ހުޅުމާލެ ހޮސްޕިޓަލް ޓާޝަރީ ފެންވަރަށް ބަދަލުކޮށް ހުޅުވުމުގެ ރަސްމިއްޔާތަށް ފަހު ރައީސް މުއިއްޒު އެ ހޮސްޕިޓަލުގެ އާ ޔުނިޓްތައް ބައްލަވާލައްވަނީ (ފޮޓޯ/ރައީސް އޮފީސް)
ހުޅުމާލެ ހޮސްޕިޓަލް ޓާޝަރީ ފެންވަރަށް ތަރައްގީކޮށް ހުޅުވައިފި
ހުޅުމާލެ ހޮސްޕިޓަލް ޓާޝަރީ ފެންވަރަށް ތަރައްގީކޮށް މިއަދު ހުޅުވައިފި އެވެ.
ވީ ކިހިނެއް؟ - މި ހޮސްޕިޓަލް ޓާޝަރީ ފެންވަރުގައި ހިންގުމުގެ ރަޖިސްޓްރޭޝަން އާއި ލައިސެންސް ހަވާލުކޮށްދެއްވީ މިއަދު ބޭއްވި ރަސްމިއްޔާތުގައި ހެލްތު މިނިސްޓަރު އަބްދުﷲ ނާޒިމް އިބްރާހިމް އެވެ. މި ރަސްމިއްޔާތު ޝަރަފުވެރިކޮށްދެއްވީ ރައީސް މުހައްމަދު މުއިއްޒު އެވެ.
ތަފްސީލް - މީގެ 20 އަހަރު ކުރިން ސިއްހީ މަރުކަޒެއްގެ ގޮތުގައި ހުޅުމާލޭގައި ހުޅުވި މި ހޮސްޕިޓަލް ޓާޝަރީ ފެންވަރަށް ތަރައްގީކޮށް މިއަދު އިފްތިތާހުކުރީ އާ ހިދުމަތްތަކާ ވެސް އެކުގަ އެވެ.
އޭގެ ތެރޭގައި ހިމެނެނީ:
-
10 އެނދުގެ އައިސީޔޫއެއް
-
14 އެނދުގެ އެންއައިސީޔޫ؛ މިތަނުގައި ތުއްތު ކުދިންނަށް ފަރުވާދޭން ނިއުނޭޓަލް ވެންޓިލޭޓަރު، އިންކިއުބޭޓަރު އަދި ފޮޓޯތަރަޕީ ޔުނިޓުތައް ހިމެނޭ
-
ސެންޓްރަލް ސްޓެރައިލް ސާވިސަސް ޑިޕާޓްމަންޓް (ސީއެސްއެސްޑީ)
-
ހަތަރު އޮޕަރޭޝަން ތިއޭޓަރު؛ މިތަނުގައި ހިމެނެނީ ޒަމާނީ ފެންވަރުގެ ކަށީގެ ހާއްސަ ތިއޭޓަރަކާއި ލޮލުގެ ހާއްސަ ތިއޭޓަރަކާއި އަންހެނުންގެ ހާއްސަ ތިއޭޓަރެއްގެ އިތުރުން ޖެނަރަލް ސާޖަރީތަކަށް ހާއްސަ ތިއޭޓަރެއް
ބުނީ ކީކޭ؟ - މި ރަސްމިއްޔާތުގައި ވާހަކަދައްކަވަމުން މާލޭ ސިޓީ ގްރޫޕްސް އޮފް ހޮސްޕިޓަލުގެ ޗީފް އެގްޒެކެޓިވް އޮފިސަރު އިބްރާހިމް އަބްދުލް ރައްޒާގު ހަލީމް ވިދާޅުވީ ޓާޝަރީ ހޮސްޕިޓަލަކަށް ހުޅުމާލެ ހޮސްޕިޓަލް ބަދަލުކުރުމުން ކުރިން އެމެޖެންސީ ހާލަތުގައި އިތުރު ފަރުވާއަށް އެހެން ހޮސްޕިޓަލުތަކަށް ބަލިމީހުން ގެންދަން ޖެހޭ ޖެހުން މަދުވާނެ ކަމަށެވެ.
މި ހިދުމަތްތަކުގެ އިތުރުން ވެސް ހޮސްޕިޓަލުގެ ފެންވަރު ރަނގަޅުކުރަން ކުރިއަށް ގެންދާ މަސައްކަތްތައް ވެސް އޭނާ ފާހަގަކުރެއްވި އެވެ.
އެގޮތުން ވިދާޅުވީ:
-
ހުޅުމާލެ ހޮސްޕިޓަލުގައި މިހާރު ހުރި އީއާރަކީ ހަތް އެނދުގެ ތަނަކަށް ވުމުން އެމަޖެންސީ ހާލަތްތަކުގައި އަވަހަށް ފަރުވާދޭން ދަތިވާ ކަމަށް
-
އެތަން ބޮޑުކޮށް 14 އެނދުގެ އީއާރަކަށް ބަދަލުކުރުމުގެ މަސައްކަތް މި ހަފްތާގެ ތެރޭގައި ފަށާނެ
-
ޑައިލިސިސް ހިދުމަތުގެ ކެޕޭސިޓީ ބޮޑުކުރަން 30 އެނދުގެ މަޝްރޫއެއް ފަށައި އެ މަސައްކަތް އަންނަ އަހަރު ކުރީކޮޅު ނިންމާނެ ކަމަށް
-
ހޮސްޕިޓަލަށް އިތުރު 28 އެނދު އަންނަ އަހަރުގެ ކުރީކޮޅު އިތުރުކުރާނެ
ކޮމެންޓް