ކައުންސިލުތަކުގެ ބާރު ހަނިކުރި އިސްލާހުތަކަށް ގާސިމްގެ ސާބަސް

ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ސަރުކާރުން ގެނައި އިސްލާހުތަކަށް ޖުމްހޫރީ ޕާޓީ (ޖޭޕީގެ) ލީޑަރު ގާސިމް އިބްރާހިމް މިއަދު ތާއީދުކުރައްވައިފި އެވެ.

ވީ ކިހިނެއް؟ - ކައުންސިލުތަކަށް ލިިބޭ ބޮޑެތި ބާރުތަކެއް އުނިވާނެ ފަދަ ގޮތަކަށް ލާމަރުކަޒީ ގާނޫނަށް ގެނައި އިސްލާހުތައް ރައީސް ވަނީ ތަސްދީގުކުރައްވާފަ އެވެ. މި އިސްލާހު ފާސްކޮށްފައިވަނީ އެކަމާ ގުޅިގެން ކައުންސިލުތަކުގެ ވެސް ބޮޑެތި ކަންބޮޑުވުންތަކަކާއި ފާޑުކިއުންތަކެއް އަމާޒުވެފައިވަނިކޮށެވެ. މި އިސްލާހުތަކަށް ގާސިމް ތާއީދުކުރެއްވީ މިއަދު 'އެކްސް'ގައި ކުރެއްވި ޕޯސްޓެއްގަ އެވެ.

ބުނީ ކީކޭ؟ - މާމިނގިލީ ދާއިރާގެ މެމްބަރުކަން ވެސް ކުރައްވަމުން ގެންދަވާ ގާސިމްގެ އެ ޕޯސްޓެއްގައި ވިދާޅުވީ:

"އަޅުގަނޑު ދެކޭގޮތުގައި ލާމަރުކަޒީ ގާނޫނަށް ގެނައި އިސްލާހުތަކަކީ ވަރަށް މުހިންމު އިސްލާހުތަކެއް. ވަރަށް ބޮޑަށް ބޭނުންޖެހިފައިވާ އިސްލާހެއް ކަމުގައި ދަންނަވާލަން ބޭނުން. އަޅުގަނޑު ވެސް ގަބޫލުކުރަނީ ރައީސް މުހައްމަދު މުއިއްޒު ވިދާޅުވި ފަދައިން މި އިސްލާހުތަކަކީ އެ ނިޒާމު ހަރުދަނާކުރުމަށް، ޗެމްޕިއަން ކުރުމަށް ގެންނަންޖެހޭ އިސްލާހުތަކެއް ކަމަށް،" ގާސިމްގެ ޕޯސްޓުގައި ވެއެވެ.

ގާސިމް ވިދާޅުވީ:

ގާސިމް ވިދާޅުވީ މި އިސްލާހުގެ ސަބަބުން ފައިދާވާނީ ރައްޔިތުންނަށް ކަމަށެވެ. އެގޮތުން ލޯކަލް އޮތޯރަޓީ ކުންފުނިތަކުން ކުރާ ވިޔަފާރީގެ މަސައްކަތްތަކަކީ ރަށުގެ އަމިއްލަ ފަރާތަކުން ކުރާ ވިޔަފާރިއަކަށް ވެގެން ނުވާނެ ގޮތަކަށް އެ ގާނޫނަށް ގެނެސްފައިވާ އިސްލާހަކީ ވެސް އެރަށެއްގެ އާންމުންނާއި އާންމު ވިޔަފާރިތަކަށް ލިބޭ ފައިދާއެއްކަން ގާސިމް ފާހަގަކުރެއްވި އެވެ.

"އެހެންކަމުން މި އިސްލާހުތަކުގެ ފައިދާ މާބޮޑަށް ވެސް އޮތީ އާންމު ރައްޔިތުންނަށް. އެހެންކަމުން މިއީ ރައީސް މުއިއްޒު ވިދާޅުވެފައިވާ ފަދައިން ލާމަރުކަޒީ ނިޒާމު ހަރުދަނާކުރުމަށް ޗެމްޕިއަން ކުރުމަށް ގެންނަންޖެހޭ އިސްލާހުތަކެއް ކަމީ ޝައްކެއް އޮތްކަމެއް ނޫން،" ގާސިމް ވިދާޅުވި އެވެ.