ރިލްވާން މަރުގެ މައްސަލައިގައި ހައްޔަރު ކުރި ތިން މީހުން (ކ-ވ): އަހްމަދު މުއާޒު (ގަޓު މުއާ)، އިސްމާއިލް އަބްދުލްރަހީމް އާދަމް (އިސޫ) އަދި އަހުމަދު އިސްމާއިލް (އަހަނދު)
ޔާމީން އާއި ރިލްވާން މަރު: އެންމެންގެ ދައުވާތައް ބޭރުކޮށްލައި މިނިވަންކޮށްފި
ނޫސްވެރިޔާ އަހްމަދު ރިލްވާން އާއި ބްލޮގަރު ޔާމީން ރަޝީދުގެ މަރާ ގުޅިގެން ދައުވާ އުފުލާފައިވާ އިސްމާއިލް އަބްދުއްރަހީމް އާދަމް (އިސޫ) އާއި އަހްމަދު މުއާޒު (ގަޓު މުއާ)އާ ދެކޮޅަށް ކޮށްފައިވާ ދައުވާތައް ބޭރުކޮށްލައި އެ ދެ މީހުން ވެސް މިނިވަންކޮށްފި އެވެ.
ކިހިނެއް؟ - ކުރީގެ ރައީސް އިބްރާހިމް މުހައްމަދު ސޯލިހް އެކުލަވާލެއްވި މަރު ކޮމިޝަނުން ތަހުގީގު ކުރަމުން އައި މިނިވަން ނޫހުގެ ނޫސްވެރިޔާ ރިލްވާން ގެއްލުވާލުމާއި ބްލޮގަރު ޔާމީން މަރާލުމުގެ މައްސަލާގައި މިދިޔަ އަހަރުގެ 26 ޖޫންގައި ހައްޔަރުކޮށް، ޖެހިގެން އައި 1 ސެޕްޓެމްބަރުގައި ތިން މީހެއްގެ މައްޗަށް ދައުވާ އުފުލި އެވެ. އެއީ:
-
އަހުމަދު އިސްމާއިލް (އަހަނދު)، މއ. ފާގަފިލާގެ، 39 - ޓެރަރިޒަމްގެ އަމަލެއް ކުރުމަށް އެހީތެރިވުން އަދި ޓެރަރިޒަމްގެ އަމަލެއް ކުރުމަށް ރޭވުން
-
އިސްމާއިލް އަބްދުއްރަހީމް އާދަމް (އިސޫ)، މ. ލެގޫންވިއު، 30 - ޓެރަރިޒަމްގެ އަމަލެއް ކުރުމަށް އެހީތެރިވުމުގެ ދެ ދައުވާ
-
އަހްމަދު މުއާޒު (ގަޓު މުއާ)، މާލޭ ދަފްތަރު އާރުއެސް 8499، 40 - ޓެރަރިޒަމްގެ އަމަލެއް ކުރުމަށް ރޭވުން
މި ތިން މީހުން ވެސް މިފަހުން ވަނީ ޓެގު އެޅުވުމަށް ފަހު ގޭބަންދަށް ދޫކޮށްލައިފަ އެވެ.
ކްރިމިނަލް ކޯޓުން މިއަދު 'ދައުރު'އަށް ކަށަވަރުކޮށްދިން ގޮތުގައި، ދައުވާތައް ބާތިލުކޮށް، މައްސަލަ ބޭރުކޮށްލާފައިވަނީ، މަދަނީ މިންގަނޑުން ހެކި ވަޒަން ކުރިއިރު، ދައުވާ ކުރިއަށް ގެންދެވޭ ވަރަށް ހެކި ނެތް ކަަމަށް ނިންމައި އިއްޔެގެ ވަގުތެއްގަ އެވެ.
