ތިނަދޫ ކައުންސިލަށް ސިޓީގެ ދަރަޖަ ދޭ އިސްލާހު ރައީސް ތަސްދީގުކުރައްވައިފި

ގދ. ތިނަދޫ ކައުންސިލަށް މިހާރުން މިހާރަށް، ސިޓީ ކައުންސިލަކަށް ލިބިގެންވާ އެންމެހާ ބާރުތައް ލިބުމުގައި ގާނޫނީ ހުރަސްތަކެއް ހުރުމުން އެކަން ހައްލުކުރުމަށް އެމްޑީޕީގެ ފަރާތުން ލާމަރުކަޒީ ގާނޫނަށް އިސްލާހު ގެނައުމަށް ހުށަހެޅި ބިލު ރައީސް މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.

މައްސަލައިގެ ފެށުން - ކުރީގެ ރައީސް އިބްރާހިމް މުހައްމަދު ސޯލިހު ރިޔާސީ ކެމްެޕެއިނާ ދިމާކޮށް ތިނަދޫއަށް ވަޑައިގެން، ސިޓީއެއްގައި ހުންނަން ޖެހޭ ހުރިހާ ޝަރުތެއް ފުރިހަމަވެފައިވާ ކަމަށް ވިދާޅުވެ، އެ ރަށަކީ ސީޓީއެއް ކަމަށް އިއުލާން ކުރެއްވި އެވެ.

ވީ ކިހިނެއް؟ - އެމްޑީޕީގެ ފަރާތުން ތުޅާދޫ ދާއިރާގެ މެންބަރު ހިސާން ހުސައިން ހުށަހަޅުއްވި ބިލު، މިދިޔަ ހަފްތާ ހޯމަ ދުވަހު ރައްޔިތުންގެ މަޖިލީހުން ވަނީ 42 މެންބަރުންގެ ތާއީދާ އެކު ފާސްކޮށްފަ އެވެ.

ތަފްސީލު - ރައީސް މި ބިލު ތަސްދީގު ކުރެއްވުމާ އެކު، މިއަދުން ފެށިގެން މިހާރު އޮތް ތިނަދޫ ރަށު ކައުންސިލް، ސިޓީ ކައުންސިލަކަށް ބަދަލުވުމަށް ހުރަހެއް ނެތެވެ. އިސްލާހުގައި ބުނެފައި ވަނީ:

މިހާރު އޮތް ތިނަދޫ ކައުންސިލްގެ ފަސް އަހަރުގެ ދައުރު ހަމަވާނީ 2026 ވަނަ އަހަރު އެވެ. އެހެންކަމުން މި ކައުންސިލަށް އަދިވެސް ބާކީ ދެ އަހަރެއްހާ ދުވަސް އެބައޮތެވެ.

މި އިސްލާހުގެ 51 ވަނަ މާއްދާގެ (ރ)ގައި ވާގޮތުން ރަށު ކައުންސިލަކަށް ސިޓީ ކައުންސިލެއްގެ ދަރަޖަ ލިބޭއިރު ކައުންސިލްގެ ރައީސްއަކަށް ހުންނަ މީހަކު ސިޓީގެ މޭޔަރަށް އަދި ނައިބު ރައީސް ޑެޕިއުޓީ މޭޔަރަށް ބަދަލުވާނެ އެވެ. އޭގެ އިތުރުން ރަށު ކައުންސިލް މެންބަރުން ސިޓީ ކައުންސިލްގެ މެންބަަރުންނަށް ބަދަލުވާނެ ކަމަށް ވެސް ލިޔެފައިވެ އެވެ.

"މިގޮތަށް ބަދަލުވާ ސިޓީ ކައުންސިލް ދެމިއޮންނާނީ އެގޮތަށް ބަދަލުވި ރަށު ކައުންސިލްގެ ދައުރު ހަމަވަންދެން،" އެ އަކުރުގައި އިތުރަށް ބަޔާންކޮށްފައިވެ އެވެ.

އެހެންކަމުން މިހާރު އޮތް ތިނަދޫ ކައުންސިލްގެ ދައުރު ހަމަވަންދެން އެ ކައުންސިލަކީ ސިޓީ ކައުންސިލެއްގެ ގޮތުގައި ކަނޑައެޅޭނެ އެވެ.

ފާހަގަކޮށްލެވޭ - އެމްޑީޕީގެ ސަރުކާރުގައި ތިނަދޫއަށް ސިޓީގެ ދަރަޖަ ދިނުމުުގެ ކުރިން ރައީސް މުއިއްޒު ވެސް، ރިޔާސީ ކެމްޕެއިން ތެރޭ، ވަނީ އެމަނިކުފާނުގެ ސަރުކާރެއްގައި ތިނަދޫއަށް ސީޓީއެއްގެ ދަރަޖަ ދެއްވާނެ ކަމަށް ވައުދުވެވަޑައިގެންފަ އެވެ.