ދަރިކަލުންގެ ހައްގުގައި ސާޖިދާ، ފައްޔާޒު އާއި އެމްޑިޕީއާ ދެކޮޅަށް މަދަނީ ދައުވާކުރައްވަނީ

ދަރިކަލުން އުމައިރު މުހައްމަދު މުއިއްޒުގެ ހައްގުގައި އޭނާގެ މަންމަ އަދި ރައީސް މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު، އިދިކޮޅު އެމްޑީޕީ އަށާއި އެ ޕާޓީގެ ޗެއާޕާސަން ފައްޔާޒު އިސްމާއިލް އަދި އެކްޓިވިސްޓް މަރިޔަމް ޒުބައިރު (މަންދީ)އާ ދެކޮޅަށް ދައުވާ ކުރަން ނިންމަވައިފި އެވެ.

ވީ ކިިހިނެއް؟ - ރާއްޖޭގައި ވޭޕް މަނާކޮށްފައި ވަނީ، ރައީސްގެ ދަރިކަލުން އުމައިރުގެ ސަބަބުން ކަމަށް އެމްޑީޕީ މުޒާހަރާއެއްގެ ތެރެއިން އެ ޕާޓީގެ އެކްޓިވިސްޓެއް ކަމަށްވާ މަރިޔަމް ޒުބައިރު (މަންދީ) ތުހުމަތުކުރި މައްސަލައެއް ވަނީ ހޫނުވެފަ އެވެ.

އެކަމާ ގުޅިގެން ރައީސް މުއިއްޒުގެ އާއިލާގެ ފަރާތުން އެމަނިކުފާނުގެ ގެކޮޅު މ. ދިމްޔާތުގައި މިއަދު ބޭއްވި ނޫސްވެރިންގެ ބައްދަލުވުމުގައި ސާޖިދާގެ ބަޔާނެއް ވަނީ އިއްވައި، މިކަމާ ގުޅިގެން ފިޔަވަޅުަތަކެއް އެޅުމަށް ނިންމިކަން ވަނީ ހާމަކޮށްފަ އެވެ.

ތަފްސީލު - އުމުރުން 16 އަހަރުގެ އުމައިރުއަށް ކުރާ ތުހުމަތުތައް ދޮގު ކުރައްވައި، ސާޖިދާ ވިދާޅުވި ގޮތުގައި މިކަމަކީ ރައީސް މުއިއްޒުއާ ސިޔާސީ ގޮތުން ވާދަވެރި ފަރާތްތަކުން ކުރަމުންދާ މިފަދަ ކަންތަތަކުގެ ސަބަބުން ސަބަބުން އުމައިރުގެ ތައުލީމަށާއި އިޖުތިމާއީ ހެދިބޮޑުވުމަށްވެސް ވަރަށް ބޮޑު އަސަރެއް ކުރާނޭ ކަމަށެވެ. އަދި މީގެ ސަބަބުން އޭނާގެ ކަރާމަތަށާއި ރައްކާތެރިކަން ވެސް އުނިކަން އައިސްފައިވާކަން ފާހަގަކުރައްވާފައިވެ އެވެ.

އޭގެ އިތުރުން ބަޔާނުގައި ބުނީ:

"އެއީ، ތިޔައިގެ ތެރެއިން ކޮންމެ ބޭފުޅަކު ފަދައިން އަޅުގަނޑުގެ އެންމެ ފުރަތަމަ އަދި އެންމެ އިސް ވާޖިބަކީ، އަޅުގަނޑުގެ ދަރިންކަމުގައިވާތީ އެވެ. އަދި ހަމައެއާއެކު ކުދިންގެ ރައްކާތެރިކަމާއި މުސްތަގުބަލު ކަށަވަރުކުރުމަކީ، އެ ކުދިންގެ ބައްޕައާއި އަޅުގަނޑުގެ ޒިންމާއަކަށްވީތީ އެވެ،" މިކަމުގައި ފިޔަވަޅު އަޅަން ނިންމި ސަބަބުން ހާމަ ކުރައްވައި ސާޖިދާ ވިދާޅުވި އެވެ.

އޭގެ އިތުރުން ސާޖިދާ ވިދާޅުވީ މިގޮތަށް މީހުންގެ ދަރިންނަށް ގަނާކުރުން އިތުރުވެފައިވާ ކަމަށާއި މި މިފިޔަވަޅު އަޅަނީ މުސްތުގުބަލުގައި ވެސް މިފަދަ މަގާމެއްގައި ތިބޭނެ ކުދިންގެ ރައްކާތެރިކަމަށް ޓަކައިވެސް ކުރަން ޖެހޭ ކަމެއް ކަމުގައިވާތީ ކަމަށެވެ.

"އަޅުގަނޑު މި ފިޔަވަޅުތައް މިއަޅަނީ، މި ކުދިންގެ މަންމަގެ ހައިސިއްޔަތުން އަޅުގަނޑުގެ ފަރުދީ ހައިސިއްޔަތުން، ސަރުކާރުގެ ބައިވެރިވުން އޮވެގެން ނޫން،" މިފިވަޅުތަކުގެ ތަފްސީލުތައް ވަކީލުންގެ ޓީމުން ދެއްވާނެ ކަން ފާހަގަކޮށް، ބަޔާނުގައި ވިދާޅުވި އެވެ.

ބަޔާނަށްފަހު ވަކީލު އާޒިމާ ވިދާޅުވީ މިހާތަނަށް ދައުވާ ކުރަން ނިންމާފައި ވަނީ، ފައްޔާޒު އާއި މަރިޔަމް ޒުބައިރު އަދި އެމްޑީޕީގެ މައްޗަށެވެ.

  އާޒިމާ ވިދާޅުވީ:

"އަޅުގަނޑުމެންގެ ފަރާތުން މިހާތަނަށް މައްސަލަ ހުށަހަޅަން ގަސްތުކޮށްފައި އޮތީ، މަރިޔަމް ޒުބައިރު [އާއި] ފައްޔާޒު އިސްމާއިލް އަދި އެމްޑީޕީގެ މައްޗަށް. އޭގެ އިތުރަށް އެއްވެސް ފަރާތަކަށް ފިޔަވަޅު ނާޅާނަމެކޭވެސް ނޫން. ގާނުނީ ވަކީލުން ދަނީ މައްސަލަ ދިރާސާ ކުރަމުން،" އާޒިމާ ވިދާޅުވި އެވެ.

އެ ދައުވާތަކާއި އެމީހުން ގާނޫނާ ހިލާފަށް ކުރިކަމަށް ބުނާ އަމަލުތަކުގެ ތަފްސީލުތައް މިވަގުތު ހާމަ ކުރުމަށް އާޒިމާ އުޒުރުވެވަޑައިގެންނެވި އެވެ. އެކަމުގެ ތަފްސިޅުތައް މައްސަލަ ކޯޓަށް ހުށަހެޅުމަށްފަހު، ދެއްވާނެ ކަމަށާއި މި ހަފްތާ ތެރޭގައި ކޯޓަށް މައްސަލަ ހުށަހެޅޭނެ ކަމަށްވެސް ވިދާޅުވި އެވެ.