އިކުރާމް ދޫވުމުގައި ފުލުހުންގެ އިހުމާލެއް އޮތްތޯ ބަލައި ފިޔަވަޅު އަޅާނަން: އިހުސާން

މިދިޔަ ޖުލައި މަހު ފަހުކޮޅު ހުޅުމާލޭގައި ނުރައްކާތެރި އެކްސިޑެންޓެއްގައި ހިނގި އިރު ރޭސިން ކާރު ދުއްވި ކަމުގެ ތުހުމަތުގައި ހައްޔަރު ކުރި އިބްރާހިމް އިކްރާމް ހައި ކޯޓުން ދޫވުމާ ގުޅިގެން، އެކަމުގައި ފުލުހުންގެ އިހުމާލެއް އޮތްތޯ ބަލައި ފިޔަވަޅު އަޅުއްވާނެ ކަމަށް ހޯމްލޭންޑް މިނިސްޓަރު އިހުސާން މިރޭ ވިދާޅުވެއްޖެ އެވެ.

ވީ ކިހިނެއް؟ - އެ މައްސަލާގައި ކާރުގައި ތިބި ތިން މީހުން ވެސް ފިލައިގެން އުޅެނިކޮށް ހައްޔަރު ކުރުމުން އެމީހުން ބަންދުގައި ބެއިތިއްބުމަށް މީގެ ކުރިން އަމުރުކޮށްފައިވެ އެވެ. އޭގެ ތެެރެއިން އިކްރާމް މިއަދު ހައި ކޯޓުން ދޫކޮށްލީ، އޭނާއަށް ގާނޫނުއަސާސީން ލިބިދޭ ވަކީލަކު އައްޔަންކުރުމުގެ ހައްގަށް އެދިފައިވަނިކޮށް އެކަން ހަމަޖައްސައި ނުދީ ކްރިމިނަލް ކޯޓުން އޭނާގެ ބަންދުގެ މުއްދަތު ޖަހާފައި ވާތީ އެވެ.

މިކަމާ ގުޅިގެން އާންމުން ވެސް ކަންބޮޑުވުން ފާޅު ކުރަމުން އަންނަ އިރު، މިނިސްޓަރު އިހުސާން މިރޭ އެކްސްގައި ކުރެއްވި ޕޯސްޓެއްގައި، އެ މައްސަލައާ ގުޅޭ ގޮތުން ވަނީ ވާހަކަ ދައްކަވައިފަ އެވެ.

ބުނީ ކީކޭ؟ - "މިކަން ހިނގި ގޮތް ތަހުގީގުކޮށް އިހުމާލެއް ވެފައިވާ ނަމަ، އެމީހަކަށް ނުވަތަ ބަޔަކަށް އެންމެ ހަރުކަށި ފިޔަވަޅު އެޅޭނެ،" އިހުސާން ވިދާޅުވި އެވެ.

އޭނާ އިތުރަށް ވިދާޅުވީ އިކްރާމް ކޯޓު އަމުރެއްގެ ދަށުން އަލުން ހައްޔަރު ކުރުމަށް ފުލުހުން މިހާރު އަންނަނީ މަސައްކަތް ކުރަމުން ކަމަށެވެ.

ފާހަގަކޮށްލެވޭ ކަމެއް - އެ މައްސަލާގައި ހައިކޯޓުގައި ފުލުހުން ބުނެފައި ވަނީ، ދަށު ކޯޓުގެ ފަނޑިޔާރު ވަކީލަކު އައްޔަން ކުރުމުގާ ގުޅޭ ގޮތުން ބަންދުގެ އަޑުއެހުމުގައި އިކްރާމްއާ ސުވާލު ކުރި ކަމަށެވެ.

"ކްރިމިނަލް ކޯޓުގެ މުއްދަތު މަޖިލީހުގެ ރެކޯޑިން މި ކޯޓުން ހޯދައި، ވަކީލަކު ހަމަޖެއްސުމާ ގުޅޭ ގޮތުން އެއްވެސް ވާހަކައެއް ދައްކާފައިވޭތޯ ބެލިއިރު، އެފަދަ އެއްވެސް ކަމެއް އެއްވެސް ވާހަކައެއް އެއްވެސް ފަރާތަކުން ޝަރީއަތުގެ މަޖިލީހުގައި ދައްކާފައި ނުވޭ،" ހައި ކޯޓުގައި މައްސަލަ ބެއްލެވި ތިން ފަނޑިޔާރުންގެ ބެންޗުގެ ރިޔާސަތުގައި އިންނެވި ފަނޑިޔާރު މުހައްމަދު ފައިސަލް ވިދާޅުވި އެވެ.

އެހެންކަމުން އެއީ ޝަރީއަތުގެ މަޖިލީހަށް ދޮގު މައުލޫމާތު ދިނުން ކަމަށާއި އެ މައްސަލަ ތަހުގީގު ކުރަން ޖެހޭނެ ކަމަށް، ފަނޑިޔާރު ފައިސަލް ވިދާޅުވި އެވެ.