ރިލްވާން ގެއްލުވާލުމާ ގުޅިގެން އޭރު ނޫސްވެރިން ކުރި މުޒާހަރާއެއްގެ ތެރެއިން: އޭނާ ގެއްލުވާލިތާ މިއަދަށް 10 އަހަރު ވަނީ ވެފައި (ފައިލް ފޮޓޯ)
ރިލްވާން ގެއްލުވާލިތާ 10 އަހަރު: ޖަމިއްޔާތަކުން ގޮވާލީ ތުހުމަތުވާ މީހުން ސަސްޕެންޑްކޮށް، ކޮމިޝަންގެ އޮޑިޓެއް ހެދުމަށް
ނޫސްވެރިނޔާ އަހުމަދު ރިލްވާން ގެއްލުވާލި މައްސަލައިގައި ތުހުމަތުވާ ބައެއް މީހުންނަށް މި ސަރުކާރުގައި އިސް މަގާމުތަކެއް ދީފައިވާތީވެ، އެ ކަމުގެ ކަންބޮޑުވުން ފާޅުކޮށް އެ މީހުން ސަސްޕެންޑް ކުރުމަށް ޖަމިއްޔާތަކުން ސަރުކާރަށް މިއަދު ގޮވާލައިފި އެވެ. އޭގެ އިތުރުން، މަރުގެ މައްސަލަތައް ބެލުމަށް ކުރީގެ ސަރުކާރުން އުފެއްދި މަރު ކޮމިޝަންގެ އޮޑިޓެއް ހެދުމަށް ރައްޔިތުންނަށް މަޖިލީހަށް ވެސް ގޮވާލާފައިވެ އެވެ.
ވީ ކިހިނެއް؟ - 8 އޮގަސްޓު 2014ގައި ރިލްވާން ގެއްލުވާލި ފަހުން މިއަދަށް 10 އަހަރު ފުރުމާ ގުޅުވައި ހައްގުތަކަށް ވަކާލާތު ކުރާ ބައިނަލްއަގުވާމީ ބޮޑެތި ޖަމިއްޔާތަކާއި ރާއްޖޭގެ ޖަމިއްޔާތައް ހިމެނޭ ގޮތަށް 12 ފަރާތަކުން މިއަދު ވަނީ ނޫސްބަޔާނެއް ނެރެފަ އެވެ.
ތަފްސީލު - އެ ބަޔާނުގައި، ރިލްވާން ގެއްލުވާލުމާއި އޭނާ "މަރާލި ކަމަށް ބެލެވޭ" މައްސަލައިގައި ރަސްމީ މައުލޫމާތެއް މި ފާތުވި 10 އަހަރު ލިބިފައި ނުވާތީ އާއި އަދިވެސް އެކަމަށް އާއިލާއިން އިންތިޒާރު ކުރަން ޖެހޭތީ ކަންވޮޑުވުން ފާޅުކޮށްފައިވެ އެވެ. އެގޮތުން، ބަޔާނުގައި ބުނި ގޮތުގައި:
-
ރިލްވާންގެ މައްސަލައިގައި ދައުވާ އުފުލި ދެ މީހުންގެ މައްޗަށް ސެޕްޓެމްބަރު 2017 އިން އޮގަސްޓު 2018އަށް ކުރިއަށް ދިޔަ ޝަރީއަތްތަކަށް ފަހު، ކުށް ސާބިތުވެފައެއް ނުވޭ؛ އޭރު މައްސަލަ ބެއްލެވި ފަނޑިޔާރު ވަނީ، ތަހުގީގު ކުރުމާއި ދައުވާ އުފުލުމުގެ ކަންކަމުގައި އިހުމާލުވެފައިވާކަން ފާހަގަކޮށްފައި
-
ނޮވެމްބަރު 2018ގައި ރައީސް އިބްރާހިމް މުހައްމަދު ސޯލިހް ވެރިކަމަށް ވަޑައިގެންނެވީ މި މައްސަލައަށް އިންސާފު ހޯދެއްދުމަށް ވައުދުވެވަޑައިގެން؛ އެކަމަށް އެފެއްދި މަރު ކޮމިޝަން ފަސް އަހަރު ފަހުން އުވާލި އިރު އެ ވައުދު ފުއުދުމަށް ކުރި ކަމެއް ފެންނާކަށް ނެތް
-
ކޮމިޝަންގެ ތަހުގީގާ ގުޅިގެން ހައްޔަރުކޮށް ދައުވާ އުފުލި ތިން މީހުންގެ މައްޗަށް ހެއްކެއް ނެތުމުން ދައުވާތައް ކްރިމިނަލް ކޯޓުން ވަނީ ބޭރުކޮށްލާފައި؛ އެ ނިންމުން ޕްރޮސެކިއުޓާ ޖެނެރަލްގެ އޮފީހުން އިސްތިއުނާފްކޮށްފައެއް ނުވޭ
-
ކޮމިޝަނުން އެ މައްސަލައާ ގުޅޭ ގޮތުން ހޯދި ހޯދުންތައް ހާމަ ކުރުމަށް ދެކޮޅު ހާދާފައިވޭ
"ޑީޑީކޮމް [ކޮމިޝަން]ގެ ރިޕޯޓްތައް އާންމުކުރާނެ ކަމަށް [މިހާރުގެ] ރައީސް [މުހައްމަދު] މުއިއްޒުގެ ސަރުކާރުން ވައުދުވެފައި ވާއިރު، ރިލްވާން ގެއްލުވާލި މައްސަލާގައި ކޮމިޝަނުން ތުހުމަތުކޮށްފައިވާ އިސް މީހުންނަށް މި ސަރުކާރުން އިސް މަގާމުތަކެއް ދީފައިވޭ،" އެއީ ކޮން ބައެއްކަން ހާމަނުކޮށް ބަޔާނުގައި ބުނެފައިވެ އެވެ.
