މިނިސްޓްރީން ބުނަނީ ފްލެޓް ކޮމިޓީގެ ރިޕޯޓު އަލިފާނުގައި އަނދައިގެން ގޮސްފައިވާ ކަމަށް

މިދިޔަ ސަރުކާރުގައި 'ގެދޮރުވެރިޔާ' ސްކީމުން ފްލެޓު ލިބޭ މީހުން ކަނޑައެޅި ފްލެޓު ކޮމިޓީގެ ރިޕޯޓާއި އެކަމާ ގުޅޭ ގޮތުން އެ ކޮމިޓީން ކޮށްފައިވާ އެއްވެސް މަސައްކަތެއް މިހާރު ފެންނަން ނެތް ކަމަށް ހައުސިން މިނިސްޓްރީން އިއްޔެ ބުނެފި އެވެ. އެ ތަކެތި ނެތީ އެ މިނިސްޓްރީ ކުރިން ހިންގި އިމާރާތުގައި މިދިޔަ ޑިސެމްބަރުގައި ހިނގި އަލިފާނުގެ ހާދިސާގައި އެ ތަކެތި އަނދައިގެން ގޮސްފައިވާތީ ކަމަށް އެ މިިނިސްޓްރީން ބުންޏެވެ.

ވީ ކިހިނެއް؟ - ފްލެޓު ލިބޭ މީހުން ކަނޑައަޅަން މިދިޔަ ސަރުކާރުގައި އެކުލަވާލި ކޮމިޓީ ރިޕޯޓާއި އެ ކޮމިޓީން ކުރި މަސައްކަތުގެ ތަފްސީލު އެ މިނިސްޓްރީގައި މިހާރު ނެތް ކަމަށް މިނިސްޓްރީން ބުނީ، އެ މައުލޫމާތު ނުދީގެން، އިންފޮމޭޝަން ކޮމިޝަނަރުގެ އޮފީހަށް ހުށަހަޅާފައިވާ މައްސަލައެއްގައި އިއްޔެ ބޭއްވި އަޑުއެހުމެއްގަ އެވެ. އެ މައުލޫމާތު ހޯދަން އެދިފައި އޮތީ 'ފަހި ޔޫނިއަން'ގެ ފަރާތުން އިސްމާއިލް ނާއިފް ކިޔާ މީހެކެވެ.

"12 ޑިސެމްބަރު 2024ގައި ކުރީގެ ހައުސިން މިނިސްޓްރީ ހިންގަމުންދިޔަ އިމާރާތުގައި ހިނގާދިޔަ އަލިފާނުގެ ހާދިސާގައި މިނިސްޓްރީގެ ސާވާއަށް ގެއްލުންތަކެއް ލިބިފައިވާތީ މައުލޫމާތު ރިކަވާކުރުމުގެ މަސައްކަތްކުރިއަށްދާ ވާހަކަ ދަންނަވަމެވެ. އަދި ތިފަރާތުން އެދިފައިވާ މައުލޫމާތު ރިކަވާކުރެވުނުހާ އަވަހަކަށް ހިއްސާކުރާނެ ކަމުގައި ދަންނަވަމެވެ،" މިނިސްޓްރީން އެކަމާ ގުޅޭ ގޮތުން ފޮނުވި ޖަވާބުގައިވެ އެވެ. 

އެނގުން މުހިންމު - ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގައި ހިންގި އެ ސްކީމުގެ ދަށުން އިންޑިއާގެ ދެ ކުންފުންޏަކާ ހަވާލުކޮށްގެން ހުޅުމާލޭގައި އަޅާ 4،000 ހައުސިން ޔުނިޓު ލިބޭ މީހުން އެ ސަރުކާރުގެ ފަހުކޮޅުގައި އޮތީ ކަނޑައަޅާފަ އެވެ. މި ސްކީމަށް ކުރިމަތިލާފައިވާ ފަރާތްތައް އިވެލުއޭޓްކޮށް ބިމާއި ފްލެޓް ދޭނެ ފަރާތްތައް ކަނޑައަޅާފައިވަނީ އޭރުގެ ސަރުކާރުން އުފެއްދި ކޮމިޓީއަކުންނެވެ.

އެކަމަކު ރައީސް މުހައްމަދު މުއިއްޒު ވެރިކަމާ ހަވާލުވެވަޑައިގަތުމަށް ފަހު އާ ސަރުކާރުން ބޭނުންވީ އެ ލިސްޓު މުރާޖައާ ކުރާށެވެ. އެހެންވެ، އާ ކޮމިޓީއެއް އުފައްދައިގެން، ލިސްޓު އަލުން ބެލުމަށް ފަހު މިދިޔަ ފެބްރުއަރީ މަހުގެ ފަހުކޮޅު އާ ލިސްޓެއް ވަނީ އާންމުކޮށްފަ އެވެ. އެ ލިސްޓުގައި ފްލެޓް ލިބުމަށް ޝަރުތުހަމަވާ ކަމަށް ކަނޑައަޅާފައި އޮތީ އެންމެ 1،820 މީހުންނަށެވެ.

ބުނީ ކީކޭ؟ - އިއްޔެގެ އަޑުއެހުމުގައި ނާއިފް ބުނީ ފްލެޓު ލިސްޓު ދިރާސާކުރަން މި ސަރުކާރުން ފަށައި އެކަމަށް އާ ކޮމިޓީއެއް ހަަދައިގެން މަސައްކަތް ފެށީ ވެސް ކުރީގެ ސަރުކާރުގައި ފްލެޓް ލިބޭ މީހުން ކަނޑައެޅި ކޮމިޓީން ކޮށްފައިވާ މަސައްކަތް ގޯސް ކަމަށް ބުނެ ކަމަށެވެ. އެހެންކަމުން، އެ މައުލޫމާތަކީ ހުންނަންޖެހޭނެ މައުލޫމާތެއް ކަމަށާއި، "މިނިސްޓްރީ އަނދައިގެން ދިޔަ" ބަހަނާ ނުދެއްކޭނެ ކަމަށް އޭނާ ބުންޏެވެ.

