'މަސްދަރު ހިމާޔަތް ކުރަން' ފިޔާޒު ވެސް ހުންނެވީ ހަނު؛ ވިދާޅުވީ ޖަލަށް ދާން ޖެހުނަސް ހާމަ ނުކުރައްވާނެ ކަމަށް

ރައީސް މުހައްމަދު މުއިއްޒަށް ތުހުމަތުތަކެއްކޮށް ޑޮކިއުމެންޓްރީއެއް ޝާއިއު ކުރި މައްސަލައިގެ ތަހުގީގަށް ބަޔާން ނެގުމަށް 'އަދަދު' ނޫހުގެ ސީއީއޯ ހުސައިން ފިޔާޒު މޫސާ މިއަދު ފުލުހަށް ހާޒިރުކޮށްފި އެވެ. މަސްދަރު ހާމަ ކުރަން ޖެހޭ ގޮތަށް ފުލުހުން ސުވާލު ކުރުމުން، ގާނޫނުއަސާސީ ލިބިދޭ ހަނު ހުރުމުގެ ހައްގު ބޭނުންކޮށްފައިވާ ކަމަށް އޭނާގެ ވަކީލުން ވިދާޅުވި އެވެ.

ވީ ކިހިނެއް؟ - އެ ނޫހުން މިދިޔަ މަހު 28ގައި ގެނެސްދިން 'އައިޝާ' ޑޮކިއުމެންޓްރީގެ މައްސަލައިގައި ފުލުހުން މިދިޔަ ހޯމަ ދުވަހު ވަނީ އެ ނޫސް ހިންގާ އޮފީސް ކޯޓު އަމުރެއްގެ ދަށުން ބަލައި ފާސްކޮށްފަ އެވެ. އެގޮތުން:

ތަފްސީލު - ފުލުހުންގެ ތަހުގީގުތައް ކުރިއަށް ގެންދާ ސާޖެންޓް އާދަމް ހަލީމް ކްރިމިނަލް އިންވެެސްޓިގޭޝަން ބިިލްޑިންގައި 30އަކަށް މިނެޓު ހޭދަކުރެއްވުމަށް ފަހު، އެ އިދާރާގެ ބޭރުގައި ހުންނަވައި ނޫސްވެރިންނާ ވާހަކަދައްކަވަމުން ފިޔާޒުގެ ގާނޫނީ ވަކީލު އަދި ކުރީގެ މަޖިލިސް މެންބަރު އަލީ ހުސައިން ވިދާޅުވީ:

"އަޅުގަނޑުމެން ނިންމީ ހަނު ހުރުމަށް. އޭގެ ސަބަބުތަކެއް ވެސްވޭ. އެއީ އަޅުގަނޑުގެ ކްލަޔަންޓް، ހުސައިން ފިޔާޒު މުސާ މިއަދާ ހިސާބަށް ކުރި މި މަސައްކަތުގެ އެންމެ މުހިންމު ކަމަކީ މަސްދަރު ހިމާޔަތް ކުރުމަށް. އެއީ މައުލޫމާތު ދޭން ތިބޭ މީހުންގެ މަސްދަރު ހިމާޔަތްކޮށް އެ މީހުންގެ ސަލާމަތާއި ރައްކާތެރިކަން ކަށަވަރުކުރުން،" މިފަހުން ކޯޓުގައި ހިނގި ބޮޑެތި މައްސަލަތަކުގައި ވެސް ވަކީލެއްގެ ގޮތުގައި އިސްކޮށް މަސައްކަތް ކުރެއްވި އަލީ ހުސައިން ވިދާޅުވި އެވެ.

އަލީ ހުސައިން ވިދާޅުވި ގޮތުގައި، ފުލުހުން "ސުވާލުތައް ވެސް އަމާޒުކޮށްފައި ވަނީ ވެސް މަސްދަރު ހާމަ ކުރަން ޖެހޭ ގޮތަށް" ކަމަށެވެ. އެހެންވެ، ނިންމީ ހަނު ހުރުމުގެ ހައްގު ބޭނުންކުރުމަށް ކަމަށް އޭނާ ވިދާޅުވި އެވެ. އެއާ އެކު، އޭނާ ވިދާޅުވީ:

"މަސްދަރު ހާމަ ކުރުމަށް އެފަދަ ކޯޓު އަމުރެއް ވެސް ނެތް، އެފަދަ ހާލަތެއް ވެސް ނެތް،" އަލީ ހުސައިން ވިދާޅުވި އެވެ.

