އާސަންދައަށް ގެނައި ބަދަލާ އެކު ހިދުމަތް ލަސްވެދާނެ: އޭޑީކޭ

އަމިއްލަ އިންޝުއަރެންސް އޮންނަ މީހުންނަށް އާސަންދަ ހިދުމަތް ދިނުމުގައި މިއަދުން ފެށިގެން ގެނައި ބަދަލަށް މުވައްޒަފުން އަހުލުވެރިކުރުމަށް އެކަށީގެންވާ ވަގުތު ނުލިބޭތީ ހިދުމަތް ދިނުމުގައި ލަސްތަކެއް ކުރިމަތިވުމަކީ އެކަށީގެންވާ ކަމެއް ކަމަށް އޭޑީކޭ ހޮސްޕިޓަލުން ބުނެފި އެވެ.

ވީ ކިހިނެއް؟ - އާސަންދަ ކުންފުނިން އިއްޔެ ނިންމުމާއެކު މިއަދުން ފެށިގެން ސިއްހީ ހިދުމަތް ދޭ ތަންތަނުން ހިދުމަތް ހޯދާ ބަލިމީހުންނަށް އާސަންދަ ލިބޭނީ ޕްރައިވެޓް އިންޝުއަރެންސް އޮންނަ ނަމަ އެ އިންޝުއަރެންސްއަށް ކެނޑުމަށް ފަހު އެވެ.

ތަފްސީލް - އެކަމާ ގުޅިގެން އޭޑީކޭ ހޮސްޕިޓަލުން ރޭ ނެރުނު ބަޔާނެއްގައި ބުނީ އާސަންދަ ކުންފުނިން ގެނައި ބަދަލަކީ ކުއްލި ބަދަލެއް ކަމަށެވެ. އޭޑީކޭ އިން އާސަންދަ ހިދުމަތް ދެނީ ސޮފްޓްވެއާއެއް މެދުވެރިކޮށްކަން ފާހަގަކޮށް އެ ހޮސްޕިޓަލުން ބުނީ މިއަދުން ފެށިގެން ގެންނަ ބަދަލާ އެއްގޮތަށް ސޮފްޓްވެއާއަށް ބަދަލު ގެންނަން ވެސް ވަގުތު ލިބިފައިނުވާ ކަމަށެވެ.

"އެހެންކަމުން، މި ބަދަލުތަކާ އެކު ހިދުމަތް ދިނުމުގައި ކޮންމެވެސް ވަރެއްގެ ދަތިތަކާ ކުރިމަތިވެ، ހިދުމަތް ފޯރުކޮށްދިނުމުގައި ލަސްތަކެއް ކުރިމަތިވުމަކީ އެކަށީގެންވާ ކަމެކެވެ،" އޭޑީކޭ އިން ބުންޏެވެ.

އާސަންދަ އިން އިއްޔެ ނިންމި ނިންމުމާ އެކު ހޮސްޕިޓަލުން ހިދުމަތް ހޯދާ ކޮންމެ ބަލި މީހެއްގެ އަތުގައި ވެސް ޕްރައިވެޓް އިންޝުއަރެންސެއް އޮތްތޯ ބެލުން ލާޒިމުކޮށްފައިވާތީ އޭޑީކޭ އިން ހިދުމަތް ހޯދާ ބަލިމީހުންގެ އަތުގައި އަމިއްލަ އިންޝުއަރެންސް އޮތްތޯ އެ ހޮސްޕިޓަލުން ކަށަވަރު ކުރާނެ ކަމަށް ވެސް އޭޑީކޭ އިން ބުންޏެވެ.

އޭޑީކޭ އިން ބުނީ:

ގުޅުން ހުރި  - އާސަންދައަށް ގެނައި ބަދަލަކީ ދެމެހެއްޓެނިވި އަދި ފެންވަރު ރަނގަޅު ހިދުމަތެއް ފޯރުކޮށްދެވޭ ހިދުމަތަކަށް ހެދުމަށް ކުރާ މަސައްކަތުގެ ދަށުން ގެނައި ބަދަލެއް ކަމަށް އެ ކުންފުނިން ބުނެފައިވެ އެވެ.