޑުކުރުމަށް ދިމާކުރުމަކީ ރަނގަޅު ކަމެއް ކަމަށް އަޅުގަނޑު ގަބޫލެއް ނުކުރަން. މިއީ ދިވެހިރާއްޖޭގައި އޮތް ނާޒުކު އިންޑަސްޓްރީތައް އެކީގައި ހަލާކުވެގެން ދާނެ ކަމެއް ކަމަށް އަޅުގަނޑު ގަބޫލުކުރަނީ،" ނާޒިމް ވިދާޅުވި އެވެ.

ނާޒިމް އެދިވަޑައިގެންނެވީ، ފީތައް ބޮޑުކުރާ މާއްދާއާ މެދު އިތުރަށް ވިސްނުމަށް ވަގުތު ދެއްވުމަށެވެ. އަދި މިކަމުގައި ސަރުކާރުގެ ވިސްނުމަކީ ކޮބާތޯ އިތުރަށް ބެލުމަށް އޭނާ ހުށަހެޅުއްވި އެވެ. ކޮމިޓީގައި އެހެން މެންބަރުން ވެސް އެ ހުށަހެޅުމަށް ތާއީދު ކުރެއްވި އެވެ.

ގާސިމް ކޯފާވެގެން ބައްދަލުވުމުން ނުކުމެވަޑައިގަތުމުން، ކޯރަމް ގެއްލި، މިއަދުގެ ބައްދަލުވުން އެންމެ ފަހުން ނިންމާލީ އެވެ.