ފްލެޓުތައް ހަވާލުކުރެވޭނީ މިނިސްޓްރީން އެންގުމުން: އެފްޑީސީ

'ގެދޮރުވެރިޔާ ސްކީމް'ގެ ދަށުން މިދިޔަ ސަރުކާރުގައި ހުޅުމާލޭގެ ދެވަނަ ފިޔަވަހީގައި ތަރައްގީ ކުރަން ފަށާފައިވާ 4،000 ހައުސިން ޔުނިޓާ ބެހޭ އެއްވެސް މުއާމަލާތެއް ކުރިއަށް ގެންދެވޭނީ ހައުސިން މިނިސްޓްރީން އެކަމުގައި ވަކި ގޮތެއް އެންގުމުން ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން މިއަދު ބުނެފި އެވެ.

ފަސްމަންޒަރު - ކުރީ ސަރުކާރުން މާލޭގައި ދިރިއުޅޭ މީހުންނަށް ފްލެޓު ދިނުމަށް ހިންގި 'ގެދޮރުވެރިޔާ' ސްކީމުން ފްލެޓު ލިބޭ މީހުންގެ ދާއިމީ ލިސްޓެއް ދައުރުގެ ފަހުކޮޅުގައި ވަނީ ގެޒެޓުކޮށްފަ އެވެ. އަދި ދައުރު ހަމަވި އިރު، ފްލެޓު ލިބުނު ބައެއް މީހުންނާ އެކު ފްލެޓު ކަނޑައަޅާ އެއްބަސްވުމެއްގައި ވަނީ ސޮއި ވެސް ކޮށްފަ އެވެ.

ނަމަވެސް ދާއިމީ ލިސްޓަށް ގިނަ އަދަދެއްގެ މީހުން ޝަކުވާ ހުށަހެޅުމާ އެކު އޭސީސީއިން ތަހުގީގެއް ފަށައި އެ ތަހުގީގުގައި ބެލި ފޯމުތަކުގެ %59.6 ފޯމަކީ ޝަރުތު ހަމަނުވާ ފޯމުތަކެއް ކަމަށް ވަނީ ބުނެފަ އެވެ. އެއާ އެކު، މި ސަރުކާރުން ނިންމާފައިވަނީ ލިސްޓު އަލުން ބެލުމަށް ފަހު ފްލެޓް ހަވާލުކުރުމަށެވެ.

ވީ ކިހިނެއް؟ - ފްލެޓުތަކުގެ އެއްބަސްވުމާއި ފްލެޓްތައް ހަވާލުކުރުމާ ބެހޭ ގޮތުން ގިނަ ފަރާތްތަކުން މައުލޫމާތު ހޯދަން ހުށަހަޅަމުންދާތީ، އެކަމާ ގުޅިގެން އެފްޑީސީން މިއަދު ވަނީ ބަޔާނެއް ނެރެފަ އެވެ.

ބުނީ ކީކޭ؟ - އެ ބަޔާނުގައި އެ ކޯޕަރޭޝަނުން ބުނީ:

"އެހެންކަމުން، [ހައުސިން] ޔުނިޓު ހަވާލުކުރުމާ ގުޅޭގޮތުން ކުރެވޭ އެންމެހާ މުއާމަލާތްތައް ކުރިއަށްގެންދެވޭނީ އެ މައްސަލައާ ގުޅޭގޮތުން މިނިސްޓްރީން ވަކިގޮތެއް އެންގުމުން ކަމުގައި ދަންނަވަމެވެ،" އެފްޑީސީގެ ބަޔާނުގައިވެ އެވެ.

ފާހަގަކޮށްލެވޭ - ހައުސިން މިނިސްޓަރު ޑރ. އަލީ ހައިދަރު މިދިޔަ މަހު ރައްޔިތުންގެ މަޖިލީހުގެ ޕެޓިޝަންސް ކޮމިޓީގައި ވިދާޅުވެފައިވަނީ، 'ގެދޮރުވެރިޔާ'ގެ ފުރަތަމަ ޓަވަރުތައް ނިމެންވާއިރަށް މިހާރު އާންމުކޮށްފައިވާ ލިސްޓު އަލުން ރިވިއުކުރުމަށް ފަހު ފައިނަލް ލިސްޓެއް އާންމުކުރާނެ ކަމަށެވެ.

"އަޅުގަނޑަށް އެނގިފައި އޮތް ގޮތުގައި 32 ޓަވަރުގެ ތެރެއިން ފުރަތަމަ ހަ ޓަވަރު ނިމޭނީ އޮކްޓޫބަރު ނިމޭހާ ތަނުގައި. އިރާދަކުރެއްވިއްޔާ އެހާ ތަނަށް އަޅުގަނޑުމެން ފައިނަލް ލިސްޓު އާންމުކުރާނަން،" ހައިދަރު ވިދާޅުވެފައިވެ އެވެ.

އެނގުން މުހިއްމު - މި ސަރުކާރުން ނިންމާފައިވަނީ ކުރީގެ ސަރުކާރުން ގެޒެޓުކުރި ދާއިމީ ލިސްޓަށް އެއްވެސް އުނި އިތުރެއް ނުގެނެސް، އަލުން ރިވިއުކުރުމަށެވެ. އެހެންކަމުން، ކުރިން އާންމުކުރި ލިސްޓު ބާތިލެއް ނުކުރާނެ އެވެ. އަދި ލިސްޓު ރިވިއުކުރާނީ ލިބެންހުރި ހެކިތަކަށް ބިނާކޮށް ކަމަށް ވެސް ސަރުކާރުން ވަނީ ބުނެފަ އެވެ.

ގުޅުންހުރި ކަމެއް - ފްލެޓުތަކާ ގުޅިގެން އާންމު ފަރާތްތަކުން ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމެޓީއަށް ހުށަހެޅި މައްސަލަ ދިރާސާކޮށް ރިޕޯޓެއް ވަނީ އެކުލަވާލައިފަ އެވެ.

އެ ރިޕޯޓުގައި ކޮމެޓީން ފާހަގަކުރި މައިގަނޑު ތިން ކަމަކީ:

ރައީސްގެ ވައުދުފުޅާ އެއްގޮތަށް ލިސްޓަށް އުނިއިތުރެއް ނުގެނެސް، އެ މީހުންނަށް ފްލެޓު ދިނުން އަވަސް ކުރުމަށް 27 މާޗުގައި ކޮމެޓީން ނިންމި ނިންމުން ވަނީ މަޖިލީހުގެ ތަޅުމުން ފާސްކޮށްފަ އެވެ.

މަޖިލީހުން އެ ގޮތަށް ނިންމި ނަމަވެސް ފްލެޓުތައް ދޭނީ އޭސީސީގެ ރިޕޯޓުގައި ފާހަގަކުރި މައްސަލަތަކަށް ބެލުމަށް ފަހު ކަމަށް ރައީސް އޮފީހުގެ ތަރުޖަމާނު ހީނާ ވަލީދު މީގެ ކުރިން ވަނީ ވިދާޅުވެފަ އެވެ.