ދަރިފުޅަކީ ދުވަހަކު ވެސް ދުންފަތުގެ އިސްތިއުމާލު ކުރި ކުއްޖެއް ނޫން: ސާޖިދާ

ދަރިކަލުން އުމައިރު މުހައްމަދު މުއިއްޒުއަކީ ދުވަހަކު ވެސް ވޭޕް ނުވަތަ ދުންފަތުގެ އިސްތިއުމާލް ކުރި ނުވަތަ ކުރާ ކުއްޖެއް ނޫން ކަމަށް އޭނާގެ މަންމަ އަދި ރައީސް މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު މިއަދު ވިދާޅުވެއްޖެ އެވެ.

ވީ ކިިހިނެއް؟ - ރާއްޖޭގައި ވޭޕް މަނާކޮށްފައި ވަނީ، ރައީސްގެ ދަރިކަލުން އުމައިރުގެ ސަބަބުން ކަމަށް އެމްޑީޕީ މުޒާހަރާއެއްގެ ތެރެއިން އެ ޕާޓީގެ އެކްޓިވިސްޓެއް ކަމަށްވާ މަރިޔަމް ޒުބައިރު (މަންދީ) ތުހުމަތުކުރި މައްސަލައެއް ވަނީ ހޫނުވެފަ އެވެ.

އެކަމާ ގުޅިގެން ރައީސް މުއިއްޒުގެ އާއިލާގެ ފަރާތުން އެމަނިކުފާނުގެ ގެކޮޅު މ. ދިމްޔާތުގައި މިއަދު ބޭއްވި ނޫސްވެރިންގެ ބައްދަލުވުމުގައި ސާޖިދާގެ ބަޔާނެއް ވަނީ އިއްވައިފަ އެވެ. އާއިލާގެ ފަރާތުން ވަކީލެއްގެ ގޮތުގައި ނޫސްވެރިންގެ ބައްދަލުވުމުގައި ބައިވެރިވެވަޑައިގެންނެވީ، ކުރީގެ ބަންޑާރަނައިބު އައިޝަތު އާޒިމާ ޝަކޫރެވެ.

ސާޖިދާގެ ބަޔާނުގައި އުމައިރުއަށް ކުރާ ތުހުމަތުތައް ދޮގު ކުރައްވާފައިވެ އެވެ. 

ބުނީ ކީކޭ؟ - "އުމައިރުއަކީ ވޭޕް ނުވަތަ ދުންފަތުގެ އިސްުތިއުމާލު ވެސް އެއްވެސް ގޮތަކަށް ކުރާ ނުނީ ކޮށްފައިވާ ކުއްޖެއް ނޫން ކަމުގައި ތިޔަ އެންމެ ބޭފުޅުންގެ މައުލޫމާތަށް ޓަކައި ވަރަށް ސާބިތުކަމާ އެކު ދަންނަވަމެވެ." ރައީސް މުއިއްޒުގެ އާއިލާގެ ފަރާތުން އެމަނިކުފާނުގެ އަނބިކަނބަލުން ސާޖިދާ މިއަދު ނެރެއްވި ބަޔާނުގައި ވިދާޅުވި އެވެ.

ތަފްސީލު - އެ ތުހުމަތުތައް ކުރައްވަމުން ގެންދަވަނީ ފިރިކަލުން ރައިސް މުއިއްޒުއާ ސިޔާސީ ގޮތުން ހިޔާލުފާތު ފަރާތްތައްކަން ސާޖިދާ ފާހަގަ ކުރެއްވި އެވެ. އަދި އެކަމުގެ ސަބަބުން އުމައިރުގެ "ތައުލީމީ ހަޔާތަށާއި އިޖުތިމާއީ ހެދިބޮޑުވުމަށް ނޭދެވޭ އަސަރުތައް ކުރާނޭ ވާހަކަތައް ވެސް" ދަރިފުޅާ ގުޅުވައި ދައްކާފައިވާ ކަމަށް ސާޖިދާ ވިދާޅުވި އެވެ.

"މިކަންތައްތަކުގެ ސަބަބުން އޭނާ[އުމައިރު]ގެ މުސްތަގުބަލަށް ނޭދެވޭ އަސަރުތަކެއްކޮށް، އޭނާގެ ރައްކާތެރިކަން ކަށަވަރު ނުވާ ވަރުގެ ކަންތައްތަކަށް މަގުފަހިވެދާނެ ފުރުސަތުތަކަކަށް ދޮރު ހުޅުވިފައިވާކަން ކަންބޮޑުވުމާ އެކު ފާހަގަ ކުރަމެވެ." އެ ބަޔާނުގައި ސާޖިދާ ވިދާޅުވި އެވެ.

އެ ބަޔާނުގައި ފާހަގަކޮށްފައިވާ ގޮތުގައި އުމައިރުގެ އުމަރަކީ 16 އެވެ. އަދި ގާނޫނުއަސަސާސީ އާއި ގާނުނުތަކުން ރާއްޖޭގެ ކޮންމެ ކުޑަ ކުއްޖަކީ ވެސް ރައްކާތެރިކަން ލިބިގެންވާ ކުއްޖެއް ކަމަށް ބަޔާނުގައި ވިދާޅުވި އެވެ. އުމައިރުގެ އިތުރުން އެންމެ ދޮށީ ދަރިފުޅަށާއި އަށް އަހަރުގެ ހަގު ދަރިފުޅަށް ވެސް ސިޔާސީ ވާދަވެރިން ގާނާކޮށް ފުރައްސާރަ ކުރަމުންދާ ކަމަށާއި އެއީ ބަލައިގަންނަން އުދަނގޫ ކަމެއްގެ ކަމަށް ބަޔާނުގައި ފާހަގަ ކޮށްފައިވެ އެވެ.

އެއާއެކު ސާޖިދާ ވިދާޅުވީ:

ބަޔާނަށް ފަހު، ވަކީލު އާޒިމާ ވިދާޅުވި ގޮތުގައި މިކަމުގައި މަދަނީ ދައުވާތަކެއް ކުރުމަށް ވަނީ ނިންމައިފަ އެވެ.  އަދި މިކަންތައްތަކުގެ ސަބަބުން އުމައިރުގެ ސަލާމަތަށް ވެސް ނުރައްކާވުމުގެ ފުރުސަތު އޮތްކަން އޭނާ ފާހަގަކުރެއްވި އެވެ.