އެނގިފައިވާ ގޮތުގައި، އެއާ އެކު، މޮނިކޮން އަމުރެއްގެ ދަށުން ޓެގު އަޅުވައި ގޭބަންދަށް ދޫކޮށްލާފައިވާ އެ ދެ މީހުން މިހާރު ވަނީ މިނިވަންވެފަ އެވެ. މި މައްސަލާގައި ތުހުމަތުކޮށް ދައުވާ އުފުލި އަހުމަދު އިސްމާއީލް (އަހަނދު) ވެސް މިދިޔަ މަހުގެ 12 ވަނަ ދުވަހު ވަނީ މިނިވަން ކޮށްފަ އެވެ. އޭނާގެ މައްސަަލަ ވެސް ކޯޓުން ބޭރުކޮށްލީ، މަަދަނީ މިންގަނޑުން ބަލާއިރު، އެ މައްސަލަ ކުރިއަށް ގެންދެވޭ ވަރަށް ހެކި ނެތް ކަމަށް ނިންމާފަ އެވެ.
-
އިތުރަށް ކިޔާލަން - ޔާމީން، ރިލްވާންގެ މަރު: ހެކި ނެތިގެން އިސްމާއީލް މިނިވަންވެއްޖެ
ފަސްމަންޒަރު - މިއީ ގޮތް ނޭނގޭ މަރުތައް ތަހުގީގުކުރުމަށް އެ މަނިކުފާނުގެ ވެރިކަމުގެ ފުރަތަމަ ދުވަހު ކުރީގެ ރައީސް ސޯލިހު އުފެއްދެވި ރިޔާސީ ކޮމިޝަނުން ތަހުގީގުކޮށް، ދައުވާ ކުރަން ފޮނުވައި ކޯޓަށް މައްސަލަ ހުށަހެޅި ފުރަތަމަ މައްސަލަ އެވެ. ޔާމީނާއި ރިލްވާންގެ މަރަށް އިންސާފު ހޯދައިދިނުމަކީ މި ސަރުކާރުގެ ވައުދެކެވެ. ނަމަވެސް މި މައްސަލާގައި ޝަރީއަތް ކުރަމުންދިޔަ އިސްމާއިލް އަބްދުއްރަހީމް އާދަމް އާއި އަހްމަދު މުއާޒުގެ މައްސަލަ އިއްޔެ ބޭރުކޮށްލުމާ އެކު، މި މައްސަލާގައި ހިމެނޭ އެންމެން ވެސް މިވަނީ ދޫވެފަ އެވެ.
ޔާމީންގެ މަރުގެ މައްސަލަ:
-
2017 ވަނަ އަހަރު އަނިޔާވެރި ގޮތަކަށް ޔާމީން މަރާލި މައްސަލައިގައި ހަ މީހެއްގެ މައްޗަށް ކުރިން ދައުވާ އުފުލި
-
އެ މީހުންގެ ތެރެއިން ދައުވާ ސާބިތުވީ އެންމެ ދެ މީހެއްގެ މައްޗަށް
-
ކުށް ސާބިތުނުވި މީހުންގެ ތެރެއިން ދެ މީހެއްގެ މައްސަލަ ޕީޖީން ވަނީ މިދިޔަ އަހަރުގެ އޭޕްރީލްގައި ހައި ކޯޓުގައި އިސްތިއުނާފްކޮށްފައި
ރިލްވާންގެ މަރުގެ މައްސަލަ:
-
2014 ވަނަ އަހަރު ގެއްލުވާލި ނޫސްވެރިޔާ ރިލްވާން މަރާލި މައްސަލައިގައި ދެ މީހެއްގެ މައްޗަށް ޓެރަރިޒަމްގެ ދައުވާ ކުރިން އުފުލި
-
އެ ދެ މީހުންގެ މައްޗަށް ވެސް ކުށް ސާބިތުނުވާ ކަމަށް 2018ގައި ވަނީ ހުކުމް ކޮށްފައި؛ އެ ހުކުމް އިސްތިއުނާފެއް ނުކުރޭ
-
މަރު ކޮމިޝަން ބުނެފައިވަނީ، ރިލްވާން ކިޑްނެޕްކުރުމަށް ފަހު ރާއްޖޭގެ އަލް-ގައިދާ ގޮފިން އޭނާ މަރާލާފައިވާ ކަމަށް
ކޮމެންޓް (1)
އާރީ