ސަރުކާރުގެ ނުފޫޒުން ސުޕްރީމް ކޯޓުގައި މަރުތަޅު އަޅުވާފައިވާ ކަމަށް ބުނެ ހުށަހެޅި ކުއްލި މައްސަލަ ބޭރުކޮށްލައިފި

ސުޕްރީމް ކޯޓުގެ ތިން ފަނޑިޔާރުން ސަސްޕެންޑްކޮށް، އެ ކޯޓުގެ މަސްއޫލިއްޔަތު އަދާ ނުކުރެވޭ ގޮތަށް 'މަރުތަޅު އަޅުވާފައި ވަނީ' ސަރުކާރުން ކަމަށް ތުހުމަތުކޮށް، ޝަރުއީ ދާއިރާއަށް ނުފޫޒު ފޯރުވުން ހުއްޓުވުމަށް ގޮވާލައި އިދިކޮޅުން މިއަދު މަޖިލީހަށް ހުށަހެޅި ކުއްލި މައްސަލަ ބޭރުކޮށްލައިފި އެވެ.

ވީ ކިހިނެއް؟ - ރައްޔިތުންގެ މަޖިލީހުގެ މިއަދުގެ ޖަލްސާއަށް އެމްޑީގެ ފަރާތުން މައްސަލަ ހުށަހެޅުއްވީ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދެވެ. ސަރުކާރު ހިންގާ މައި ޕާޓީ، ޕީއެންސީގެ 75 މެންބަރުންނާ އެކު އެ ޕާޓީގެ ސުޕަމެޖޯރިޓީ އޮތް މަޖިލީހުން އެ މައްސަލަ ބޭރުކޮށްލާފައި ވަނީ 46 މެންބަރުންގެ ވޯޓާ އެކު އެވެ. އެއްކޮޅަށް ވޯޓު ދެއްވީ އެމްޑީޕީގެ 11 މެންބަރުންނެވެ.

ތަފްސީލު - މި މައްސަލައިގެ ވޯޓުގައި:

ބުނީ ކީކޭ؟ - ޝަމްހީދު ހުށަހެޅުއްވި ކުއްލި މައްސަލައިގައި އޭނާ ވިދާޅުވީ، ގާނޫނުއަސާސީއަށް ގެނައި މެންބަރުންގެ ގޮނޑީގެ އިސްލާހު ބާތިލުކުރުމާ ގުޅޭ މައްސަލަ ބަލަން ސުޕްރީމް ކޯޓުން ނިންމުމާ އެކު އެ ކޯޓަށް ނުފޫޒު ފޯރުވުމަށް އެކި ކަންކަން ހިންގި ކަމަށެވެ. އެގޮތުން، އޭނާ ވިދާޅުވީ:

"ހައްސާސް މައްސަލައެއް ރާއްޖޭގެ ސުޕްރީމް ކޯޓުން ބަލަމުންދާ ދަނޑިވަޅެއްގައި އެ ކޯޓު އެކުލެވިގެންވާ ގޮތަށް ބަދަލު ގެނައުމަށް މަސައްކަތްކޮށް، ވުޖޫދުގައި ނެތް ސުލޫކީ މައްސަލަތަކެއް އުފައްދައިގެން، އެ ކޯޓުގެ ފަނޑިޔާރުން މަގާމުގެ މަސައްކަތުން އެކަހެރި ކުރުމަކީ ސުޕްރީމް ކޯޓުން ބަލަމުންދިޔަ މައްސަލައަކަށް ނުފޫޒު ފޯރުވުމުގެ ނިޔަތުގައި ކުރި އަމަލެއް،" އޭނާ ވިދާޅުވި އެވެ.

ސުޕްރީމް ކޯޓަށް ހުށަހެޅޭ މުހިންމު ބޮޑެތި މައްސަލަތައް ބެލެނީ އެ ކޯޓުގެ ފަސް ފަނޑިޔާރުންގެ ބެންޗަކުންކަން ފާހަގަކުރައްވައި އޭނާ ވިދާޅުވީ، އެ ކޯޓުގެ ހަތް ފަނޑިޔާރުންގެ ތެރެއިން ތިން ފަނޑިޔާރަކު މިވަގުތު ސަސްޕެންޑްކުރުމާ އެކު ހަތަރު ފަނޑިޔާރުން ތިއްބެވުމުން އެފަދަ ބޮޑެތި މައްސަލަތައް ވެސް އެ ކޯޓުގައި ކުރިއަށްގެންދެވޭނެ ގޮތެއް މިވަގުތު ނެތް ކަމަށެވެ.

"ގާނޫނުއަސާސީން އެކަށައަޅާފައި އޮތީ ތިން ބާރު ވަކިވެފައި އޮތް ނިޒާމެއް ކަމަށް ވާއިރު، ގާނޫނުއަސާސީން އަދުލުއިންސާފު ގާއިމްކުރުމުގެ ބާރާ މަތިކޮށްފައިވާ މަސްއޫލިއްޔަތުތައް އަދާނުކުރެވޭ ގޮތަށް، އެ ކޯޓުގައި މަރުތަޅުއެޅުވިފައި އޮތުމުގެ ސަބަބުން ރާއްޖޭގައި [މިވަނީ] ދުސްތޫރީ ހުސްކަމެއް ކުރިމަތިވެފައި،" އޭނާ ވިދާޅުވި އެވެ.

ރައްޔިތުންގެ އަސާސީ ހައްގުތަކާއި މިނިވަންކަމަށް އުނިކަން އަންނަ ގޮތަށް "ސަރުކާރުގެ ބައިވެރިވުމާ އެކު ހިންގަމުންދާ މިފަދަ ހުދުމުހުތާރު އަމަލުތައް" ކުށްވެރި ކުރާ ކަމަށް އޭނާ ވިދާޅުވި އެވެ. އަދި މުއައްސަސާތައް ބޭނުންކޮށްގެން ޝަރުއީ ދާއިރާށް ނުފޫޒު ފޯރުވުމަށް މަސައްކަތް ކުރަމުންދާ ކަމަށް ތުހުމަތުކޮށް، އެކަން ހުއްޓާލުމަށް ސަރުކާރަށާއި މުއައައްސަސާތަކަށް އޭނާ ގޮވާލައްވާފައިވެ އެވެ.