ބާރުތައް ބޭނުން ކުރީ ގާނޫނާއި ގަވައިދުގެ ތެރެއިން: ފުލުހުން

އިދިކޮޅު އެމްޑީޕީން ރޭ 'ލޫޓުވައިފި ލޫޓުވައިފި' ނަމުގައި މާލޭގައި ބޭއްވި އެއްވުމުގައި ފުލުހުން ގާނޫނާ ހިލާފަށް ބާރުގެ ބޭނުން ކުރި ކަމަށް ބުނެ ކަންބޮޑުވުން ފާޅު ކުރަމުން ދަނިކޮށް، ބާރު ބޭނުން ކުރި ގޮތް އެ މުއައްސަސާއިން މިރޭ ދިފާއުކޮށްފި އެވެ. ފުލުހުން ބުނީ މުޒަހަރާއަށް ހުރަސް އަޅަން ބޭނުންކޮށްފައިވަނީ ގާނޫނާއި ގަވައިދުތަކުން ބޭނުން ކުރަން ހުއްދަކޮށްފައިވާ ބާރުތަކެއް ކަމަށެވެ.

ވީ ކިހިނެއް؟ - ރޭގެ މުޒަހާރާ ރޫޅާލުމަށް ފުލުހުން ބޭނުން ކުރި ތޫނު އަޑު ފޮނުވާ ލޯންގް ރޭންޖް އެކޫސްޓިކް ޑިވައިސް (އެލްއާރުއޭޑީ)ގެ ސަބަބުން މުޒާހަރާގެ ބައިވެރިންނަށް އެކި ސިއްހީ މައްސަލަތައް ވަނީ ކުރިމަތިވެފަ އެވެ.

ފަހުގެ ތާރީހުގައި މުޒާހަރާއެއް ރޫޅާލުމަށް ފުލުހުން ބޭނުން ކޮށްފައި ނުވާ އެ އާލާތަކީ އެ މުއައްސަސާއަށް ބޭނުން ކުރުމުގެ ހުއްދަ ލިބިގެން ނުވާ އާލާތެއް ކަމަށް ބުނެ ބައެއް ވަކީލުން ވެސް ދަނީ އެކަމާ ކަންބޮޑުވުން ފާޅު ކުރަމުންނެވެ. އެ ކަންބޮޑުވުންތަކާ ގުޅިގެން ފުލުހުން މިރޭ ވަނީ ބަޔާނެއް ނެރެފަ އެވެ.

ތަފްސީލު - ފުލުހުންގެ ބަޔާނުގައި ބުނީ މުޒާހަރާއަށް ހުރަސް އެޅީ އެމްޑީޕީއާ އެކު ވެފައިވާ އެއްބަސްވުމާ ހިލާފަށް މުޒާހަރާ ކުރިއަށް ގެންދިއުމަށް މަސައްކަތް ކުރުމުން ކަމަށެވެ. އެގޮތުން، ފުލުހުން ބުނީ:

"އެއްވުން ހުއްޓުވުމަށް ފުލުހުން ބާރުގެ ބޭނުންކޮށްފައިވަނީ ގާނޫނު ނަންބަރު 34/2020 (ފުލުހުންގެ ހިދުމަތުގެ ގާނޫނު) އާއި އެ ގާނޫނުގެ ދަށުން ހެދިފައިވާ ގަވައިދުތަކުން ފުލުހުންނަށް ލިބިދޭ ގާނޫނީ ބާރާއި އިހްތިޔާރުގެ ދާއިރާގެ ތެރެއިން ކަމުގައި ދަންނަވަމެވެ،" ފުލުހުންގެ ބަޔާނުގައި ބުންޏެވެ.

މި ބަޔާނުގައި ރޭ ފުލުހުން ބޭނުން ކުރި ބާރުގަދަ އެލާމް ބޭނުންކޮށްފައިވަނީ އެ ދެ ގަވައިދުގެ ކޮން މާއްދާއަކުން ބާރު ލިބިގެން ކަމެއް ފާހަގަކޮށްފައެއް ނުވެ އެވެ. ވަކި ކަމެއް ފާހަގަނުކޮށް، ޖުމްލަ ގޮތެއްގައި ބޭނުން ކުރި ހުރިހާ ބާރެއް ވެސް ބޭނުންކޮށްފައިވަނީ ހުއްދަ ގޮތުގައިކަން އެ ބަޔާނުގައި ފާހަގަކޮށްފައިވެ އެވެ.

ބަޔާނުގައި ބުނީ އެއްވުން ހުއްޓުވުމަށް ފުލުހުން ބޭނުންކޮށްފައިވާ ބާރަކީ އެފަދަ ހާލަތެއްގައި ބޭނުންކުރުމަށް 'ހަތިޔާރު ހޯދުމާއި ގެންގުޅުމުގެ ގަވައިދު' އަދި 'ފުލުހުންނަށް ލިބިދީފައިވާ ބާރާއި އިހުތިޔާރުގެ ބޭނުންކުރުމުގައި އަމަލުކުރާނެ ގޮތުގެ ގަވައިދު'ގައި "ހުއްދަކޮށްފައިވާ ބާރުތަކެއް" ކަމަށެވެ.

"[އެ ދެ ގަވައިދުގެ ދަށުން] ބާރުތައް ބޭނުން ކުރުމުގައި ނަގަހައްޓަން ޖެހޭ އަސާސްތައް ނަގަހައްޓާފައިވާނެ ކަމުގައި ވެސް ދަންނަވަމެވެ،" ފުލުހުން ބުންޏެވެ.

އެނގުން މުހިންމު - ރޭގޭ މުޒާހަރާ ތެރެއިން ބައެއް ފުލުހުން ބައެއް އަނިޔާވެރި އަމަލުތައް ހިންގި ތަން އެއްވުން ކަވަރު ކުރި ނޫސްވެރިންނަށް ފެނިފައިވެ އެވެ. މުޒާހަރާގެ ބައިވެރިންގެ ސީދާ މޫނަށް އަމާޒުކޮށް ޕެެޕާ ސްޕްރޭ ޖެހުމާއި ބައެއް މީހުން ހައްޔަރު ކުރުމުގައި ގަސްތުފައި އަނިޔާވާ ގޮތަށް ބައެއް ފުލުހުންގެ ފަރާތުން އަމަލުތައް ފެނިފައިވެ އެވެ.

އޭގެ އިތުރުން، ރޭގެ މުޒާހަރާ ރޫޅާލުމުގައި ފުލުހުން ބާރުގެ ބޭނުން ކުރުމުގެ ތެރޭގައި މުޒާހަރާގެ ބައިވެރިއަކަށް ހާޓް އެޓޭކެއް ޖެހި، ހޮސްޕިޓަލުގައި ރެއިން ފެށިގެން ދަނީ ފަރުވާ ދެމުންނެވެ.