ރާއްޖެ އާއި އިންޑިއާއާ ދެމެދު އުފެދިފައިވާ ހަމަނުޖެހުމާ ގުޅިގެން މަޝްވަރާ ބައްދަލުވުމަކަށް އިންޑިއާގެ ހައި ކޮމިޝަނަރު ވަޑައިގަތުން. (ދައުރު ފޮޓޯ/މުހައްމަދު އަމާން)
ސިފައިން ގެންދިއުމުގެ މަޝްވަރާތައް ރާއްޖެ އާއި އިންޑިއާއިން ފަށައިފި
ރާއްޖޭގައި ތިބި އިންޑިއާގެ ސިފައިން ގެންދިއުމާ ގުޅޭ ރަސްމީ މަޝްވަރާތައް މިއަދު ފަށައިފި އެވެ.
ވީ ކިހިނެއް؟ - އެނގިފައިވާ ގޮތުގައި، މިއީ ދުބާއީގައި ބޭއްވި ކޮޕް28 ސަމިޓުގެ ހަވާސާގައި ރައީސް މުހައްމަދު މުއިއްޒާއި އިންޑިއާގެ ބޮޑުވަޒީރު ނަރެންދުރަ މޯދީ ބައްދަލުކުރައްވައި އިއުލާނުކުރެއްވި 'ކޯ ގްރޫޕު'ގެ ފުރަތަމަ ބައްދަލުވުމެވެ. މި ބައްދަލުވުމަށް އިންޑިއާގެ ބޭފުޅުން ފޮރިން މިނިސްޓްރީއަށް ވަޑައިގެންފައިވަނީ މިއަދު ހެނދުނު 9:30 ހާއިރު އެވެ.
ތަފްސީލް - އިންޑިއާގެ ފަރާތުން މި ބައްދަލުވުމުގައި ބައިވެރިވެވަޑައިގަންނަވަނީ، އެނގިފައިވާ ގޮތުގައި:
-
އިންޑިއާއިން ރާއްޖެއަށް ކަނޑައަޅާފައި ހުންނަވާ ހައި ކޮމިޝަނަރު މުނޫ މަހާވަރު
-
ހައި ކޮމިޝަނަރުގެ ނައިބު މަޔަންކް ސިންގް
-
އިންޑިއާގެ ހާރިޖިއްޔާގެ ފަރާތުން، އިންޑިއާ ކަނޑުގެ ކަންކަމަށް ހާއްސަ ޖޮއިންޓް ސެކްރެޓަރީ ޕުނީތު އަގަރުވާލް
-
އެޑްވައިޒަރު ކާނަލް ޔަޝް ވަރްދާން ޕަޓޭލް
-
ޑިފެންސް އެޑްވައިޒަރު ކެޕްޓަން ދީޕަކް ބާލީ
-
އިންޑިއާގެ ކަނޑުގެ ސިފައިންގެ ކޮމާންޑަރު ޕާރްތާ ޔޫ ބަޓް
-
އިންޑިއާގެ ކޯސްޓްގާޑުގެ ޑީއައިޖީ ބިބޫތީ ރަންޖަން
-
ރާއްޖޭގައި ހުންނަ އިންޑިއާގެ އެމްބަސީގެ ފަސްޓް ސެކްރެޓަރީ (ޕޮލިޓިކަލް) ކަރަން ޔާދާވް
-
ރާއްޖޭގައި ހުންނަ އިންޑިއާގެ އެމްބަސީގެ ފަސްޓް ސެކްރެޓަރީ (ޕްރޮޖެކްޓްސް އެންޑް ކޮމާސް) ކިރަން ހަޓްރީ
ރާއްޖެ ތަމްސީލުކުރައްވަނީ:
-
ރައީސް އޮފީހުގެ ޗީފް އޮފް ސްޓާފް އަބްދުﷲ ފަަޔާޒު
-
ޗީފް އޮފް ޑިފެންސް ފޯސް، މޭޖަ ޖެނެރަލް އަބްދުއްރަހީމް އަބްދުﷲ
-
ފޮރިން މިނިސްޓްރީގެ އެމްބެސެޑަރު އެޓް ލާޖު ޑރ. އަލީ ނަސީރު
-
ފޮރިން މިނިސްޓްރީގެ ސެކްރެޓަރީ، ބައިލެޓެރަލް ޑރ. ހާލާ ހަމީދު
-
އިންޑިއާގައި ހުންނަވާ ދިވެހި ސަފީރު އިބްރާހިމް ޝަހީބު
-
ފޮރިން މިނިސްޓްރީގެ އެޑިޝަނަލް ސެކްރެޓަރީ އައިޝަތު އަޒީމާ
-
ފޮރިން މިނިސްޓްރީގެ ޑިރެކްޓަރު އަހުމަދު ސުޒިލް
މި ބައްދަލުވުމަށް، ދިވެހި ސިފައިންގެ ޗީފް އޮފް ޑިފެންސް ފޯސް މޭޖަ ޖެނެރަލް އަބްދުއްރަހީމް އަބްދުﷲ ވެސް އެ މިނިސްޓްރީއަށް ވަދެވަޑައިގަތް ތަން އެ ތަނުގައި ތިބި 'ދައުރު'ގެ ނޫސްވެރިންނަށް ފެނިފައިވެ އެވެ.