"ޑީޑީކޮމްގެ ރިޕޯޓްތައް ލަސްނުކޮށް ޝާއިއުކުރުމަށާއި ރިލްވާން ގަދަކަމުން ގެއްލުވާލާފައިވާ ކަމަށް ތުހުމަތު ކުރެވޭ ފަރާތްތައް ސިޔާސީ މަގާމުތަކުން ސަސްޕެންޑް ކުރުމަށް ރައީސް މުއިއްޒަށް ގޮވާލަން."
މަރު ކޮމިޝަންއާ 27 މައްސަލައެއް ތަހުގީގު ކުރުމަށް ހަވާލު ކުރިކަން ފާހަގަކޮށް ބަޔާނުގައި ބުނީ، އެއިން އެއްވެސް މައްސަލައެއްގައި ކުށް ސާބިތުވެފައި ނުވާ ކަމަށެވެ. އެހެންވެ، އެ ކޮމިޝަން މަސައްކަތުގެ އޮޑިޓެއް ހެދުމަށް ރައްޔިތުންގެ މަޖިލީހަށް ގޮވާލާފައިވެ އެވެ. އެ އޮޑިޓްގައި ހިމަންން ޖެހޭ ކަންކަމުގެ ތެރޭގައި ފާހަަގަކޮށްފައި ވަނީ:
-
އެ 27 މައްސަލައިގައި ތުހުމަތުވާ މީހުނަނަށް ކުށް ސާބިތު ނުވި ސަބަބުތައް
-
ތަހުގީގު ރިޕޯޓުތައް އާއިލާތަކަށް ދިނުމަށް ދެކޮޅު ހަދުމުގެ ސަބަބުތައް
އިންޓަނޭޝަނަލް ފެޑްރޭޝަން ފޯ ހިއުމަން ރައިޓްސް (އެފްއައިޑީއެޗް) އާއި ހިއުމަން ރައިޓްސް ވޮޗު (އެޗްއާރުޑަބްލިއު) ވެސް ހިމެނޭ ފަރާތްތަކުން ނެރުނު މި ބަޔާނުގައި، ރާއްޖޭގެ ހިއުމަން ރައިޓްސް ކޮމިޝަން (އްޗުއާރުސީއެމް)އަށް ވެސް ޑިމާންޑެއް ކޮށްފައިވެ އެވެ. އެއީ، ރިލްވާން ގެއްލުވާލުމާއި އޭނާގެ އާއިލާގެ އިންސާނީ ހައްގުތަކަށް އަރައިގަތުން އަދި 8 އޮގަސްޓު 2014ގެ ފަހުން ރާއްޖޭގައި ހިނގި އިންސާނީ ހައްގުތަކަށް އަރައިގަތުމާ ގުޅޭ މައްސަލަތަކުގެ ޕަބްލިކް އިންކުއަރީއެއް ހެދުމަށެވެ.
ފަސް މަންޒަރު - މަރު ކޮމިޝަނުން ބޭއްވި ނޫސްވެރިންގެ ބައްދަލުުމެއްގައި ހާމަކޮށްފައިވާ ގޮތުގައި، ރިލްވާން ވަގަށް ނަގައިގެން ގެންދިއުމަށް ފަހު، ގްރޫޕަކުން ވަނީ އޭނާ މަރާލަފަ އެވެ.
އިތުރަަށް ކިޔާލަން -