އޭސީސީން ބިންވެރިޔާ-ގެދޮރުވެރިޔާ ސްކީމްގެ އަވަސް ތަހުގީގެއް ފަށައިފި

މިދިޔަ ސަރުކާރުގައި ގޯތި ދިނުމަށް ހިންގި ބިންވެރިޔާ ސްކީމާއި ފްލްޓް ދިނުމަށް ހިންގި ގެދޮރުވެރިޔާ ސްކީމްއާ ގުޅޭ އަވަސް ތަހުގީގެއް ފަށާފައިވާ ކަމަށް އެންޓި ކޮރަޕްޝަން ކޮމިޝަން (އޭސީސީ)އިން މިއަދު ބުނެފި އެވެ.

ވީ ކިހިނެއް؟ - ބިންވެރިޔާ ސްކީމްގެ ދަށުން ގޯތި ނުލިބޭ ދެމީހަކު ގޯތި ލިބުނު ކަމަށް ބުނެ އެޗްޑީސީއަށް ހުށަހެޅި ސައްހަ ނޫން ލިޔެކިތުންތަކެއް އާންމުވެ އެޗްޑީސީގެ އެމްޑީއަށް ތުހުމަތު ކުރެވޭ ކަންތައްތަކެއް ފެންމަތިވެ މި ދެ ސްކީމްއާ ގުޅޭ ގޮތުން ތަހުގީގެއް ހިންގުމަށް މިއަދު ޕީޖީ އައްބާސް ޝަރީފް ވަނީ ފުލުހުންނާއި އޭސީސީއަށް އަންގާފަ އެވެ. ގާނޫނުއަސާސީން ޕީޖީއަށް ލިބޭ ބާރުގެ ދަށުން އޭނާ އެ ދެ މުއައްސަސާއަށް އަމުރުކުރައްވާފައި ވަނީ: 

އެ އަމުރާ ގުޅިގެން އޭސީސީން މިރޭ ވަނީ، އެކްސްގައި ޕޯސްޓެއްކޮށްފަ އެވެ.

ބުނީ ކީކޭ؟ - "ބިންވެރިޔާ އަދި ގެދޮރުވެރިޔާ ސްކީމާގުޅޭ ޖިނާއީ ތަހުގީގެއް ހިންގުމަށް ދިވެހި ފުލުހުންގެ ހިދުމަތަށާއި އެންޓި ކޮރަޕްޝަން ކޮމިޝަނުގެ މައްޗަށް ޕްރޮސިކިއުޓާ ޖެނެރަލް ކުރެއްވި އަމުރާ ގުޅިގެން، ކޮމިޝަނުން މިދަނީ ދިވެހި ފުލުހުންގެ ހިދުމަތާއެކު މަޝްވަރާކޮށް، އަވަސް ތަހުގޭއްއް ކުރަމުންނެވެ." އެ ޕޯސްޓުގައި ބުނެފައިވެ އެވެ.

ފާހަގަކޮށްލެވޭ ކަމެއް - މި ތަހުގީގާ ގުޅިގެން މިއަދު ފުލުހުންނާއި އޭސީސީގެ އިސް ބޭފުޅުން ވަނީ ބައްދަލުވުމެއް ބާއްވާފަ އެވެ. ފުލުހުން އެކްސްގައި ކުރި ޕޯސްޓުގައި ބުނީ، އެ ތަހުގީގާ ގުޅިގެން އެ ދެ އިދާރާއިން ފުޅާ ދާއިރާއެއްގައި މަޝްވަރާކޮށްފައިވާ ކަމަށެވެ.

މީގެ ކުރިން އޭސީސީން ވަނީ ގެދޮރުވެރިޔާ ސްކީމްގެ ދަށުން ފްލެޓް ލިބުނު މީހުންގެ ލިސްޓުގެ މައްސަލަ ތަހުގީގުކޮށްފަ އެވެ. އަދި އަލުން ލިސްޓް އިސްލާހުކުރުމަށް ހައުސިން މިނިސްޓްރީއާ ހަވާލުކޮށްފައިވެ އެވެ. އޭރު އޭސީސީން ބުނެފައިިވާ ގޮތުގައި ކުރީ ސަރުކާރުން އެކުލަވާލި ފްލެޓް ލިސްޓުގެ %60 މީހުންގެ ޝަރުތުހަމައެއް ނުވެ އެވެ.