ބުނީ ކީކޭ؟ - އެ ބައްދަލުވުމަކީ، ބައިލެޓަރަލް މަޝްވަރާތަކެއް ބޭއްވުމަށްޓަކައި ކުރިއަށް ގެންދާ ބައްދަލުވުމެއް ކަމަށް ފޮރިން މިނިސްޓްރީގެ އޮފިޝަލަކު ވިދާޅުވި އެވެ. ނަމަވެސް، އިތުރު ތަފްސީލެއް ނުދެއްވަ އެވެ.
އެނގުން މުހިންމު - ރާއްޖޭން އެންމެ ފަހުން ބުނެފައި ވަނީ، އިންޑިއާގެ 80 ސިފައިން ރާއްޖޭގައި އެބަތިބި ކަމަށެވެ. ރާއްޖޭން މިހާރު ވަނީ އިންޑިއާގެ ސިފައިން އަނބުރާ ގެންދާނެ ތާރީހެއް އަންނަ މާޗުގެ ކުރިން ދިނުމަށް އިންޑިއާ ސަރުކާރުގެ ކިބައިން އެދިފަ އެވެ.
ފާހަގަކޮށްލެވޭ - ރާއްޖެއާއި އިންޑިއާއާ ދެމެދު މި ބައްދަލުވުމުން ބާއްވާފައިވަނީ، ރައީސް މުހައްމަދު މުއިއްޒު އިންޑިއާއަށް ވަރުގަދަ ބަސްތަކެއް ރައްދު ކުރައްވާފައި ވަނިކޮށެވެ. އެގޮތުން، ރައީސް އިއްޔެ ވިދާޅުވެފައިވަނީ:
-
ރާއްޖެ އަކީ އެއްވެސް ގައުމެއްގެ ބެކްޔާޑެއް ނޫން ކަމަށާއި، އިންޑިއާ ކަނޑަކީ ވަކި ގައުމެއްގެ މިލްކެއް ނޫން ކަމަށް
-
ރާއްޖެ އުފެދިފައިވާ ގޮތުން ކުޑަވުމަކީ އެއްވެސް ގައުމަކަށް ރާއްޖެ "ބުލީ" ކުރަން ލިބޭ ހުއްދައެއް ނޫން ކަމަށް
ރައީސް މުއިއްޒު ވެރިކަމާ ހަވާލުވެވަޑައިގަތުމަށް ފަހު، އެ މަނިކުފާނު ގެންދަވަނީ އިންޑިއާއަށް ބަރޯސާވާ މިންވަރު ކުޑަކުރުމަށް ފިޔަވަޅުތަކެއް އަޅުއްވަމުންނެވެ. ވަކި ގައުމަކަށް ބަރޯސާވުން ނިމުމަކަށް ގެންނެވުމަށްޓަކައި، ރައީސް އިއްޔެ އިއުލާނު ކުރައްވާފައިވަނީ:
-
1 މާޗުން ފެށިގެން ރާއްޖޭން އަމިއްލައަށް އެއާ އެމްބިއުލާންސް ތައާރަފް ކުރުމާ އެކު، އިންޑިއާގެ އުޅަނދުތައް އެ މަސައްކަތުގައި ބޭނުމެއް ނުކުރާނެ
-
ކާބޯތަކެތީގެ ޔަގީންކަން ދެމެހެއްޓެނިވި ގޮތެއްގައި ހަަމަޖެއްސުމަށް ރާއްޖޭގައި އަމިއްލައަށް ހެއްދޭ ތަކެތި ހެއްދުމަށް ޗައިނާއާ އެކު ވަނީ މަޝްވަރާކުރެވިފައި
-
ކާޑުގެ ބާވަތްތައް ގެނައުމަށް ތުރުކީއާ އެކު އެއްބަސްވުމެއް މިހާރު ވަނީ ހަދާފައި؛ އެ އެއްބަސްވުމުގެ ދަށުން ގަތް ފުރަތަމަ ޝިޕްމަންޓް އަންނަ މަހު އަންނާނެ
-
އާދައިގެ ބޭސް އިންޑިއާ އިން ގެނައުން ހުއްޓާލުމަށްޓަކައި، ސީދާ ޔޫރަޕް އަދި އެމެރިކާ އިން ބޭސް ގެނައުމުގެ މަސައްކަތް ވަނީ ފަށާފައި
ކޮމެންޓް (3)
މުދިމް
ޒަމީރު
ހާޖީ