ނޫސްވެރިޔާ އަހުމަދު ރިލްވާން: އޭނާ ކަރު ބުރުކޮށް، މަރާލީ ކަންނެލި ދޯނީގައި މަރުކޮމިޝަނުން މިއަދު ބުނި
ރިލްވާން ގެންދިޔަ ކަންނެލި ދޯނި ހޯދަން މަސައްކަތް ކުރި ނަމަވެސް ނުހޯދޭ: ކޮމިޝަން
ނޫސްވެރިޔާ އަހްމަދު ރިލްވާން ރަހީނުކުރުމަށް ފަހު އޭނާ މަރާލުމަށް ބޭނުން ކުރި ކަންނެލި ދޯނި ހޯދުމަށް މަސައްކަތް ކުރި ކަމަށާއި ނަމަވެސް ސީދާ އެ ދޯނި ހޯދިފައި ނުވާ ކަމަށް އެ މައްސަލަ ތަހުގީގު ކުރި މަރު ކޮމިޝަނުން މިއަދު ބުނެފި އެވެ.
ވީ ކިހިނެއް؟ - އޮގަސްޓް 2014ގައި ވީނުވީއެއް ނޭނގި ގެއްލުނު ރިލްވާންގެ ތަހުގީގު ނިންމައި، މަރު ކޮމިޝަނުން މިއަދު ވަނީ އެ ތަހުގީގު ރިޕޯޓް ރައީސް އިބްރާހިމް މުހައްމަދު ސޯލިހަށް އަރުވާފަ އެވެ. އަދި އެއަށް ފަހު، އެ ކޮމިޝަނުން ރައީސް އޮފީހުގައި މިއަދު ވަނީ ނޫސްވެރިންގެ ބައްދަލުވުމެއް ބާއްވާފަ އެވެ.
ތަފްސީލު - ދެ ގަޑިއިރަށް ދިގު ދެމިގެން ދިޔަ ނޫސްވެރިންގެ ބައްދަލުވުން ނިމުމަށް ފަހު، ކޮމިޝަންގެ މެންބަރު މިސްބާހު މުހައްމަދު ނޫސްވެރިންނާ ވާހަކަ ދައްކަވަމުން ވިދާޅުވީ، ކަންނެލި ދޯނި ހޯދުމަށް ކޮމިޝަނުން ގިނަ މަސައްކަތްތަކެއް ކުރި ކަމަށެވެ. ނަމަވެސް އަދި މިހާތަނަށް އެ ދޯނި "އައިޑެންޓިފައި" ނުވާ ކަމަށް އޭނާ ވިދާޅުވި އެވެ.
"ބައެއް ދޯނިތައް ހޯދައި، ބަލަންވެސް ބެލި. އެކަމަކު ދިމާވި މައްސަލައަކީ، އެ ދޯނިތައް ހުރީ މަރާމާތުކުރުމަށް ފަހު ބުރި ބުރިއަށް ހަދާފައި،" އޭނާ ވިދާޅުވި އެވެ.
މިސްބާހު ވިދާޅުވީ ކޮމިޝަންގެ ތަހުގީގަށް ދިމާވެ އެންމެ ބޮޑު އެއް ގޮންޖެހުމަކީ މި މަރަށް ގިނަ ދުވަސްވުމެވެ. އެހެންވެ، ސީދާ އެ ކަންނެލި ދޯނި ހޯދުމަށް އުނދަގޫވި ކަމަށް އޭނާ ވިދާޅުވި އެވެ.
"ކަންނެލި ދޯނި އައިޑެންޓިފައި ކުރެވުނު ނަމަވެސް، މައްސަލައަށް ގިނަ ދުވަސްވުމުން އޭގެން އިތުރު ހެކިތަކެއް ހޯދަން ވަރަށް ބޮޑު ގޮންޖެހުންތަކެއް ކުރިމަތިވާނެ،" އޭނާ ވިދާޅުވި އެވެ.
ނޫސްވެރިންގެ ބައްދަލުވުމުގައި ކޮމިޝަނުން ފާހަގަކުރި މުހިންމު ބައެއް ކަންކަން:
-
ރިލްވާން މަރާލާފައިވަނީ، ރަތް ކާރަކަށް އަރުވެގެން ގެންގޮސް، ޑިންގީއަށް އަރުވައިގެން ކަންނެލި ދޯނީގައި
-
ކަންނެލި ދޯނީގައި ރިލްވާނަށް ކަލިމަ ލައިދީ، ބޯ ބުރިކުރުމަށް ފަހު، ކަނޑު ފެއްތި
-
އެ ދޯނީގައި ތިބި މީހުންގެ ތެރެއިން ހަ މީހަކު ސީރިއާއަށް ފުރި؛ އެމީހުން މަރުވި ކަމަށް މައުލޫމާތު ލިބުނު ނަމަވެސް އެކަން ކަށަވަރެއް ނޫން
-
މި މައްސަލައިގައި ތުހުމަތުކުރެވޭ މުހައްމަދު މުނާޒު ތ. އޮމަދޫ/ ނަރުގިސްވިލާ، ސީރިއާއަށް ފުރައިގެން ދިޔައީ އޭރުގެ ރައީސް އަބްދުﷲ ޔާމީންގެ އެހީތެރިކަމާ އެކު
-
މުނާޒު ފުރައިގެން ދިޔައީ، އޭނާގެ ބައިވެރިވުން ނުހިމެނޭ ގޮތަށް ރިލްވާނަށް ވީ ގޮތް ޔާމީނަށް ކިޔައި ދިނުމަށް ފަހު
-
މި މައްސަލައިގައި އިތުރު ބައެއްގެ މައްޗަށް ދައުވާ ކުރެވޭނެ
ފަސް މަންޒަރު - މިއަދުގެ ނޫސްވެރިންގެ ބައްދަލުވުމުގައި ދެއްކި ގިނަ ވާހަކަތަކީ، މީގެ ކުރިން މަރު ކޮމިޝަނުން ހާމަކޮށްފައިވާ މައުލޫމާތުތަކެވެ.
ރިލްވާންގެ މައްސަލާގައި މިހާރުވެސް ތިން މީހެއްގެ މައްޗަށް ދައުވާ އުފުލި ޝަރީއަތް ކުރަމުންދިޔުމާއި އަދިވެސް އިތުރު ބަޔަކަށް ފިޔަވަޅު އަޅަން ޖެހޭތީ، މިފަހަރުގެ ތަހުގީގު ރިޕޯޓު ހާމަނުކުރަން އެ ކޮމިޝަނުން ވަނީ ނިންމާފަ އެވެ.