ފިޔާޒު ވިދާޅުވީ، މި ކަމަކީ ހަމައެކަނި އަދަދު ނޫހަށް ބިރު ދެއްކުމަށް ކުރާ ކަމެއް ނޫން ކަމަށާއި މިއީ ހުރިހާ ނޫސްވެރިންނަށާއި ނޫސްވެރިކަމުގެ މަސައްކަތުގެ ބޭރުން ސަރުކާރުގައި ހިޔާނާތާއި ވައްކަމުގެ ވާހަކަތައް ރިޕޯޓު ފަރާތްތަކަށް ވެސް ބިރު ދެއްކުމަށް ކުރާ ކަމެއް ކަމަށެވެ. ނަމަވެސް އެކަން އެގޮތަށް ނުހިނގާނެކަން އޭނާ ފާހަގަ ކުރެއްވި އެވެ.

"[މަސްދަރުތަކުން] މައުލޫމާތު މި ދެނީ ވަރަށް އިތުބާރުކޮށްފައި. އެހެންވެ އަޅުގަނޑު ހަނު ހުރުމުގެ ހައްގު ބޭނުން މި ކުރީ ދިވެހި ރައްޔިތުންގެ ހައްގުގައި. އަޅުގަނޑުމެންނަށްދޭ މައުލޫމާތަކީ، ރައްކާތެރިކަމާ އެކު ބަލަހައްޓާނެ މައުލޫމާތެއްކަން އަދި އަޅުގަނޑުމެން އުމުރު ދުވަހު [ޖަލުގައި] އޮންނަން ޖެހުނަސް މަސްދަރު ހިމާޔަތް ކުރާނެ ކަމުގެ ޔަގީންކަން ދެން،" ފިޔާޒު ވިދާޅުވި އެވެ.

އަދަދުގެ އެޑިޓަރު ހަސަންއެކޭ އެއްގޮތަށް ފިޔާޒަށް ވެސް މި މައްސަލައިގައި ފަސް ޖިނާއީ ތުހުމަތެއް ކުރެ އެވެ. އެއީ:

މި މައްސަލައިގައި މިދިޔަ ހޯމަ ދުވަހުގެ ރޭ ފުލުހުން ވަނީ ކޯޓު އަމުރަކާ އެކު އެ އިދާރާ ބަލައި ފާސްކޮށް، ގިނަ އަދަދެއްގެ އިލެކްޓްރޯނިކް ސާމާނު ގެންގޮސްފަ އެވެ. އޭގެ ތެރޭގައި ނޫސްވެރިންގެ ލެޕްޓޮޕް ފަދަ ތަކެތި ހިމެނެ އެވެ. އަދި ފިޔާޒާއި ހަސަންގެ ޕާސްޕޯޓު ވެސް ވަނީ ހިފަހައްޓާފަ އެވެ. 

މިކަމުގައި ނޫސްވެރިންގެ ޖަމިއްޔާ އާއި ބޭރުގެ ޖަމިއްޔާތަކުން ވަނީ އެކަން ކުށްވެރިކޮށް، ކަންބޮޑުވުން ފާޅުކޮށްފަ އެވެ.

ފަސް މަންޒަރު - ރައީސްއަށް ތުހުމަތުތަކެއްކޮށް 'އައިޝާ'ގެ ނަމުގައި 'އަދަދު' ނޫހުން އެ ޑޮކިއުމެންޓްރީ ގެނެސްދީފައި ވަނީ މިދިޔަ މަހުގެ 28ގަ އެވެ. އެ ޑޮކިއުމެންޓްރީގައި، ރައީސް އޮފީހުގައި ވަޒީފާ އަދާކުރި ކަމަށް ބުނާ އަންހެނަކު ވަނީ ކާކުކަން ނޭނގޭ ގޮތަށް ރައީސް މުއިއްޒުއާ ގުޅުވައި އަހުލާގީ ގޮތުން ދަށް ވާހަކަތަކެއް ދައްކައިފަ އެވެ. އެގޮތުން: