އާސަންދައަށް ހޭދަކުރާ ފައިސާގެ ސަބަބުން ސިއްހީ ނިޒާމު އޮތީ ދައުލަތަށް ބުރައަކަށްވެފައި: ނާޒިމް

އާސަންދައަށް ހައްދެއް ނެތި ދައުލަތުން ހޭދަކުރާ ފައިސާގެ ސަބަބުން ސިއްހީ ނިޒާމު އޮތީ ދައުލަތުގެ މާލިއްޔަތަށް ބޮޑު ބުރައަކަށް ވެފައި ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހިމް މިއަދު ވިދާޅުވެއްޖެ އެވެ.

ވީ ކިހިނެއް؟ - ނާޒިމް މިހެން ވިދާޅުވީ ހުޅުމާލެ ހޮސްޕިޓަލް ޓާޝަރީ ފެންވަރަށް ތަރައްގީކޮށް ހުޅުވުމަށް މިއަދު ބޭއްވި ރަސްމިޔާތުގައި ވާހަކަދައްކަވަމުންނެވެ.

ބުނީ ކީކޭ؟ - ނާޒިމް ވިދާޅުވީ ސަރުކާރުން ގަބޫލުކުރާ ސިއްހީ ސިޔާސަތަކީ އެންމެ ކުޑަ ރަށުގައި ހުރި އެންމެ ނިކަމެތި މީހާއަށް ވެސް ބޭސްފަރުވާގެ ނިޒާމު ނުލިބޭހާ ހިނދަކު ނިޒާމު ރަނގަޅު ނުވާނެ ކަމުގެ ސިޔާސަތު ކަމަށެވެ. އަލުން ބަލުން ސިއްހީ ދާއިރާގެ ކަންކަން ރަނގަޅު ކުރުމުގެ ކަންކަން ރައީސް މުހައްމަދު މުއިއްޒު ފައްޓަވައިގެން އުޅުއްވަނީ އެހެންވެ ކަމަށް އޭނާ ވިދާޅުވި އެވެ. 

މިއަދު ސިއްހީ ނިޒާމަށް އޮތް އެންމެ ބޮޑު ހިތްހަމަޖެހުމަކީ ކުރިން ކުރަމުންދިޔަ ގޮތަށް ސިއްހީ ނިޒާމު ބާއްވައިގެން ކުރިއަށް ނުދެވޭނެކަން ގަބޫލުކޮށްފައިވާ ވެރިއަކު ލިބި، އެ މަނިކުފާނުގެ ބަހާއި އަމަލު އެ މަގުގައި މިސްރާބު ކުރެވިފައި ހުރުން ކަމަށް ނާޒިމް ވިދާޅުވި އެވެ.

"ރައީސް މުއިއްޒުގެ ސިއްހީ ސިޔާސަތު ބައްޓަން ކުރެވިގެން އެ ދަނީ، މަގު ދައްކަމުން އެ ދަނީ ކުރިން ކަންކުރި ގޮތަށް ވުރެ ތަފާތު ގޮތަކަށް މިކަން ކުރަން ޖެހޭ ގޮތުގެ ސިޔާސަތު،" ނާޒިމް ވިދާޅުވި އެވެ.

އޭނާ ވިދާޅުވީ:

"އަސަންދައިގެ ތަފާސްހިސާބުތަކަށް ބަލާއިރު އެ ކަމަށް ރައްޔިތުންގެ މަޖިލީހުން ފާސްކުރާ ބަޖެޓުން ނުފުދި ކޮންމެ އަހަރަކު އެއަށް ފައިސާ އަޅައަޅައި ތިބެން ޖެހުމުގެ ސަބަބުން މުޅި ނިޒާމު ވަނީ ދައުލަތަށް ބޮޑު ބުރައަކަށް ވެފައި. މިއީ ދިވެހި ރައްޔިތުން އެދޭ ގޮތެއް ނޫން،" އޭނާ ވިދާޅުވި އެވެ.

ނާޒިމް ވިދާޅުވީ ރައްޔިތުން އެދެނީ ސިއްހީ ނިޒާމަކީ އެންމެ ފައިދާ ހުރި ގޮތަކަށް، ހައްގުވެރި ފަރާތްތަކަށް ލިބޭ ނިޒާމަށް ވެގެން ދިއުން ކަމަށެވެ.

އެ ނިޒާމުގެ ސަބަބުން ގައުމުގައި ދެން ކުރަން ހުރި ކަންކަން ކުރުމަށް ގޮންޖެހުން ކުރިމަތިވެގެންދާން ރައްޔިތުން ބޭނުން ނުވާ ކަމަށް ވެސް އޭނާ ވިދާޅުވި އެވެ. އެކަމަށްޓަކައި އަޅަން ޖެހޭ ފިޔަވަޅުތައް ރައީސް އަޅުއްވަމުންގެންދަވާ ކަަަމަށް ވެސް ނާޒިމް ވިދާޅުވި އެވެ.

ފާހަގަކޮށްލެވޭ ކަމެއް - އާސަންދައަށް ދައުލަތުން ހޭދަކުރަން ޖެހޭ ފައިސާގެ ސަބަބުން ދައުލަތުގެ މާލިއްޔަށް ބުރަވެފައިވާ ކަމަށް ނާޒިމް ވިދާޅުވިއިރު، އާސަންދަ ހިދުމަތް ދެމުންދާ ގޮތަށް މިފަހުން ސަރުކާރުން ވަނީ ބޮޑެތި ބަދަލުތަކެއް ގެނެސްފަ އެވެ. އެކަމާ ގުޅިގެން އާންމުންގެ ޝަކުވާ ވެސް ބޮޑެވެ.