ރަސްމާލެ، ގުޅިފަޅު، ގިރާވަރުފަޅު ހިއްކަން 15 މިލިއަން ޑޮލަރު ހޯދަނީ

ކ. ފުށިދިއްގަރު ފަޅު ހިއްކައިގެން ތަރައްގީކުރާ ރަސްމާލެ މަޝްރޫއު ހިމެނޭހެން މާލޭ ސަރަހައްދުގެ ބޯހިޔާވަހިކަމުގެ މަޝްރޫއުތަކަށް ކ. ގުޅީފަޅު އަދި ގިރާވަރުފަޅުން ބިން ހިއްކަން އެންމެ ދަށްވެގެން 15 މިލިއަން ޑޮލަރު (231 މިލިއަން ރުފިޔާ) ހަރަދުކުރަންޖެހޭ ގޮތަށް ރާއްޖޭގެ އިންވެސްޓްމަންޓް ސިޔާސަތުގައި އިއްޔެ ކަނޑައަޅައިފި އެވެ.

ވީ ކިހިނެއް؟ - ދައުލަތުގެ އަމިއްލަ މަންފާއެއް ހާސިލުކުރަން ބޭނުންވާ އިގްތިސާދީ ސިޔާސަތެއްގެ ދަށުން ހިންގުމަށް ސަރުކާރުން ކަނޑައަޅާފައިވާ މަޝްރޫއުތަކާއި އެ މަޝްރޫއު ހަވާލުކުރެވޭ ފަރާތުން އެންމެ މަދުވެގެން ކުރަންޖެހޭ އިންވެސްޓްމަންޓުގެ އަދަދުތައް ރައީސް މުހައްމަދު މުއިއްޒުގެ ގަރާރަކުން އަލުން ކަނޑައަޅުއްވައި އިއްޔެ ވަނީ އާންމުކުރައްވާފަ އެވެ.

ތަފްސީލް - ރައީސް މުއިއްޒު ސޮއިކުރައްވައި އިއްޔެ އާންމުކުރައްވާފައިވާ ގަރާރުގައި ދައުލަތުގެ އާންމު މަންފާއަށްޓަކައި ހާސިލުކުރަން ބޭނުންވާ އިގްތިސާދީ ސިޔާސަތެއްގެ ދަށުން ހިންގުމަށް ކަނޑައަޅާފައިވާ 25 މަޝްރޫއަކާއި އެ މަޝްރޫއަށް ހަރަދުކުރަން ޖެހޭ އެންމެ ދަށް މިންވަރު ބަޔާންކޮށްފައިވެ އެވެ.

އޭގެ ތެރޭގައި ބޯހިޔާވަހިކަމަށް މާލެ އަތޮޅުން ހިއްކާ ހަތަރު ސަރަހައްދަކާއި އެކަމަށް ހަރަދުކުރަންޖެހޭ މިންވަރު ކަނޑައަޅާފައިވެ އެވެ. އެއީ:

މީގެ އިތުރުން، މުޅި ރާއްޖޭގައި ސޯޝަލް ހައުސިން މަޝްރޫއުތައް ހިންގަން ވެސް 5 މިލިއަން ޑޮލަރު އެ ގަރާރުގައި ރައީސް ހިމަނުއްވާފައިވެ އެވެ. އަދި ބިން ހިއްކާފައިވާ ރަށްރަށުގައި މަގު ހެދުމާއި ޔުޓިލިޓީ ހިދުމަތްތައް ގާއިމުކުރަން ވެސް ހިމަނާފައިވަނީ 5 މިލިއަން ޑޮލަރެވެ.

އެއާ އެކު، ރާއްޖޭގެ އެކި ސަރަހައްދުތަކުގައި ހިންގާ އެއާޕޯޓު މަޝްރޫއުތަކަކާއި 'އައްސޭރި ޓޫރިޒަމް' މަޝްރޫއުތަކެއްގެ އިތުރުން ސޯޝަލް ހައުސިން މަޝްރޫއުތަކާއި ބިން ހިއްކުމާއި ކޯޒްވޭއިން ގުޅާލުން ފަދަ މަޝްރޫއުތައް ވެސް މި ގަރާރުގައި ހިމަނުއްވާފައިވެ އެވެ.