މީޑިއާ ކޮންޓްރޯލް ކުރުމަކީ އަޅުގަނޑު ގަބޫލުކުރާ ހަމައެއް ނޫން: ރައީސް

މީޑިއާތައް ކޮންޓްރޯލް ކުރުމަކީ އެ މަނިކުފާނު ގަބޫލުކުރައްވާ ހަމައެއް ނޫން ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.

ވީ ކިހިނެއް؟ - އެ މަނިކުފާނު ދެންމެ 'އެކްސް'ގައި ކުރެއްވި ޕޯސްޓެއްގައި އެހެން ވިދާޅުވީ، ސަރުކާރަށް ކޮންޓްރޯލް ލިބޭ ގޮތަށް މީޑިއާ ކޮމިޝަނެއް އުފެއްދުމަށް މަޖިލީހަށް ބިލެއް ހުށަހަޅާފައިވުމުން އެކަމާ ގުޅިގެން ކަންބޮޑުވުން ފާޅު ކުރަމުން ދަނިކޮށެވެ.

ބުނީ ކީކޭ؟ - "ނޫސްތަކާއި މީޑިއާތައް ކޮންޓްރޯލް ކުރުމަކީ އަޅުގަނޑު ގަބޫލުކުރާ ހަމައެއް ނޫން. މާތް ވެގެންވާ އިސްލާމްދީނާއި ދިވެހިރާއްޖޭގެ ގާނޫނުއަސާސީއާ ހިލާފު ނުވާހާ ހިނދަކު ދިވެހި ދައުލަތުގެ ސިޔާދަތީ ބާރު ހިނގާ ސަރަހައްދުގައި ކޮންމެ ދިވެއްސަކަށް ވެސް އެ މީހެއްގެ އަމިއްލަ މިނިވަންކަމާ އެކު އެ މީހަކު ބޭނުންކަމެއްކޮށް އުޅުމުގެ ހައްގު އޮންނާނެ،" ބައިނަލްއަގުވާމީ ތިމާވެއްޓާ ބެހޭ ކޮޕް ސަމިޓުގައި ބައިވެރިވެވަޑައިގަތުމަށް މިވަގުތު އަޒަރުބައިޖާންގައި ހުންނެވި ރައީސްގެ ޕޯސްޓުގައިވެ އެވެ.

އެނގުން މުހިންމު - މިއަދުގެ މަޖިލިސް ޖަލްސާއަށް 'މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު'ގެ ނަމުގައި މި ބިލު ހުށަހެޅުއްވީ، ސަރުކާރުގެ ކަންކަމަށް ތާއީދު ކުރައްވަމުން ގެންދަވާ ނަމަވެސް ވަކި ޕާޓީއަކަށް ނިސްބަތްވެވަޑައިނުގަންނަވާ ތުޅާދޫ ދާއިރާގެ މެންބަރު އަބްދުލްހައްނާނެވެ.

އެ ބިލު ފަރުމާކޮށްފައި ވަނީ، އަލަށް އުފައްދާ މީޑިއާ ކޮމިޝަނުން ނޫސްވެރިންނާއި މީޑިއާތައް ބޮޑެތި އަދަދުތަކުން ޖޫރިމަނާ ކުރެވޭނެ ގޮތަށެވެ.

މީޑިއާތައް މިހާރު ރެގިއުލޭޓް ކުރުމަށް އޮންނަ މޯލްޑިވްސް މީޑިއާ ކައުންސިލް (އެމްއެމްސީ) އާއި ބްރޯޑްކާސްޓިން ކޮމިޝަން (ބްރޯޑްކޮމް) އުވާލައި އުފައްދާ އެ ކޮމިޝަންގެ މެޖޯރިޓީ ވެސް ލިބެނީ ސަރުކާރަށެވެ. އެގޮތުން، އެ ކޮމިޝަން އެކުލެވިގެންވަނީ، ބިލުގައިވާ ގޮތުން:

ގުޅުން ހުރި - މި ބިލާ ގުޅިގެން ނޫސްވެރިންގެ ޖަމިއްޔާ، އެމްޖޭއޭ އާއި އިދިކޮޅު މައި ޕާޓީ، އެމްޑީޕީން ވެސް ވަނީ ކަންބޮޑުވުން ފާޅުކޮށްފަ އެވެ.

އޭގެ އިތުރުން، މީޑީއާތަކާ ގުޅޭ މެންޑޭޓް އޮންނަ އިންފޮމޭޝަން އެންޑް އާޓްސް މިނިސްޓަރު އިބްރާހިމް ވަހީދު (އަސްވާޑު) މިއަދު ވިދާޅުވި ގޮތުގައި، އެ ބިލަކީ އެ ހުށަހެޅުއްވި މެންބަރުގެ އަމިއްލަ ހިޔާލެވެ. އޭގައި ހުރި ކަންކަން ދިރާސާ ކުރަމުން ގެންދަވާ ކަމަށް ވެސް އޭނާ ވިދާޅުވި އެވެ.