އޭނާ ބުނީ:

"ބަހަނާއެއްގެ ގޮތުގައި ދައުލަތުގެ އިދާރާއަކުން ނަގާ ވަރުގެ ވާހަކައެއް ނޫން އެއީ ހައުސިން މިނިސްޓްރީ އަނދައިގެން ދިއުމުން އެބޭފުޅުން އެ ރިޕޯޓު އަނދައިގެންދިޔަ ކަމަށް. އެއީ ބުއްދި ގަބޫލުކުރެވޭނެ ކަމެއް ނޫން،" ނާއިފް ބުންޏެވެ.

އެއަށް ފަހު އިއްޔެގެ އަޑުއެހުމުގައި މިނިސްޓްރީން ބުނީ، ރައީސް އޮފީހާ އެ މައުލޫމާތު ހިއްސާކޮށްފައިވޭތޯ ބެލުމަށް ފަހު އަންނަ އާދިއްތަ ދުވަހުގެ ނިޔަލަށް ޖަވާބެއް ދޭނެ ކަމަށެވެ. އެ މައުލޫމާތު މިނިސްޓްރީގެ އެއްވެސް އިދާރާއެއްގައި ރައްކާކޮށްފައި ވެސް ނުވަނީތޯ ސުވާލުކުރުމުން މިނިސްޓްރީން ބުނީ "ފެންނާކަށް ނެތް" ކަމަށެވެ.

ސާވާ ރިކަވާކުރުމާ ގުޅޭ ގޮތުން އެ އަޑުއެހުމުގައި މިނިސްޓްރީން ބުނީ އަދިވެސް އެ މަސައްކަތް ކުރިއަށްދާ ކަމަށާއި ރިކަވާކުރެވޭނެ ވަކި ތާރީހެއް ނޭނގޭ ކަމަށެވެ.

އެ ކޮމިޓީއަށް ދިޔަ ހަރަދުގެ ތަފްސީލު ދިނުމަށް ވެސް ނާއިފް އެދިފައިވެ އެވެ. އޭގެ ޖަވާބުގައި މިނިސްޓްރީން ބުނެފައިވަނީ:

މިނިސްޓްރީ ބަދަލު ވިޔަސް، މިހާރުގެ މިނިސްޓްރީގެ ވެސް އޮތީ އެއް މެންޑޭޓެއް ކަމުން، އެ މައުލޫމާތުތައް ބަަލަހައްޓަމުންދާނީ މިނިސްޓްރީން ނޫންތޯ އިންފޮމޭޝަން ކޮމިޝަނަރު އޮފީހުގެ ސެކެޓްރީ ޖެނަރަލް އިދްރީސް އިސްމާއިލް އެ އަޑުއެހުމުގައި ސުވާލުކުރައްވާފައިވެ އެވެ.

ޖަވާބުގައި މިނިސްޓްރީން ބުނީ:

މިނިސްޓްރީން ބުނީ އެ މައުލޫމާތު ބަލަހައްޓާފައިވާނެ ކަމަށް ގަބޫލުކުރެވެނީ ފިނޭންސް މިނިސްޓްރީން ކަމަށެވެ. އެހެންވެ، އެ މައުލޫމާތު ފިނޭންސް މިނިސްޓްރީގެ ފަރާތުން ސާފުކުރުމަށް އެ އަޑުއެހުމުގައި އެދުމުން މިނިސްޓްރީން ބުނީ ޗެކްކުރާނެ ކަމަށެވެ.

ފާހަގަކޮށްލެވޭ ކަމެއް - ފްލެޓް ކޮމިޓީގެ މަސައްކަތުގެ ތަފްސީލުތަކާ ގުޅޭ ލިޔެކިއުންތައް މިނިސްޓްރީގައި ނެތް ކަމަށް އެ މިނިސްޓްރީން އިއްޔެ ބުނިއިރު، ހައުސިން މިނިސްޓަރު ޑރ. އަބްދުﷲ މުއްތޮލިބު މީގެ ކުރިން ވިދާޅުވީ ސާވާއަށް ލިބުނު ގެއްލުމާ ގުޅިގެން ބޯހިޔާވަހިކަމާ ގުޅުން ހުރި އެއްވެސް ލިސްޓަކަށް އަސަރު ކޮށްފައި ނުވާ ކަމަށެވެ.

އޭގެ ކުރިން، އަލިފާނުގެ ހާދިސާ ހިނގި އިރު ހައުސިން މިނިސްޓަރަކަށް ހުންނެވި ޑރ. އަލީ ހައިދަރު ވިދާޅުވެފައި އޮތީ، އެ ހާދިސާގައި "ހަމަ ގާތްގަނޑަކަށް ވުޒާރާގައި ހުރި ހުރިހާ ލިޔެކިޔުމަކާއި ޑޭޓާއަކާ އެއްކޮށް އެ ދިޔައީ" ކަމަށެވެ.

ސާވާގެ ޑިސްކުތައް ރިކަވާކޮށް، ސިންގަޕޫރަށް ފޮނުވައިގެން އެއިން އެއްވެސް މައުލޫމާތެއް ރިކަވާ ކުރެވޭތޯ ބަލަމުންދާ ކަމަށް މިނިސްޓްރީން އޮތީ ބުނެފަ އެވެ.