ހިމާޔަތްކޮށްފައިވާ ސަރަހައްދުތަކުން ވެލި ނެގޭ ގޮތަށް ހެދީ 'ރާޖޫ'އަށްޓަކައި: އެމްޑީޕީ

ހިމާޔަތްކޮށްފައިވާ ސަރަހައްދުތަކުން ވެލި ނެގޭ ގޮތަށް މި ސަރުކާރުން ހެދީ ރަސްމާލެ މަޝްރޫއު ހަރަދު ކުޑަކޮށް ހިއްކުމުގެ ބޭނުމުގައި "ރާޖޫ"އަށްޓަކައި ކަމަށް ތުހުމަތުކޮށް، އެ ނިންމުން ބަދަލުކުރަން އިދިކޮޅު މައި ޕާޓީ، އެމްޑީޕީން ރޭ ގޮވާލައިފި އެވެ.

ވީ ކިހިނެއް؟ - މިދިޔަ ހޮނިހިރު ދުވަހު އެންވަޔަރަމަންޓް މިނިސްޓްރީން 'ރާއްޖޭގެ ރަށްރަށާއި ފަޅުގެ ސަރަހައްދު ހިއްކުމާއި ފުންކުރުމުގެ ގަވައިދު'އަށް ގެނައި އިސްލާހާ އެކު ހިމާޔަތްކޮށްފައިވާ ސަރަހައްދުތަކުން ވެލި ނެގުން ވަނީ ހުއްދަ ކޮށްފަ އެވެ. އެގޮތުން:

ބުނީ ކީކޭ؟ - "އަޅުގަނޑުމެން ވަރަށް ކަންބޮޑުވާ ކަމެއް މި ސަރުކާރުން ކުރައްވައިފި. ހިމާޔަތްކޮށްފައި އޮންނަ ސަރަހައްދުތަކުން ވެލި ނެގުމުގެ ކަންކަން ހުއްޓުވުމަށް ހަދާފައި އޮންނަ ގަވައިދު، ތިޔަ ވިދާޅުވާ ރާޖޫއަށްޓަކައި ބަދަލުކުރައްވައި[ފި]،" މިއީ، ތިމާވެށީގެ ހައްގުގައި މަސައްކަތް ކުރާ ފަރާތްތައް ވެސް ކަންބޮޑުވާ ކަމެއް ފާހަގަކުރައްވައި، އީސަ ވިދާޅުވި އެވެ.

ތަފްސީލު - އީސަ އެ އިޝާރާތް ކުރެއްވީ ރަސްމާލެ ސިޓީ ތަރައްގީ ކުރުމަށްޓަކައި ފުށިދިއްގަރު ފަޅު ހިއްކުމުގެ މަޝްރޫއު ހަވާލުކުރި ކެޕިޓަލް މެރިން އެންޑް އިންވެސްޓްމަންޓް (ސީއެމްސީ)ގެ ވެރިންގެ ތެރޭ ހިމެނޭ ސިވަރާޖަ މަނިވަންނަން (ރާޖޫ) އަށެވެ.

އީސަ ވިދާޅުވި ގޮތުގައި އެ ގަވައިދު އިސްލާހުކޮށްފައި ވަނީ ސީއެމްސީ ކުންފުނިން "ހަރަދު ކުޑަކޮށް އެ ސަރަހައްދާ ކައިރިން ވެލި ނަގައިގެން ރަސްމާލެ ޕްރެޖެކްޓް ހިއްކުމަށް މަގުފަހި ކުރުމުގެ ގޮތުން" ނެވެ.

"އެއީ ޓޫރިޒަމް އާއި މަސްވެރިކަމުގެ ސިނާއަތުގައި މަސައްކަތް ކުރައްވާ [އަދި] އިންވެސްޓްކުރައްވާފައި ތިބި ބޭފުޅުން ވަރަށް ކަންބޮޑުވާ ކަމެއް،" އީސަ ވިދާޅުވި އެވެ.

ރަށެއް ވިޔަސް، ފަޅެއް ވިޔަސް އަދި ފަރެއް ވިޔަސް ހިމާޔަތްކުރުމަށް ވަޒީރުންގެ މަޖިލީހުން ނިންމަނީ ވަރަށް ބޮޑަށް ދިރާސާކޮށް، ކޮންމެހެން ކުރަން ޖެހޭ ކަމެއްކަމަށް ގަބޫލު ކުރެވިގެން ކަމަށް އީސަ ވިދާޅުވި އެވެ. ގަވައިދުގައި ވެސް އެކަންކަން އެގޮތަށް ބަޔާން ކުރަނީ އެއީ އެކަން އޮންނަން ޖެހޭ އުސޫލު ކަމަށް ގަބޫލުކުރެވޭތީ ކަމަށް އޭނާ ފާހަގަކުރެއްވި އެވެ.

"އެހެން ނަމަވެސް މިއަދު މި ފެންނަނީ، އެ ގަވައިދު ބަދަލުކޮށް، ވަކި މަޝްރޫއުއަކަށް މަގުފަހިކުރުމަށްޓަކައި އެކަން ކުރެއްވި ތަން،" އީސަ ވިދާޅުވި އެވެ.

"މިކަމުގެ ސަބަބުން މާލެ އަތޮޅުގެ ރިސޯޓުތަކަށް އެކަމުގެ ގެއްލުން ދިގު މުސްތަގުބަލެއްގައި ލިބޭނީ ކިހާ މިންވަރަކަށްކަން އެއީ އަޅުގަނޑުމެން ކަންބޮޑުވާ ކަމެއް."

މަސްވެރިކަމާއި އެންވެރިކަމަށް ވެސް އެކަމުގެ ގެއްލުން ލިބޭނެކަން ފާހަގަކޮށް އޭނާ ވިދާޅުވީ، އެއީ "ފޫނުބެދޭނެ ވަރުގެ ގެއްލުމަކަށް ވުމަކީ އެކަށީގެންވާ" ކަމެއް ކަމަށެވެ.

"އަޅުގަނޑު ސަރުކާރަށް ގޮވާލަން، ރާޖޫއަށްޓަކައި އެ ގަވައިދަށް ގެނައު ބަދަލު މިހާރުން މިހާރަށް ކުރީގައި ގަވައިދު އޮތް ގޮތަށް ރުޖޫއަށްކޮށްދެއްވުމަށް،" ސަރުކާރުން އެފަދަ "ވިޔާނުދާ ކަންކަން" ކުރުން ހުއްޓާލުމަށް އެދިވަޑައިގެން އީސަ ވިދާޅުވި އެވެ.